3. azərbaycancaya "cənnətdə bir iblis" kimi tərcümə olunan henry millerin bu romanını cəmi 1 günə oxuyub bitirdim. bunun bir səbəbi həcminin çox olmaması ( 150 səhifə) idisi, digər bir səbəb olduqca maraqlı və axıcı dildə yazılması idi. roman deyilənə görə yazıçının digər əsərlərindən özünün dilinə görə xüsusilə seçilir. belə demək mümkünsə, çox vulqar və kobud üslubu olan henry millerin ən "tərbiyəli" romanıdır. amma ən "tərbiyəli" bu romanında belə kifayət qədər vulqar ifadələrdən istifadə olunub. sevindirici hal budur ki, tərcüməçi və nəşriyyat aztv variantına getməyərək bu ifadələri olduğu kimi ( yazıçı necə nəzərdə tutubsa, elə) tərcümə edib.

əsərin məzmununa gəldikdə, baş qəhrəman konrad morikan astroloqdur, olduqca səliqəli və intellektli insandır, gözəl nitq qabiliyyəti var. amma böyük bir eybi var: o daim onun - bunun hesabına yaşayır. onu əsərin digər bir qəhrəmanı miller ( yazıçı elə özünü nəzərdə tutur) ilə tanış edən insan belə morikandan bezib bir daha ona baş çəkmir və belə demək mümkünsə, bu morikan bəlasını atır millerin üstünə. və millerin bəlalı günləri başlayır. o öz ailəsi ilə birgə onu saxlamağa başlayır. bu onun mülayim və səxavətli təbiətindən irəli gəlir. xəstə və işləməyən (daha doğrusu, işləmək istəməyən) morikanı çölə atmağa qıymır. dostlarının təkidlərinə rəğmən onu saxlamaqda davam edir.amma sonra... sonrası gözlənilməz ( həm də morikanın iblis xasiyyətinə görə gözlənilən) olur.

cənnət ifadəsi morikana millerin yaratdığı həyatı, ona çəkdiyi əziyyətləri, etdiyi fədakarlıqları, iblis isə morikanın şeytani xarakterini təsvir etmək üçün istifadə edilib. əsərin adının "cənnətdə bir iblis" olması bundan irəli gəlir.

oxunulmalı maraqlı romandır. əsərdən bəzi cümlələr:

"bizi çətinliyə soxan intellektimizdir. ağlımız deyil. o ağlımız ki, ehtiyacımız olan tək şey odur".

"kainatımızla bağlı məni maraqlandıran, mənə onun tanrısal və bütün bilgilərdən yüksəkdə olduğunu dərk etdirən tək şey onun özünü bütün interpretasiyalara açıq buraxmasıdır. barəsində gəldiyimiz bütün nəticələr eyni vaxtda həm doğru, həm yanlışdır. o özündə bizim həqiqətlərimizi və xətalarımızı ehtiva edir. və kainat haqqında nə düşünsək də bu onu heç bir formada dəyişməz".

"dünyada yanlış olan bir şey yoxdur. yanlış olan dünyaya baxış tərzimizdir".