Azərbaycan jurnalistləri Özbəkistan Prezidenti Administrasiyası yanında KİV üçün Məzmun Hazırlama Mərkəzinin fəaliyyəti ilə tanış olublar. "Report"un Daşkəndə ezam olunmuş müxbirinin verdiyi məlumata görə, Mərkəz Azərbaycan jurnalistlərinin Özbəkistana media-turunun ilk məntəqəsi olub. Səfər zamanı iştirakçılara ölkənin media məkanının inkişafında iştirak edən, media nümayəndələrini dəstəkləyən, jurnalistlərin və bloqerlərin peşəkar bacarıqlarının artırılmasına, gənc mütəxəssislərin və müasir media menecerlərinin hazırlanmasına, habelə yeni media layihələrinin həyata keçirilməsinə kömək edən Mərkəzin fəaliyyəti barədə məlumat verilib.
Mərkəz həmçinin dövlət təşkilatlarının informasiya xidmətlərinin peşəkar inkişafına dəstək verir, ictimai əhəmiyyətli media layihələrini dəstəkləyir və media sahəsində beynəlxalq əməkdaşlığın inkişafına töhfə verir. Təqdimat çərçivəsində Mərkəzin təhsil proqramlarına xüsusi diqqət yetirilib. Onların arasında jurnalistlər və bloqerlər üçün seminarlar, praktiki məşğələlər, ustad dərsləri, media həftələri və media forumları yer alır.
Belə proqramların iştirakçıları məzmun yaradılması, media menecmenti, müasir texnologiyaların tətbiqi, rəqəmsal platformalarla iş və auditoriya ilə qarşılıqlı əlaqə üzrə praktiki bacarıqlar əldə edirlər. Həmçinin mediatur iştirakçılarına Mərkəz tərəfindən həyata keçirilən layihələr – bloqerliyə can atan gənclərin dəstəklənməsinə və onlara keyfiyyətli videoməzmun yaratmaq bacarıqlarının öyrədilməsinə yönəlmiş "Debyut" layihəsi təqdim olunub. "Mobiloqraflar məktəbi" layihəsi mobil videoçəkilişin və müasir rəqəmsal alətlərdən istifadə etməklə mediamaterialların yaradılmasının öyrədilməsinə yönəlib.
"Qısaca desək" layihəsi etibarlı xəbərlərin sosial şəbəkələr vasitəsilə operativ və qısa şəkildə yayılması üçün nəzərdə tutulub. Bundan başqa, jurnalistlərə mətn, fotoşəkil, video, audio və infoqrafika formatında informasiya resurslarını vahid bazada birləşdirən ixtisaslaşdırılmış platforma - Aura.uz təqdim edilib. Bu platforma toplanmış materialları təhlil etməyə və onlardan səmərəli istifadə etməyə imkan verir.
Mərkəzdə qeyd olunub ki, bu cür layihələrin həyata keçirilməsi media nümayəndələrinin peşəkar potensialının inkişaf etdirilməsinə, keyfiyyətli və ictimai əhəmiyyətli məzmunun yaradılmasına, eləcə də medianın müasir rəqəmsal texnologiyalara və auditoriya ilə qarşılıqlı əlaqənin dəyişən üsullarına uyğunlaşdırılmasına yönəlib.
Extract — continue reading at the source.
