1. antivirus proqram vasitələri kompüter viruslarının neytrallaşdırılmasını və kompüterin diaqnostikasını təmin edir. verilənləri məhv olmaqdan qorumaq, kompüter viruslarını tapmaq və silmək üçün nəzərdə tutulan proqramlar antivirus proqramları adlanır. antivirus proqramları funksiyalarından asılı olaraq aşağıdakı tiplərə bölünür:

- filtr proqramlar;
- detektor proqramlar;
- proqram-həkim;
- müfəttiş proqramlar;
- immunizatorlar və ya vaksinlər.

filtr proqramlar - rezident proqram olmaqla, təhlükəli əməliyyatlara nəzarət edir. bu əməliyyatlara aşağıdakılar aiddir:
- icra olunan proqram fayllarının dəyişməsi;
- rezident proqramların yerləşdirilməsi;
- mütləq ünvana görə diskə birbaşa yazmaq;
- diskin yükləyici sektoruna yazmaq;
- diskin formatlaşdırılması.

filtr proqramların əsas üstünlüyü ondan ibarətdir ki, onlar təhlükəli əməliyyatları daim izləyir və virusların yayılmamışdan əvvəl tapılması ehtimalını yüksəldir. bu proqrama antiviral toolkit pro monitor-u misal göstərmək olar.

detektor proqramlar əməli yaddaşda və xarici qurğularda yalnız onlara məlum virusların axtarışını təmin edir və onları tapır.

həkim proqramlar virusların aşkar edilməsinə və zərərsizləşdirilməsinə imkan verir. bu antiviruslara çox geniş yayılmış nod32, avast, avira, panda, kaspersky, doctor web, dr.solomon, norton antivirus, bitdefender proqramları aiddir.

müfəttiş proqramlar kataloqların, proqramların, faylların və sistem sahələrinin məzmununu yadda saxlamaqla, dövri olaraq, cari vəziyyətlə ilkin vəziyyəti müqayisə edir. müqayisə bir çox parametrlərə görə yerinə yetirilə bilər. müfəttişin üstünlüyü ondadır ki, o, proqramda dəyişiklik edən virusları tapmaq xüsusiyyətinə malikdir. müfəttişə misal olaraq məlum adinf proqramını göstərmək olar.

immunizatorlar - rezident proqram olmaqla, bir çox virusları vaksinləşdirmə yolu ilə yoluxmanın qarşısını alır. vaksinləşdirmənin mahiyyəti ondar ibarətdir ki, proqram və ya diskin modifikasiyasında proqramın normal yerinə yetirilməsi əks olunmur. eyni zamanda viruslar onu yoluxmuş kimi qəbul edir və ona görə də yayılmaya təkid etmir. bu proqramların çatışmayan cəhəti çoxlu sayda müxtəlif viruslara yoluxmanın qarşısını almaq imkanlarının məhdudluğudur.

(bax: xidməti proqramlar)