səhər tezdən yuxudan durmaq

Səhər tezdən durmaq əslində günə 1-0 öndə başlamaqdır. Amma mən o bir qolu vura bilməyəndə dərhal oyundan çıxıb, "mənlik deyil" deyib küsürəm. Hamımızın ətrafında o hər şeyin çarəsini bilən tiplərdən var: Hər gün eyni saatda qalx, bir həftəyə bədənin proqramlaşacaq deyənlər. Düzü, mən də ona çox inanmışdım. Mən isə o bir həftəni heç vaxt tamamlaya bilməyən, vərdiş zəncirini hər dəfə 3-cü halqada qıran o adamam. Zəng çalır və riyazi hesablamalara başlayıram "İndi qalxsam 15 dəqiqəyə hazırlaşaram, amma 5 dəqiqə də yatsam... saçımı daramasam da olar, onsuz da papaq taxacam. 20 dəqiqə də yatım, taksi ilə gedərəm." Amma 11:45-də oyanmağın özünəməxsus bir tərəfi var: Tələsməyə artıq yer qalmayıb.