ikinci qarabağ müharibəsi

indiyə kimi qonşumuz ermənistanı necə yanlış dəyərləndirdiyimizi mənə bir daha sübut edən müharibə.  30 ildir dərsliklərdə, mediada, filmlərdə falan hiyləgər, yaltaq, qorxaq təbiətli bir xalq kimi tanıtdırıblar bizə.  erməniləri bu cür görməyimiz bizə onları başa düşməyə mane olur və potensial fəlakətlərə gətirib çıxara bilər.  danılmaz faktdır ki, əksər erməni başlarına soyqırım gəldiyinə tam qəlblə inanır və bu ruhda böyüdülüb.  nəticədə dağlıq qarabağa müstəqillik istəyəndə də, azərbaycan torpaqlarını işğal edəndə də, israildən səfirini geri çağıranda da sağ qalmaq uğrunda mübarizə apardığını düşünür. Sanki azərbaycan qarabağı geri alsa, ermənilər yer üzündən silinəcək mk. Kənardan gülünc səslənir, adama deyərlər, sən gəlib bizim torpaqlarımıza qonmusan, işğalçı sənsən. indi geri almaqla məşğuluq. Ancaq erməni onu varlığına təhdid kimi görür. Türkiyə deyəndə lap qorxuları qatlanır.
indi erməni qorxaqdır deyəndə biz onu səhv başa düşmüşük. Bəli hər şeyə sağ qalmaq ya məhv olub getmək prizmasından baxırlar. Ancaq bu erməni əsgərinin daha da əzmlə dirəşəcəyinə işarə olmalı idi.  Mən öz döyüşçülərimiz yetərincə şücaət göstərmir demirəm. O ərazidə məncə heç bir ordu blitzkrieg edə bilməz. Böyük dövlətlərin əfqanıstanda yaşadıqlarına baxın. Rusiyanın Çeçenistandakı problemlərini yada salın. ya da təsəvvür edin 3-3,5km yüksəklikdə ağır yüklə sizə nişan alan düşmənə tərəf qaçırsınız.  Ora çatanda bir döyüşmək də var. Azərbaycan ordusu məncə ilk günlərdə bunu yoxladı və sonra taktika dəyişdirdi. indi attrition war gedir və hər şey bizim xeyrimizə işləyir. Uğurlar da yavaş yavaş böyüyəcək. Məncə heç hələ dünya dövlətlərinin cızdığı qırmızı xətti keçməyimizə çox var.
bir başqa məsələ isə hiyləgərlik məsələsidir. Bundan ehtiyat etməliyik. Kimsə dünyada ən təhlükəli, ən qəddar canlının haqlı olduğuna tam inanan insan olduğunu demişdi.  ermənilər sağ qalmaq üçün vuruşduqlarını düşünürlər və buna görə qələbəyə aparan hər cürə vasitəyə əl atmağa hazır olacaqlar.  bu gün bir videoda baxıram necə mülki geyimli şəxslər əsgərlərə artilleriyanı idarə etməkdə kömək edirlər. bir fərd olaraq fikirləşmək olar ki, cəsur bir addımdır. ancaq qəsd olunan azərbaycanın imicini dünyada pozmaqdır. o mövqe vurulanda, azərbaycan mülki şəxsləri vurdu deyəcəklər. və ya ekstremal hallarda öz əhalilərinə qarşı zorakılıq edib, azərbaycan doğurdan soyqırım istəyir də deyə bilərlər.
Nəysə çox uzun yazdım.  Sözümün canı odur ki, məncə bir xalq olaraq işə daha professional yanaşmaq lazımdır.  Empatiya göstərib ermənilərin nəyə görə bu qədər qorxduqlarını başa düşsək, məncə növbəti konfliktləri daha az problemlə həll edə bilərik.  Əgər bu torpaqlara nə vaxtsa sülh gəlsə, ermənistanın bu qorxusunu sağaltmağa çalışmaq lazımdır.
özünüzə yaxşı baxın, əzizlərim.  bütün bunlar vecimə olmaz deyirdim, ancaq yanılırmışam. biraz da utanıram bundan. hər iki mənada.

