türklərin sevilməyən cəhətləri

intercultural communication dərsində xalqlara qarşı olan stereotiplərdən danışırdı mühazirəçi. qrupdakı tələbələrin milliyyəti barədə digər millətlərə mənsub tələbələrdən "filan millət deyəndə ağlınıza nə gəlir?" soruşdu. belə məlum oldu ki, haqqında ən çox stereotip olan amerikalılar, ruslar və təəssüf ki, türklərdi. hər şey bir kənara qazaxıstanlı bir qız suala "saçı çoxlu jelelənmiş oğlanlar" şəklində cavab vermişdi. bu cavabla abu-hava biraz yumşalmışdı. yoxsa türkiyəli qrup yoldaşım ərəbləri xoş olmayan sözlərə görə döyəcəkdi az qala ki, sizə o qədər yardım etmişik osmanlıdan bu yana.

tələbə evlərinə xas hadisələr

tələbə evində corabla bağlı yaşanmış bir hadisəni biraz şişirtmələrlə qeyd edirəm.

növbəli əkin sistemi üsulu corablara tətbiq olunur. belə ki, dincə qoyulmuş corab yoxlanır, kəskin qoxu biraz azalıbsa həmin corab yenidən geyinilir. bu hadisə tələbənin hüceyrələrinin bir parçası olaraq corabın yoxa çıxması və ya qana qarışması ilə də, ayağını ayaqqabıdan çıxararkən corabın orada qalıb bundan sonra ayaqqabının bir parçası olacağını bəyan etməsi ilə də nəticələnə bilər. həmin andan sonra yeni corab axtarışları tələbəni divanın, soyuducunun, televizorun, şkafın altına baxmağa vadar edər. bəlkə də yarım corab tapar mətbəxdəki qab-qacaq şkafından, amma yenə də 1,5 coraba ehtiyacı var. qalan 0,5 corabı da otaq yoldaşlarının köməyi ilə tapıb düzəldər. lakin hələ də 1 corab çatışmamaqdadır. son ümid yeri olaraq baxdığı şkafın üst bölümündə gözünə 1 corab sataşar. həmin corab ki, indi yaşadığı evə köçərkən torbaların ağzını bağlamağa ip tapmadığı üçün ondan istifadə etmişdi. tələbənin gözlərinə işıq gələr. dollarla ödəməli olduğu kredit borcu silinmiş vətəndaş kimi özünü xoşbəxt hiss edər. hər kəs kövrələr, ancaq axan yalnızca sevinc göz yaşlarıdır.

sözlük niklərinə görə peşə təxminləri

müqəddəs - pirdə nəzir qutularına nəzarət edən şəxs,
oberşturmbanfürer - nasist hərbçi,
oturmuşdumdivanda - embawoodda satış üzrə ekspert,
qalaxsi es dört - apple şirkətində siri,
bakirfikir - əxlaqsız yuva sahibi, sahibkar.

2016-cı il azərbaycanda ehtimal olunan hadisələr

böhranın bu şəkildə yüksələn xətt ilə gedəcəyi aydın məsələdir. lakin böhrandan sonra azərbaycanı nə gözləyir. təqribi 2 variant ola bilər, məncə.
1. qarabağ müharibəsi yenidən başlayar, ətraf rayonlar laçın istisna "azad olunar" və azərbaycan iqtisadi vəziyyətini sabitləşdirmək adı ilə avrasiya ittifaqına qoşular. qarabağın statusu barədə yenidən uzunmüddətli danışıqlar başlayar.
2. azərbaycanda xalq hərəkatı başlayar
2.1 - (həmin qarışıqlıqda qarabağ müharibəsi də yenidən başlaya bilər xalqı başqa məqsədə fokuslandırmaq üçün), hakimiyyət dəyişikliyi baş verər, azərbaycan avropa yönümlü və ya iran yönümlü siyasət kursu tutar (bu, hakimiyyətə yeni gələcək olanın yönümündən asılıdır).
2.2 - ondan sonra hər şey ola bilər.

xaricdə təhsil almış azərbaycanlı

ilk entry-dən belə nəticəyə gəlmək olur ki, xaricdə təhsil almış azərbaycanlı ego səviyyəsi yüksək olan şəxsdir, qeyri nəsə mümkün deyil. ya ağ olmalısan ya qara deyilən bir şey yoxdur. niyə insanları belə ümumiləşdirmələrlə ittiham edirsiz, qadanızı alım. hissə-hissə yazacam ki, tam aydın olsun.

1. mədəniyyət bir insanda ya var ya yoxdu. onu avropada və ya antarktidada öyrətmirlər ki, gedib gələndən sonra "mən avropa görmüşəm", "mən xaricdə təhsil almışam" deyib daha mədəni olduğunu iddia edəsən. belə bir iddia irəli sürmək zatən mədəniyyətsizlikdir.

2. qədim zamanlardan bəri fransaya, qoriyə və başqa yerlərə tələbə göndərilibsə, bu o demək deyil ki, azərbaycandakılar "ver yeyim, ört yatım" rejimində "xaricdə təhsil alanlar barmaqlara çarə tapsın" düşüncəsində olmalıdı. azərbaycan qarşısında hamının öhdəliyi var.

3. öz hesabına gedən də əgər atası oliqarx deyilsə boğazından kəsib göndərir ki, övladı təhsil görsün. dövlət hesabına gedən də bir çox hallarda rüşvət verir ki, eyni səbəblə övladı yüksək təhsilə yiyələnsin.

4. şans ayrı anlayışdır, imtiyaz ayrı. hər ikisi ola bilməz. ya şans olmalıdır, ya da imtiyaz.

5. kiməsə puluna və ya vəzifəsinə görə həddən artıq hörmət olunursa, savadına görə hörmət olunması daha yaxşıdır bir cəmiyyət üçün. amma ümumiyyətlə həddən artıq hörmət müsbət bir anlayış deyil.

6. nəhayətdə hər hansı bir mənfi təcrübəyə görə ümumiləşdirmə aparıb bütün xaricdə təhsil almış azərbaycanlılara "düdük" demək də manqurtluqdu həmin məntiqə söykənəndə.