qəribə hiss etdirən bəzi şeylər

İnsanların ölümünə şahid olmaq. İşim gərəyi çox yaşayıram. Son anlarında ailələri ilə halallaşmaq istəyən, həyata tutunmaq üçün dərindən nəfəs alan ya da, ümumiyyətlə, "əl çək məndən, imkan ver ölüm" deyən gözlərinin içinə baxmaq doğrudan da qəribə hiss etdirir. Nəfəsin kəsiləcək qədər uzun cpr cəhdlərinə baxmayaraq əlinin altında ölən o insanların fürsəti olsaydı əzizlərinə son dəfə nə deyəcəkdi? yaxınları bunun üstəsindən necə gələcək? görəsən, ruhu indi hardadır? Çəkdiyi əzab sonlandımı? Düşünürəm ki, ölüm gedənlər üçün mərhəmətli, geridə qalanlar üçün çox amansızdır. "Ölümün necə olsun istəyərdin?" desələr "sevdiklərim ilə vidalaşa biləcəyim bir şəkildə" deyərdim. Əlbəttə, sevdiyiniz biri qalıbsa. Çünkü yaxşı və ya pis nə yaşanız da sonda o son sözlər xatırlanır.