sovet ittifaqı

saf insan yetişdirmək üçün yaradılan cizgi filmlərə sahib ittifaq.
mənim vecimə deyil onlar bunu pis niyyətlə edirdilər yoxsa yox. Sovet erasından çıxan cizgi filmlər saf, dürüst fərd yetişdirmək üçün yaradılıb. Korodil genanın, "təəssüf ki ad günü ildə bir dəfə olur", "hamı ən yaxşısına ümid edir" cümlələri ümid edirəm sadəcə mənə təsir etmir.
Bundan başqa qərbin "yaxşı" tərəflərini əhaliyə göstərmə cəhdləri: bremen musiqiçiləri, mariya gopkins və s. təəssüf ki, sadəcə biz haqlıyıq ideologiyası sona qədər yaxşı ola bilməz.
ancaq yenə də, yaxşı insan yetişdirməyi daha yaxşı bacaran bir sistem idi. təəssüf, çox təəssüf ki, bu tip sistemi qura bilmədik. ona görə yox ki, sistem pisdir. ona görə ki, biz buna layiq deyilik. biz bu saflığa layiq deyilik.

(youtube: )

azərbaycan dilində danışmaq məcburiyyəti

mülki şəxslər üçün mövcud olmayan məcburiyyətdir. hər kəs öz istədiyi dildə danışar, heç kimin buna qarışmaq haqqı yoxdur. danışılan dili başa düşmürsənsə, sadəcə üzünü çevirib gedirsən. azərbaycan bir çox millətli ölkədir və buna görə də burda millətçiliyin, yerlibazlığın lüzumu yoxdur. çox dil bilmək əla şeydir. ingilis dili bildiyiniz halda, azərbaycan dili bilməyən bir xariciyə burun büzmək mədəniyyətsizliyinizi göstərir, ölkənizi sevdiyinizi yox. və ya küçədə 10 nəfər azərbaycanlı, ərəb, ingilis, türk istər azərbaycanca danışarlar, istər ingiliscə, istər yəhudicə, istərsə də rusca, heç kimin qınamağa haqqı yoxdur. dünya o boyda müharibə uddu ki, millətçiliyin nə qədər düşük bir şey olduğunu sübut etsin. əl çəkin artıq bundan.

meditasiya

tərifi artıq verildiyi kimi beyni lazımsız düşüncələrdən təmizləmək məşğuliyyətidir. body scan deyilənini bir müddət yoxladım. növbə ilə diqqətinizi bədəninizin müxtəlif hissələrinə yönəldirsiniz. müəyyən sıra ilə. başdan ayağa doğru. başdakı qaşıntılar, sinədəki sıxıntı, dizlərdəki qaşıntı, yorğunluq və s. sadəcə gələcəklə bağlı qayğılardan ibarət deyilsiniz, yadınıza salır. pis deyildi. bədəninizin xırda nöqtələrində nə qədər hissiyat olduğunu yoxlamadan təsəvvür edə bilməzsiniz. ancaq ən effektlisi qorxduğum ölüm növünü təsəvvür etməkdən daha effektli deyildir. bəlkə də gördüyüm ilk ölüm videosudur, uşaq vaxtı kimsə çeçen mücahidlərinin rus əsgərlərinin başını kəsmə videosunu göstərmişdi mənə. əsgərin qışqırması, qışqırığın boğulma səsinə keçməsi falan xırda detallarına qədər yadımdadır. bu barədə düşünürəm tez-tez. deyirəm, bəlkə nə vaxtsa intihar etsəm, bəlkə boğazımı kəsərəm. son bir emosional partlayış yaşamaq ümidi ilə. ancaq çox qorxuram, yəqin ki etməyəcəm. ölmək üzrə olan canlıların necə ehtirasla nəfəs almaqları mənə həmişə təsir edib. nəfəs almaq əslində çox gözəldir. bəlkə də ən gözəl zövqdür. sadəcə çox pis öyrəşmişik, adi gəlir. biranlıq nəfəs ala bilməmək təhlükəsi bunun nə qədər gözəl olduğunu yadımıza salır sanki. bu barədə artıq yazmışdım deyəsən. özünüzə yaxşı baxın, dostlar.

