4. ən birinci növbədə anonim olmaqdır. sözlük yazarı anonimdir, kimliyi bilinməməlidir, kimliyi olmamalıdır. filan sözlük yazarı dedikdə insanların ağlına bilinən bir insan yox, fikirdən bir varlıq gəlməlidir. sözlük yazarını sözlük yazarı edən şey də məhz budur.

elə bir zamanda yaşayırıq ki, gündəlik həyatımızı digərlərinin istəkləri əsasında qururuq. digərlərinin reaksiyalarına görə danışırıq, hərəkət edirik. yaltaqlanırıq, susuruq, qorxuruq.. bu həyatımızın hər anında digərləri olduğu üçün belədir. bəzən sahib olduqlarımızı qorumaq üçün, bəzən yeni varlıqlar əldə etmək üçün, özümüz olmaqdan qaçırıq. dost, tanış, düşmən, ailə, qohum, dövlət.. kimliyi bilinən bir insan bunların hamısı ilə hesablaşmalıdır. və bu səbəbdən istəsə də özü ola bilməz.

elə ona görə də sözlük yazarı anonim olmalıdır. fikrini rahat yazmalıdır, ağ gördüyünə ağ, qara gördüyünə qara deməlidir. bura mədəniyyətdən qaçıb sığındığı yerdir yazarın. özü olduğu yerdir. insanın kimliyi ifşa olanda, hərəkətləri dəyişir, instinktlərini itirir. söhbət internetdən getmir, facebook da internetdir ama hamımız orada adımız bilinir deyə, həmin həyatdaki yaltaqlığımızı, ikiüzlülüyümüzü olduğu kimi əks etdiririk. ancaq sözlük fərqli bir məcradır və belə olmamalıdır.

sözlük yazarı, qorxusuz olmalıdır. yılışık olmamalıdır, yaltaq, üzüyola olmamalıdır. admin, mod dərdi olmamalıdır. aykırı olmalıdır. sözlük yazarı adının, işinin, sosyal statusunun onun üçün yaratdığı kimliyi bir kənara qoyub, özünə tam yeni, tamamilə düşüncələrindən əmələ gələn bir kimlik yaratmalıdır.

sözlük yazarı, əlbətdə kirpi başlığına da yazmalıdır, səməni başlığına da yazmalıdır ama bilməlidirki, onu yazar edən, sözlük yazarı edən cəmiyyət haqqında yazdığı yazılardır. sənin fikir profilini, vermeşil haqqında yazdıqların yox, biraz daha ciddi mövzulardaki fikirlərin formalaşdıracaqdır. sözlük lüğət olmamalıdır, alma haqqında bilmək istəyən google'dan tapa bilər. sözlük başqa şeylər üçündür.

sözlük yazarı, anonimliyi dürüstlüyünü, kəsərliliyini və tərəfsizliyini qorumaq üçün istifadə etməlidir. anonimliyinə güvənib, hansısa yazara açıq vəya örtülü təhqir, təhdid ünvanlamamalıdır. sözlük yazarı ədəbli olmalıdır. özəli ifşa etməməlidir.

sözlük yazarı, sözlüyün və internetin dəyərini bilməlidir. interneti, ifşa olmadan anonimliyini qoruyaraq istifadə etməli, gerçək kimliyinin əsiri olmamalıdır. insanlığımızdan istifadə edilərək, artıq internetin hər sahəsində kimlik bilgilərimizin ifşasını istəyən internet siyasətinə qarşı olmalı, anonimliyini israrla qorumalıdır. çünki anonimlik hərşeydir. anonimlik, qarşı olmaqdır. sistem bundan qorxacaqdır.

sözlük yazarı, başqa heçbir yazarı düşünməməli, heç kimin gerçək kimliyi ilə maraqlanmamalıdır. digər yazarları yalnız fikri kimlikləri ilə tanımalı, fikir alışverişi etməli, doğru gördüklərini mənimsəyib, səhv gördüklərini düzəltməlidir. utanmamalıdır, qorxusuz olmalıdır.

sözlük yazarı, gündəmi izləməli və buna uyğun olaraq ya da sadəcə mübahisə etməyi bilməlidir. səhfini qəbul etməli, bilmədiyi mövzunu yazmamalıdır.

və sonda, sözlük yazarının fərqli olmaq kimi bir dərdi olmamalıdır. özü olmalıdır. fərqli olmağa çalışan sözlük yazarının, beynində qurduğu kimlik kompleksini heç bir anonimlik aradan götürə bilməz. öncə anonimliyi öz zehnində gerçəkləşdirməlidir. sözlük yazarı anonim qalmalıdır.