44. indi də sosial şəbəkələrin azərbaycan'da işini nizamlamaq istəyirlər. rabitə naziri bunun üçün çeşidli hazırlıqların görüldüyünü dedi. qanun layihəsini də hazırlayıblar. nizamlamaq istəyirlər, amma eyni zamanda deyirlər ki, internetin azadlığı məhdudlaşdırılmayacaq. bu, necə ola bilər? nizamlamaq elə məhdudlaşdırmaq deməkdir axı.
deyirlər guya internet istifadəçilərinin azadlığında yox, internetdə sosial şəbəkələri idarə edən şirkətlərin işində bəzi məhdudlaşdırmalar olacaq. sosial şəbəkə şirkətlərinin işini azərbaycan'da lisenziayalaşdırmaq istəyirlər. bununla guya, həm də belə şirkətlərin vergi məsələlərini həll etməyə çalışırlar - azərbaycan istifadəçilərinin internetdə yazışmaları hesabına həmin şirkətlərin qazandığı puldan azərbaycan dövlətinə vergi ödənməlidir, deyirlər.
sosial şəbəkələrin azərbaycan istifadəçilərinin məlumat toplusu buradakı hökumətin əlinə keçərsə, bunun yan təsirləri mütləq mənfi olacaq. birincisi ona görə ki, hüquqda "özəl həyat" qavramının ayrılmaz parçası olan "özəl yazışmalar sirri" real təhlükə altına düşəcək. hazırki hökumətin xalq qarşısında cavabdehliyi, qanun çərçivəsində məsuliyyəti təmin olunmadığına görə, bu təhlükə daha da böyük olasıdır. ikincisi ona görə ki, internetdə azadlığın mahiyyəti ünsiyyət ehtiyacındadır. sosial şəbəkələr niyə millyardlarla pul qazana bilir? çünki dünyada millyardarla insanın ünsiyyət ehtiyacı var. bu, çox təbii bir ehtiyacdır. bu ehtiyaca qaşrı çıxmaq - insanın təbiətinə qarşı çıxmaqdır. heç bir dövlətin qanunu təbiətin qanunundan güclü ola bilməz. ünsiyyətin qanuni yolları çətin olanda, insanlar qeyri-qanuni yolları axtaracaq və tapacaq.
" sosial şəbəkələri nizamlamaq" adı altında görüləcək işlərin nəticəsini bəri başdan aydın görmək olur - internet istifadəçilərinin sayı kəskin azalacaq. siyasi, iqtisadi, akademik, artistik və başqa azadlıqların ağlabatmaz və cəmiyyət üçün təhlükəli dərəcədə məhdudlaşdırıldığı, eləcə də siyasi səhnənin tamamilə qapadıldığı bir şəraitdə onsuz da ciddi ünsiyyət problemləri yaranıb. insanlarımızın doğru işlərə həvəsi ölür, onlar özlərini ifadə etməyə yer və imkan tapmaqda ciddi çətinlik çəkir. nəticədə, toplumda yadlaşma və yadırğama inkişaf edir, qəzəb artır. internet (sosial şəbəkələr) insanlarımızın özünü nisbətən rahat (azad) hiss etdiyi bir yerdir hələ də. unutmayaq ki, internet ölkəmizdə siyasi və ictimai mövzularda açıq və ciddi müzakirələrin getdiyi yeganə yerdir. azərbaycan'da başqa elə bir yer yoxdur ki, orada belə müzakirələr olsun. legitimliyi insanların rahatsızlığı üzərində qurulmuş bu hökumət indi də interneti nizamlamağa girişərsə, cəmiyyətdə yığılımış və artmaqda olan bütün mənfi enerijini çox təhlükəli məcraya salacaq.