qızların alicənab yerinə avara adam seçməsi

əvvəla təkcə qadınlara aid olan xüsusiyyət deyildir. bənzəri üçün (baxma: madonna whore complex).
ikincisi də ki, belə şeylərin adama qoyması da başa düşüləndir. nəinki qarşı cinsə elə həmin şəxsin özünə də. şəxsən mən qibtə etdiyim qadınlara qarşı çox çətinliklə seksual hisslər bəsləyə bilirəm. hərdən baxıram ki, qadın gözəldir, xasiyyəti problemli deyil. yataqda da narazılığım yoxdur. bu insanla mənim xoşbəxt olmağım üçün heç bir əngəl görmürəm. di gəl ki, xarici görünüşündən asılı olmayaraq ünsiyyətdə daha seksual davranan qadınlara qarşı daha çox şəhvət hissi keçirdirəm. mənim qibtə etdiyim qadınları seksual cəhətdən cazibədar sayan dostlarıma paxıllığım tutur. adamlar ya özlərini yaxşı idarə edirlər, ya da məndə çatışmayan nəsə var.
bir də bunun daha ekstrem versiyası üçün:
ölümə və ya ömürlük həbsə məhkum olunmuş cinayətkarları ziyarət edib bilərək onlardan hamilə qalan qadınları göstərmək olar.
(bax: ted bundy)

evlənməlik kişi ixtisası

(bax: həkim)

yazarların sərxoşkən elədiyi umbaylıqlar

bakalavr işimi təzə təhvil vermişdim. dostlarımla razılaşdıq ki, bunu qeyd edək. bir dostum içində qızıl qırıntıları olan araq almışdı. dediyinə görə həqiqi qızıl idi. planımız içib, lord tywin kimi qızıl sıçmaq idi. bir başqa dostum da köhnə sənədlərini falan yandırmaq eşqinə düşmüşdü. nəysə razılaşdıq ki, manqal başına yığışaq, bir litr arağı 3 nəfərə bitirək. alkaşlığa təzə başlayanlar üçün deyim, bu içməyin ən yaxşı formasıdır. bir litr araqdan sonra vəziyyətiniz güldür, ancaq qusacaq, blackout olacaq qədər yox. sadəcə kefiniz kökdür. və sadəcə araq içmisinizsə, növbəti gün hangover olmayacaq. ancaq heç də hər şey planladığımız kimi getmədi. bir neçə rumkadan sonra bir dostum tumanına qədər soyunub çəmənlikdə dəli kimi qaçmağa başladı. özü də çiskinli havada. biz də dedik, eybi yox, qalanını iki nəfərə içərik. şüşə bitdikdən sonra ən-ənəvi olaraq dönər yeməyə gedəcəkdik. ancaq gecə saat 2-də dönər yeməyə getmək kifayət qədər çılğın deyil deyə, velosiped oğurlayıb elə getmək qərarına gəldik. haqqına mən öz velosipedimi götürdüm. bu iki dostum, yataqxananın velosiped parkından iki açıq velosiped tapıb çıxardılar. içkili vəziyyətdə təkərlərə hava vurmuşuq, velosipedləri qaydasına salmışıq və s. getdik dönərimizi, ayranımızı yedik. qayıdanda çılpaq gəzməyi xoşlayan dostum dedi ki, bu kifayət qədər çılğın deyildi, gəlin geriyə yolu çılpaq sürək velosipedi. beləliklə 3 bığı burma kişi yarı çılpaq gecə saat 4də berlin küçələrində velosiped sürə-sürə evə qayıtmışıq. ideyanın müəllifi təbii ki, yenə də tumanına qədər soyunmuş, paltarlarını çalma şəklində başına bağlamışdı. yaxşı ki, velosipedləri gətirib yerlərinə qoydular. ancaq təkərlərdəki havanı da təzədən boşaltdılar ki, bəs belə tapmışdıq.

