7. ------
rəşad həsənov: «əgər siz ciddi addımlar atmasanız, məcburam ki, ölənə kimi davam etdirim aclığı...»

“nida” vətəndaş hərəkatının həbsdə olan 8 nəfər üzvü artıq 10 gündür ki, aclığı davam etdirir. hərəkatın həbsdə olan üzvü, idarə heyətinin keçmiş üzvü rəşad həsənov son vəziyyətləri ilə bağlı açıqlama verib. açıqlamada deyilir:

“artıq 10 gündür başladığımız aclıq aksiyamız davam edir. hələlik səhhətimizdə, kiçik nüansları çıxsaq, ciddi problemlər yaşanmayıb. amma zaman keçdikcə fəsadlar gözlənilir.

bu aksiya başlayandan, başda ailələrimiz olmaqla, yaxın ətrafımız, mübarizə yoldaşlarımız, ictimai-siyasi xadimlər və s. şəxslər bizə çoxlu mesajlar ünvanlayır. mesajların mətn və üslubu fərqli olsa da, hamısının bircə məqsədi var: aclığı dayandıraq!


aksiyamızın heç kimə faydası olmamasını iddia edənlər yanılırlar. onların hazırda görə bilmədikləri faydaları, biz başlamadan əvvəl görürdük və görməkdəyik. liderliyin ən vacib xüsusiyyətlərindən biri viziondur. elə bizi həbsə gətirən səbəblərdən biri də budur.

bir şeyi qeyd edim ki, mən haqqımda olan şayiələrin qarşısını almaq üçün məhkəmədə jurnalistlərə bildirmişəm ki, “kimdənsə - hətta ailə üzvlərim və vəkillərimdən də - aclığı dayandırdığımı eşitsəniz, inanmayın”.

yoxsa mən “öldü var, döndü yoxdur” deməmişəm.

indi isə üzümü siz gənclərə tutub deyirəm ki, əgər siz ciddi addımlar atmasanız, məcburam ki, ölənə kimi davam etdirim aclığı.

bu aksiya ilə bağlı hər bir incəlik hesablanıb və hazırda planlı addımlar atılır. yəni, kortəbii heç nə yoxdur. emosional yox, rasional addımlayırıq. təəssüflər olsun ki, bizdən fərqli olaraq, həbsdə olmayan, yəni bizə görə daha geniş hərəkət imkanı olan şəxslər, aktivistlər xüsusilə kiçik və ya böyük liderlər emosional yanaşır məsələyə. valideynlərin aclığa aclıqla qarşılıq verməsini hardasa anlamaq olar, amma aktivistlərin gecə-gündüz yas tutması qəbuledilməzdir!

hər böhran təhlükə ilə yanaşı eyni zamanda bir fürsətdir. biz əlimizdən gələn ən təsirli və eyni zamanda ən təhlükəli vasitəyə müraciət etmişik. növbə sizindir!

əlimizdən heç nə gəlmir, “bizə lazımsınız” və s. yazmaqla bizə qətiyyən təsir etmirsiniz.

hər zaman dediyim kimi: heç nədən və heç kimdən qorxmayın! fəal və cəsarətli olun!"
-------