5. (c) *meydan tv*
bəxtiyar hacıyev: ''gənclərin böyük əksəriyyətini azad saymaq olmaz''
fevralın 2-si azərbaycanda gənclər günü kimi qeyd edilir. media da bu günə müxtəlif aspektdən yanaşır. kimi gənclərin problemlərini qabardır, kimi də bu sahəyə olan dövlət qayğısını sadalayır.
meydan tv gənclər gününə özəl harvard məzunu bəxtiyar hacıyevlə müsahibə edib.
- bəxtiyar bəy, azərbaycan gəncləri siyasi, iqtisadi və mənəvi baxımdan özlərini azad hiss edirlərmi?
- sual bir neçə il əvvəl verilsəydi, bir qrup gənc istisna olmaqla, yerdə qalanları azad deyil deyərdim. ancaq bu gün istisna qrupu da görə bilmirəm. çünki əvvəllər hakimiyyətyönümlü gənclər təşkilatlarının nisbətən həm iqtisadi, həm də hüquq və azadlıqlarından istifadə etmək üstünlükləri vardı. bu gün o da yoxdur. gənclərin böyük əksəriyyətini azad saymaq olmaz.
- hazırda gənclərin vacib aradan qaldırılmalı problemi nədir?
- gənclər üçün birinci prioritet təhsildir. əvvəllər müəyyən universitetlərdə təhsil səviyyəsinin dəyişəcəyi gözləntisi var idi. amma bugün bakı dövlət universitetinin tələbəsi sosial şəbəkələrdə şəxsi fikrini azad ifadə edə bilmir, hətta hədələnir. ikinci, əvvəllər tələbələrin iş problemi vardı, indi problem daha da dərinləşib. bəzən bir vakansiya elan olunur, ora minlərlə gənc müraciət edir. tələbələr çox aşağı və ağır şərtlərlə işləməyə məcbur olurlar. üstəlik, son 10 ildə gənclər sektorunda müsbət sayıla biləcək “xaricdə təhsil üzrə dövlət proqramı” da ləğv edildi. bir çox sahələrdə lazımsız xərclər yerində qaldığı halda, xaricdə təhsil proqramı aradan qaldırıldı. hər gün hamımızın problemini yaşadığımız nəqliyyat sektorunda intellektual mərkəzin yaranmasına, yaxud hansısa kompleksin inşaasına, yolun təmirinə xərclənən vəsaitlə minlərlə gəncin xaricdə təhsil almasına şərait yaratmaq olardı. sonradan həmin gənclər ölkənin kadr bazası olub, inkişafa töhvə verə bilərdilər. bu gün universitetlərin yataqxana problemi var. tələbələr çox pis şəraitdə qalmağa məcburdur. bu da onların peşəkar kimi inkişafının qarşısını alır.
- azərbaycan gənclərinin durumunu qonşu respublikalardakı həmkarlarıyla müqayisə edəndə hansı mənzərə yaranır?
- ermənistan haqda geniş məlumatlı olmadığımdan konkret heç nə deyə bilmərəm. gürcüstanda bir çox gənclər nazir müavini, nazir postlarında fəaliyyət göstərir, parlamentdə təmsil olunurlar. “bizdə də bu var” - deyib, bir neçə gənci parlamentə buraxmaqla nəsə dəyişmir. qonşu respublikada həqiqətən də siyasi mübarizə aparıb, hansısa partiyanın tərkibində hakimiyyətə gələn, yaxud parlamentə mandat alan gənclərdən söhbət gedir. onların müxtəlif sektorlarda həyata keçirdikləri islahatlara baxanda və eyni zamanda azərbaycanda yaşı 50-dən yuxarı keçən nazirlər kabinetinin tərkibini görəndə, gənclərin idarəetmədə heç bir qərarverici olmadıqlarını görürsən. azərbaycanda yalnız bir qurumun rəhbərliyində gənclər təmsil olunub. bu da asan-xidmətdir. sıfırdan gənclər tərəfindən idarə olunur. əhali arasında asan-xidmətə həm etimad böyükdür, həm razılıq səviyyəsi kifayət qədər yüksəkdir. bu amil əslində hakimiyyətə bir siqnal olmalıydı. onlar yaşı kifayət qədər yuxarı olan, sovet məktəbini keçmiş, heç bir islahat potensialı, istəyi olmayan, çalışdığı sahədə yalnız "necə korrupsiya mexanizmi qura bilərəm", - düşüncəsiylə yaşayanları vəzifədən azad etməliydilər. bunun qarşılığında gəncləri prosesə cəlb etsəydilər xalq və dövlət üçün daha yaxşı olardı. nəinki indiki komandanı saxlamaq.