yazarların sərxoşkən elədiyi umbaylıqlar

yataqxanada beer pong turniri keçirdirdik. mən də pivə içən deyiləm. araq, likör küpünə girirəm, ancaq pivə 4-5 dənədən artıq getmir. nəysə sözümün canı mən bu turnirin təşkilatçılarındanam, oynamıram. Bununla belə bütün gün boyu barın arxasında dayanmadan içirəm. nəysə turnirin sonuna yaxın, hamı kimi mən də lülüş olmuşam. necəsə olub o vəziyyətdə bir xanımla tapışmışıq. o da içkili, mən lülüş aramız zordu başa düşdüyünüz. nəysə biz tənha bir yerə gedək adı ilə qızın otağına getdik. nə elədiyimiz yadımda deyil. tamamilə blackout keçirmişəm. birdən gecənin yarısı panika ilə yerimdən dik atıldım ki, bəs bütün hər şeyi çöldə qoymuşam, nə bilim kassanı bağlamaq, barı yığışdırmaq lazımdır zad. elə şalvarı əynimə geyindim qaçdım çölə, qapı bağlananda fərqinə vardım ki, əynimdə nə mayka var, nə ayaqqabı nə də açarlarımı götürmüşəm. adama deyərlər qapını döy qız açsın götür zir-zibilini də. amma yox kişinin oğlu qızı narahat edib oyatmaq istəmir, nice guy olub başımıza. bizim yataqxananın qapıları da əgər kilidli deyillərsə, bir plastik kartla rahat açılır. yadıma düşdü ki, həmin gün bir nəfər də çöldə qalmışdı, onunçün bir plastiklə qapısını açmışdım. yarı çılpaq qaçmışam çəmənliyə plastik axtarıram. gördüm bizim avaralar hələ də içib oynayırlar orda hələlik fəlakət baş verməyib yəni. plastiki tapdım, qayıtmışam qızın otağına, indi də hansı otaq olduğunu xatırlamıram. içkili vəziyyətdə iki səhv qapını açdım. bəxdimdən kimsə çıxıb ağzımı burnumu dağıtmadı ki, gecə vaxtı otağıma girməklə nə edirdin. üçüncü qapıda anladım ki, bu ağıllı fikir deyil. bir təhər gedib poçt qutularında qızın adını axtarmışam ki, bəlkə otağının nömrəsini tapdım. bəxtimdən tapa bildim, əşyalarımı götürə bildim. ancaq yenə də qızı oyatmadım. bir neçə gün sonra qıza yazdım, təxmin etdiyiniz kimi də, cavab vermədi. sonra gördüm sevgilisi var imiş. xoşum gəlmişdi ancaq cividən.
sabahsı gün dostlarıma başıma gələnləri danışıram, bu vaxtı da yataqxananın müdriyyəti yanımdan keçəndə eşitdi məni. turnirə onu da dəvət etmişdik, ailəvi gəlib əylənirdilər. yaxınlaşıb dedi, "qatıq, eşitdim ki, deyirsən ayaqqabısız çəmənlikdə plastik axtarırdın, ancaq inan mənə ayaqqabılarının olmamağı həmin gecə sənin ən kiçik problemin idi."

parcels

berlində yaşayan əslən avstraliyalı qrup. vikipediaya görə elektro-pop, disco-soul janrında yaradırlar. mən mahnılarında daft punk ab havası, funky ritmlər hiss etdiyim üçün vurulmuşam. məncə sizə də daft punk-ı xatırladacaq.

1. parcels - overnight:

(youtube: )

(youtube: )

(youtube: )

