213. yalnızlıq; nədir bu? yanında heç kimin olmaması? zəng edəcək və ya danışacaq kimsənin olmaması? dostunun və ya sevgilinin olmaması? səni önəmsəyən kimsənin olmaması? sevindiyində, sevincini paylaşaq kimsənin olmaması? sənə dəstək olan, çətin günündə yanında olan kimsənin olmaması? bəli, insan yaradılışı etibarilə sosiallaşmağa, cəmiyyətə qarışmağa can atır. *12 angry men* filmində deyildiyi kimi: "bəylər, bir heç olmaq çox üzücü bir şeydir, insanlar axtarılmaq, dinlənilmək, həyatta bir dəfə də olsa lazımlı bir insan olmaq istəyər."
həqiqətən də tək olmaq çətindir, xüsusilə əl-ələ gəzən cütlükləri, deyib gülən dostları gördükdə insan pis olur. "niyə mənim dostum və ya sevgilim yoxdur?" deyirsən. insanı səmimi qəlbdən dəyər verəcək, önəmsəyəcək, dinləyəcək bir dostun və ya sənə sevgi ilə baxan, aşiq olan, 14 fevralda, 8 martda hədiyyə ala biləcəyin sevgilinin olmaması üzücüdür.
heç vaxt dostum olmayıb, sadəcə bir neçə müəyyən müddətliyə yoldaşım olub. o da adı üstündə, sadəcə yoldaş olub. müəyyən müddətdən sonra yazsam da yola verdiyindən sonra mən də yazmadım beləcə yoldaşlığımız bitdi. əlbəttə ki, heç dostumun və ya sevgilimin (yazarkən belə gülməyim gəlir sevgilim olması fikri) olmamasında əsas günahkar özüməm. bütün günü kompyuter arxasında film izləyərək, oyun oynayaraq, araşdırma apararaq keçirmək əlbəttə ki, sosial münasibətlərə zərbə vurur. həftələrlə bayıra çıxmamağım yadıma gəlir, sonra məcburən bayıra çıxanda atamın dediyi: "evi tikilmişin oğlu, o qədər evdə oturmusan ki, normal yerimək yadından çıxıb," bu cümləni xatırlayıram. və təbii ki, bədən də formdan düşür, bel əyilir onsuzda çirkin olan sifət daha pis görünür. normal insanın danışacağı mövzulardan kənarda qalırsan, "qəribə" birisi olursan. birisi ilə danışacağın mövzu ya elmi, ya da tarixi olar ən çox, və ya siyasi, izlədiyin filmdən danışarsan, amma belə mövzuları insanlar çox vaxt müzakirə eləmək istəməz, onlar daha adi, sıradan mövzuları istəyir. ruzveltin üç dəfə seçilən yeganə prezident olmasını və ya vyetnam müharibəsi kimi mövzuları yox daha sıradan mövzuları, sıxıcı birisindən yox, daha həyat dolu birisindən dinləmək istəyər. həyat dolu birisi necə olunar? bilmirəm, tiplə əlaqəli bir şey deyil, amma insanlar daha çox xarici görünüşə önəm verər, sosial olmaqla həyat dolu, axtarılan birisi olmaq olar amma sosial olmaq üçün də göz-oxşayan xarici görünüş, danışıq qabiliyyəti, səs tonu vs kimi şeylər lazımdır.
sosial olmaq, axtarılan olmaq, sevilmək, sevmək gözəl şeylərdir. hər insan istəyər, amma düşünsəniz, insan hər istədiyini əldə edə bilməz. əlbəttə ki, insan çalışsa çox şeyi əldə edə bilər. amma bəzən insanın bəzi keyfiyyətləri çox qapını bağlayar. çirkin adamın gözəl sevgilisinin olmaması kimi. heç kim çirkin insandan "yunan mifologiyasında tanrılar"ı dinləmək istəməz. çirkin adam danışsa belə onu yola verərlər. digər yaraşıqlı insanın "dünən uni'dəki qızla söhbətim vaxtı" kimi bayat hekayəsini isə maraqla dinləyərlər. çirkin adama "qəribə" damğası vurarlar. mən də "qəribə"yəm bilirəm, və "qəribə" olmağı tam olaraq sözlə izah edə bilmərəm. whatsapp işlətmirsənsə, instagram'da şəkil paylaşmağa çəkinirsənsə, ictimai yerlərdən qaçırsansa deməli kimlərəsə görə sən "qəribə"sən.
amma bütün bunlar o demək deyil ki, həyatdan küsməli öz dərdinə üzülməlisən; düşünsən, araşdırsan görərsən ki, küçədə yatan insanlar var. *the blind side* filminə baxsan, evi, ailəsi olmayanları, məhv olmuş həyatlar, insanlar görərsən. şükr etməyini demirəm, çünki həmişə müəyyən insanlar olacaq ki, həyatları məhv olacaq, evsiz qalacaq, ac yatacaq; hər birimiz bu təhlükələrlə qarşılaşa bilərik. amma o problemlərə baxanda, səncə də yalnızlıq bəsit kimi gəlmədi? və son olaraq, *up in the air* filmində deyildiyi kimi: "insan doğulanda da təkbaşına doğulur, öləndə də təkbaşına ölür." hər gün *friends*'in bir iki bölümünü seyr edirəm, və artıq chandler, joey, ross, monica, phoebe, rachel mənim dostlarım da olublar. onlarla gülürəm, sevinirəm, ağlayıram. başqa kiməsə ehtiyacım yoxdur. yaxşı olardı ki, *baked in brooklyn* filmindəki kate (daddario) kimi sevgilim olsun və mənə: "l really care about you" desin. lakin olmayanda olmur. "ugly guy and hot girl" sadəcə filmlərdə olur.
fikir verməyin, həyatınızı yaşayın. fiziki olaraq yalnız ola bilərsiniz amma öz aləminizdə siz dünyanın ən sosial adamı da ola bilərsiniz. öz dünyanızı yaradın. orada gözəl sevgiliniz, sizə dəyər verən dostlarınız ola bilər. insan beyni çox şeyə qadirdir. "you might be poor, your shoes might be broken, but your mind is a palace.”.