xəstəliyə tutulduqda internetdən araşdırmaq

Öz sağlamlığını dezinformasiya zibilliyinə etibar edən insan davranışı. Simptomları axtarıb özlərinə diaqnoz qoymağa çalışırlar. Həkimə getdikdə isə öz diaqnozları adətən səhv çıxır. Çünki insan beyni neqativliyi sevir. Məsələn, "qollarda uyuşma nədən olur" deyə bir axtarış edirsiniz. Bir çox səhifədə fərqli xəstəliklərin simptomu olaraq bunu görürsünüz. Amma beyin neqativliyi sevdiyi üçün siz ən ağır diaqnozları özünüzə qoyub təşvişə düşürsünüz (məs. İnsult). İşin təhlükəli tərəfi odur ki, beyin şüursuz olaraq neqativə fokuslanır. Onun diqqətini başqa yerlərə yayındırmaq mümkün olmur. Ona görə də etməyin, eyləməyin. İnternet sizdən qan analizi, biopsiya, kardioqram müayinələri istəyə bilməz. Psixoloji, nevroloji, endokrinoloji və digər sahələrlə bağlı şikayətiniz varsa həkimə getmək lazımdır. Onsuz da heç kəsin özünə diaqnoz qoymaq və müalicəyə başlamaq ixtiyarı yoxdur.