david goggins

1975-ci il təvəllüdlü amerikalı ultra marafonçu, guinness rekordsmeni, triatlet, məzuniyyətə çıxmış dəniz piyadası və s. adam yaşayan motivasiya mənbəyidir.
adamın xəyalı dəniz piyadası olmaq imiş. lakin 135kg çəki ilə məktəbə qəbul ola bilməyib. nəticədə adam 3 aydan da az bir vaxta 85kg qədər endirib çəkisini. Əfqanıstan və iraq müharibələrində iştirak edib. Daha öncə sadəcə bir dəfə normal marafon qaçmasına baxmayaraq, 2005-ci ildə ultra marafon qaçıb və 160km məsafəni 19 saata qət edib. bu nəticədən sonra bir neçə başqa ultra marafonda da iştirak edir və həmişə ilk yerləri tutur. 2006-cı ildə hawai triatlonunda iştirak edir. iştirakçılar 3 günə 515km məsafə qət etməli idilər. Goggins bu yarışda 420 km iki gün velosiped sürür, baxmayaraq ki, əvvəllər velosipedlə uzaq məsafə qət etməmişdi. Hə bu arada 515km yarışda 2-ci olaraq finişə çatır. növbəti iki il ərzində 14 ultra marafon və triatlonlarda iştirak edir. Hətta 48 saat dayanmadan 327.5km qaçaraq rekorda imza atır.
bundan başqa 24 saat ərzində ən çox turnikdə çəkinmə rekordunun da sahibi olmuşdur. manıs 17 saata 4030 dəfə çəkinib. düzü indi rekordu qırılıb artıq. ilk pull up rekord cəhdi, əli turnikdə paralandığı üçün uğursuz olub, internetdə şəkillərinə baxa bilərsiniz.
qərar verə bilmirəm bu adam fantaziyadır ya yox. indi motivasiya edici çıxışlar etməklə məşğuldur. ancaq deyir motivasiya natiqi ona verilən bir addır, özü bunu bəyənmir. bir də cant hurt me adlı kitabı da var.
təsadüfən joe roganın podcastında tapdım. dediklərinə inanmaq çox çətindir, ancaq belə də böyük yalan olmaz məncə. podcastda danışarkən, bütün o ultramarafondan sonra həkimlərin təsadüfən ürəyində anadan gəlmə deşik olduğunu tapmalarını deyəndə gözüm yaşardı. mən də ürək qüsuru ilə doğulmuşam. sanki "qatıq, bax bəhanən var idi ki, əlil adamsan, ancaq mən də əliləm və yenə də bunları bacardım" dedi mənə. Adam bir il ərzində iki əməliyyat keçirib sonra yenidən ultramarafonlara davam edib.
buyurun tərcümeyi halını özündən eşidin:

(youtube: )

joe rogan

amerikalı stand up-çı, keçmiş döyüş idmanları ustası, podcaster və ufc-nin kommentatorlarından biri. stand-uplarına baxmamışam, kommentasiyalarına sadəcə epizodik qulaq asmışam, zira mma izləməyi çox da xoşlamıram. ancaq bu adamın podcastlarını sevirəm. elon muskdan, neil degrasse tysondan tutmuş, jordan petersona və ya hansısa flat earthçu xiyara kimi hər tip adam joe roganın podcastına qonaq olur. joe hər tip adamla danışa bilmək bacarığına malikdir. sadə səslənir ancaq məncə heç də asan bir şey deyil, çox nadir bir özəllikdir. bu tip xasiyyət indiyə qədər heç kimdə görməmişəm. bilik səviyyəsi danışdığı alimlər, müxtəlif mütəxəsislərə çatmasa da çox yerində suallar verməyi bacarır. həmçinin adam dürüstlük etalonudur. buna görə də şəxsi qəhrəmanlarımdan biridir. ufc-nin işçisi olsa da ortada olan oyunları qəribə bir rahatlıqla deyir. adamın sağlam özgüvəni var. istər siyasi mövzu olsun, istər sə də idman, elm və s. heç bir kompleksi olmadan rahat aparır özünü.
arada qulaq asmağınız məsləhətdir, podcastları demək olan bütün uyğun platformalarda paylaşılır, youtube kanalı .
şəxsi favorilərim aşağıdakı həmsöhbətlərdir:
- jordan peterson
- sam harris
- neil degrasse tyson
- mike tyson, əsasən də qorxuya görə döyüşlərə nifrət etdiyini dediyi an. adam formada olduğu vaxtlar qarşısında heç kim dura bilmirdi. nadir tapıntı idi. ancaq həmişə qorxu ilə problemləri olmasını etiraf etməsi şəxsən gözümdə hörmətini artırdı.
- ben shapiro
- bill burr

