9. bu il üçün məzuniyyətimin 5 gününü keçirdiyim şəhər. batumiyə maşınla getdim. yol maşınla çox uzaqdı. hardasa, 13-15 saat ən azı sürmək lazımdı. gürcüstan tərəfə keçəndən sonra, yolların keyfiyyətindəki fərqi görüb azərbaycana min şükür etdim. gürcüstanda yollarda radar rastıma çıxmadı, yol polislərini də nadir görmək olar. nəzarət zəif olduğundan gürcülər maşını sürətli idarə edirlər. batumiyə gedən yolun hardasa 100 km-lik bir hissəsi dağlıq hissələrdən keçir. enişli-yoxuşlu olduğundan sürət həddi aşağıdır. bu hissədən keçmək adamı dəhşətli yorur. batumiyə çatmamış kobuleti şəhərindən də keçdim. bu şəhər də qəşəngdir. dəniz qırağındadır. burda istirahət etməyə dəyər. nəysə, nəhayət gəldim çıxdım batumiyə. saat 18:30 idi. özümlə dollar gətirdiyimdən lariyə dəyişmək lazım idi. təbii ki, banklar bağlı olduğundan üz tutdum valyutadəyişmə məntəqəsinə. məntəqənin işçisi təzə gəldiyimi və birinci dəfə şəhərdə olduğumu hiss edib 100 dollar üçün cəmi 203 lari təqdim etdi, qəbul etmədim, qonşuluqdakı məntəqədə 231 lariyə dəyişdirib çıxanda gördüm maşının başının üstün polislər kəsdirib. qəfil bakı yadıma düşdü. nəysə, bunlar məni səhv park etdiyimə görə 10 lari cərimə etdilər. minnət də qoydular ki, əslində cərimə 30 laridi, qonaqsan deyə hörmət edirik. navigatoru qoşdum gedəcəyim otelə. batumidə yollar dar, maşınlar sezonda çox olduğundan dəhşət tıxac var idi. birtəhər çatdım otelə. batumiyə gəlişim belə... şəhərdə ən xoşladığım yerlər bulvarı və botanika bağı oldu. bulvar çimərliklə qonşudur. bulvarı axşam gəzmək məsləhətdir. uzunluğu 7 km-dir. velosipeddən də istifadə edə bilərsiniz. botanika bağı şəhərdən 10 km uzaqlıqda, dağın başında bir yerdədir. bağın 300 metrliyinə kimi maşınla getməyə icazə verilir. bağda qəribə saysız-hesabsız bitkilər, bulaqlar var. bağa giriş bir nəfər üçün 8 laridir. bütün ərazisini piyada gəzmək üçün ən azı 5-6 saata ehtiyac var. içərisində xüsusi turist avtobusları da var ki, onlar da gəzdirə bilər. bağdan batumiyə və qara dənizə möhtəşəm mənzərə açılır. avropa meydanı, medea meydanı ən gözəl yerləridir şəhərdə. şəhərin içi gün boyu tıxac olduğundan imkan daxilində bulvar boyu olan yoldan istifadə edə bilərsiniz. yenə biraz abırlı yol oradır. maşınızdan muğayat olun. batumidə əzilməmiş maşın sürənə pis baxırlar deyəsən. parking problem deyil. harda ki, maşınlar kütləvi saxlayıb, siz də yer tapıb saxlaya bilərsiniz. ödənişsiz, bakıdan fərqli olaraq. bilmirəm nədəndisə, mən demək olar ki, azərbaycan qeydiyyatlı maşınlara rast gəlmədim. ola bilsin ki, devalvasiyalara görədir. şəhər əhalisi demək olar ingiliscə bilmir. rusca da çox az. əsasən yaşlı orta yaşlı nəsil danışa bilir. nəysə, yekun olaraq, bu şəhər qarşıdakı 5-10 ildə cənubi qafqazın ən gözəl şəhəri olacaq. şəhərin hər yerində güclü təmir-yenidənqurma işləri gedir. gürcülər doğru yoldadır.