selfish gene

richard dawkinsin 1976-cı ildə çap olunan kitabıdır. kitabın xülasəsi "genlərin eqoistcə özünü çoxaltma arzusu, adətən daşındıqları canlılarda eqoist davranışlara gətirib çıxarır" cümləsidir. Lakin bu heç də yeganə nəticə deyil. Bəzi altruist və empatik davranışlar da genlərin eqoistliyinə dayanır.
Müəllifin özünün gətirdiyi sadə bir misalı yazacam. Əvvəlcədən deyirəm, yazılan rəqəmlər həqiqətə çox da uyğun deyil və yanlışımı sonra düzəldəcəm. Ancaq nümunə olaraq mükəmməldir deyə bu fenomeni işlədirəm.
insanlar diploid canlılardır. yəni bədənimizdəki hüceyrələrdə xromosom sayı cütdür. cinsi birlikdəlik zamanı atanın xromosomlarının yarısı ilə, ananın xromosomlarının yarısı birləşir və yenidən bir cütlük əmələ gəlir. nəticədə sizin atanızın xromosomlarının yarısını daşıyırsınız, digər yarınız isə ananızın genlərinin yarısından gəlib. Nəticədə sizin atanıza olan "qohumluğunuz" 1/2-dir. eləcə də ananıza olan qohumluğunuz 1/2-dir. Bacı və qardaşlarınıza olan qohumluğunuz da 1/4-dir.
müəllif arıları misal çəkir. deyir ki, işçi arılar dişidirlər. onlar sonsuzdurlar və ilk baxışdan kraliça arı tərəfindən amansızca eqoistcəsinə istifadə olunurlar. belə ki, kraliça ancaq yeyir və doğur, işçilər isə ona qulluq edirlər. lakin arıların genetikasına yaxından nəzər salanda vəziyyət dəyişir. məsələ burasındadır ki, erkək arılar haploiddirlər, yəni sadəcə tək xromosomları olur. Bu o deməkdir ki, bir erkəyin uşaqları onun bütün genlərini daşıyır. kraliça diploid olduğu üçün uşaqlar onun xromosomlarının yarısını daşıyır. Nəticədə arı bacılar arasında qohumluq əmsalı 3/4-dür. işin maraqlı tərəfi kraliçanın öz uşaqlarına olan qohumluğu 1/2-dir. nəzərə alsaq ki, bütün genlər özlərini çoxaltmaq istəyirlər, onda işçi arılar əslində kraliçanı özlərinə bacı istehsal etmək üçün istifadə edirlər. Bir dişi arıya təkamül cəhətdən, balaya sahib olmaqdansa, bacıya sahib olmaq daha çox sərf edir. Çünki genləri onda daha çox kopyalanmış olacaq.
ilk baxışdan işçi arıların fədakarlığı altruizm kimi görünsə də, genetik olaraq bu davranış onlara sərfəlidir.
yuxarıda danışdığım səhv isə ondan ibarətdir ki, adətən kraliça bir yox bir neçə erkəyin yumurtalarını qəbul edir. nəticədə işçi arılar arasında qohumluq əlaqəsi aşağı düşür. ancaq yenə də normal ailədəki qohumluq əlaqələrindən yüksəkdir və kraliça ilə işçilər arasında bir təkamüli mübarizə mövcuddur ki, müəyyən stabil davranış qəlibinə gətirib çıxarır.

ayrılıq

əksər hallarda münasibətin sonudur. bəzən yenidən başlayanlar olur, ancaq bu hal çox nadirdir. incitməsi təbiidir. ən azından bir tərəfi. hərdən də ola bilər şərtlər uyğun olmur deyə ayrılırsınız və hər iki tərəfi incidir. biraz adama qoysa da, bununla da barışmaq lazımdır.
incitməsi nə qədər təbii olsa da, üstündə durulması bir o qədər qeyri təbiidir. qarşı tərəfi ilahiləşdirməyin mənası yoxdur. ki, əgər əl çəkə bilmirsinizsə, bilməyərəkdən ilahiləşdirirsiniz. bunun çox səbəbi ola bilər, ancaq ən böyüyü çatışmayan öz güvəndir məncə. insan özünə kifayət qədər dəyər vermir. nəticədə qarşı tərəf çox dəyərli gəlir. indi narsistlik edib qarşı tərəfi günahlandırmaq, onsuz da alınmayacaqdı, problemləri var idi falan demək sizə qısa müddətdə kömək etsə də problemin kökünü həll etməyəcək.
məncə düşünməkdə fayda var ki, hər kəs xoşbəxt olmaq istəyir. bu çox saf bir hissdir. bir insan əminliklə xoşbəxtliyi başqa yerdə görürsə, onu məcbur saxlamağın mənası yoxdur. sizin onu başqa cür inandırmağınız da mümkün deyil. bu hissin saflığını düşünün və mane olmayın. hər nə qədər sosial varlıq olsaq da, istər münasibətdə, istər hər hansı kollektivdə və s. həmişə təkik. hər insan doğulduğundan ölənə qədər xoşbəxt olmaq üçün can atır. nə vaxtsa xoşbəxt olacağına tam əminliklə inanır. bu yolda verilən qərarları heç kimin dəyişdirməyə haqqı yoxdur.
tək olmaq əslində o qədər də pis bir şey deyil. bu o deməkdir ki, insanı özündən başqa kənar heç kim xoşbəxt edə bilməz. bu isə hər insanın qarşısına öhdəlik qoyur, özün özünü xoşbəxt etməlisən. depressiv səslənir, ancaq yoxladıqda qəribə rahatlıq bəxş etdiyindən əminəm. həm bu düşüncəni bir alışqanlığa çevirsəniz, sağlam öz güvəninizi bərpa etmiş olarsınız.

insan

dünyanın ən yaxşı uzun məsafə qaçan canlısıdır. bəli-bəli düz eşitdiniz. atlardan, itlərdən daha yaxşı qaçırıq. beynimizdən başqa qaçış bacarığımız ən güclü özəlliyimizdir yəqin. bu özəllik nəinki digər primatlarda yoxdur, heç ilkin insan növlərində də olmayıb. sırf afrikanın savannalarında ortaya çıxan insan növləri ki, onlardan biri də homo sapiensdir, qaçmaq üçün ixtisaslaşıb. güclü yan əzələlər, dabanı baldır ilə birləşdirən elastik toxuma və ən əsası tərləmək bacarığı. bütün bunlar bizi planetimizin ən yaxşı qaçış ustaları edir. deyə bilərsiniz ki, başqa heyvanlar da tərləyir də. ancaq bizim qədər yox. ən yaxın rəqiblərimiz atlar * və bənzər heyvanlar və itlərdir. ancaq onlar bədənin temperaturunu aşağı salmaq üçün ləhləməyə məcburdurlar. bu isə nəfəs almağa mane olur. nəticədə bu heyvanlar bir müddətdən sonra sürətlərini azaltmağa məcburdurlar. bizdə isə bu baş vermir. bir it 10 dəqiqədən sonra sürətini azaltmağa başlayır. nəticədə onların uzun məsafəyə qaçış sürəti saniyədə 3.8-metrdən azdır. vaxtaşırı qaçan adam təxminən saniyədə 3.2-4.2 metr qaçır. yəni artıq iki km sonra iti geridə qoyur. vaxtaşırı qaçanlar da təsdiqləyər 2 km heçnədir. professional marafonçular saniyədə 6.5 metr qaçırlar. eləcə də at. uels-də bir yarış var, atlar insanlara qarşı. düzü indiyə kimi sadəcə iki dəfə insan qalib gəlib, ancaq bunun da özünün səbəbləri var. beləki məsafə atların yorulması üçün kifayət qədər uzun deyil. insanın da əsas üstünlüyü gec yorulmasıdır.
hesab olunur ki, əcdadlarımızın ov taktikası qurbanı yorulana qədər qovalamaqdan ibarət imiş. məhz buna görə də uzun məsafəni bizdən daha yaxşı qaçan yoxdur.

yazarların paylaşmaq istədikləri musiqilər

blank and jones feat Jason Caesar - pura vida

(youtube: )