Azərbaycan Qiymətləndiricilər Palatası (AQP) Prezident İlham Əliyevin rəhbərliyi ilə həyata keçirilən rəqəmsal transformasiya siyasətinə uyğun olaraq fəaliyyətində rəqəmsal texnologiyaların tətbiqini və elektron xidmətlərin əhatə dairəsini genişləndirir. Palatadan "Report"a bildirilib ki, rəqəmsallaşma istiqamətində həyata keçirilən tədbirlər çərçivəsində vətəndaşların, sahibkarların, qiymətləndiricilərin və digər maraqlı şəxslərin AQP ilə elektron əlaqə imkanları əhəmiyyətli dərəcədə genişləndirilir. Hazırda vətəndaşlar myGov platformasının "Dövlət qurumlarına məktub" xidməti vasitəsilə AQP-yə elektron qaydada müraciət edə bilirlər.
Bununla da müraciətlərin elektron formada qəbulu, qeydiyyata alınması və aidiyyəti üzrə yönləndirilməsi üçün əlavə imkan yaradılıb. AQP-nin sədr müavini Günay İsmayılqızı "Report"a açıqlamasında qeyd edib ki, rəqəmsal transformasiya Palatanın fəaliyyətinin müasir idarəetmə prinsipləri əsasında təşkilində əsas prioritetlərdən biridir: "Ölkəmizdə Prezident İlham Əliyevin rəhbərliyi ilə həyata keçirilən rəqəmsal transformasiya siyasəti dövlət idarəçiliyinin bütün sahələrində olduğu kimi, qiymətləndirmə sektorunda da yeni inkişaf imkanları formalaşdırır. Palata olaraq bu prosesə uyğun olaraq rəqəmsal imkanlarımızı mərhələli şəkildə genişləndiririk.
Əsas məqsədimiz Palata ilə vətəndaşlar, sahibkarlar, qiymətləndiricilər və digər maraqlı tərəflər arasında kommunikasiyanı daha operativ, əlçatan və şəffaf etməkdir". AQP rəsmisinin sözlərinə görə, QR kod texnologiyası və digər rəqəmsal həllərin tətbiqindən sonra Palatanın elektron sənəd dövriyyəsi sisteminə inteqrasiyası rəqəmsal transformasiya prosesinin növbəti mühüm mərhələsini təşkil edəcək: "Elektron sənəd dövriyyəsinə keçid yalnız sənədlərin kağız formasından elektron formaya keçirilməsi demək deyil. Bu, Palatanın iş proseslərinin daha çevik, sistemli və şəffaf təşkilinə imkan verən yeni idarəetmə modelidir.
Sənədlərin qəbulundan onların aidiyyəti üzrə yönləndirilməsinə, icrasına və arxivləşdirilməsinə qədər proseslərin elektron mühitdə həyata keçirilməsi həm vaxt itkisini minimuma endirəcək, həm də sənədlərin hərəkətinə və icra vəziyyətinə nəzarəti gücləndirəcək. Palata üzvlüyünə müraciət, intizam komissoyına göndərilən şikayətlər, vəkil sorguları və s müraciətlər bu platforma üzərindən olacaq." Palata rəsmisi söyləyib ki, yeni mərhələdə dövlət qurumları ilə yazışmaların, myGov platforması vasitəsilə AQP-yə daxil olan müraciət və şikayətlərin, qiymətləndirmə rəylərinin, eləcə də digər müvafiq sənədlərin elektron sənəd dövriyyəsi sistemi üzərindən həyata keçirilməsi nəzərdə tutulur: "Bizim üçün əsas prioritetlərdən biri sənədləşmə və müraciət proseslərinin mümkün qədər sadələşdirilməsi və rəqəmsal mühitə keçirilməsidir. Dövlət qurumları ilə yazışmaların, vətəndaş müraciətlərinin, şikayətlərin, qiymətləndirmə rəylərinin və digər sənədlərin elektron dövriyyəyə inteqrasiyası Palatanın fəaliyyətində operativliyin və institusional səmərəliliyin artırılmasına xidmət edəcək.
Eyni zamanda, bu yanaşma sənədlərin hərəkətinin izlənilməsinə, icra intizamının gücləndirilməsinə və proseslərdə şəffaflığın daha da artırılmasına imkan yaradacaq". G.İsmayılqızı vurğulayıb ki, AQP-nin rəqəmsallaşma siyasəti yalnız ayrı-ayrı elektron xidmətlərin tətbiqi ilə məhdudlaşmır: "Rəqəmsal transformasiyanı vahid və davamlı proses kimi qiymətləndiririk. QR kod kimi praktiki rəqəmsal həllərdən elektron müraciət imkanlarına, elektron sənəd dövriyyəsindən institusional proseslərin rəqəmsallaşdırılmasına qədər bütün istiqamətlər bir-birini tamamlayır.
Məqsədimiz texnologiyanı sadəcə yeni alət kimi tətbiq etmək deyil, onun imkanlarından istifadə etməklə Palatanın fəaliyyətinin keyfiyyətini və xidmətlərə çıxış imkanlarını yeni səviyyəyə yüksəltməkdir." O əlavə edib ki, AQP bundan sonra da müasir texnologiyaların tətbiqini genişləndirəcək və rəqəmsal imkanlardan istifadə etməklə qiymətləndirmə sahəsində daha çevik, əlçatan və şəffaf xidmət mühitinin formalaşdırılmasına töhfə verəcək. Qeyd edək ki, AQP-yə myGov üzərindən elektron müraciət etmək üçün istifadəçi platformada "Daha çox" bölməsinə daxil olaraq "Dövlət qurumlarına məktub" xidmətini seçməli, "Yeni müraciət" bölməsinə keçməli və qurumlar siyahısından "Azərbaycan Qiymətləndiricilər Palatası"nı müəyyən etməlidir. Müraciət növü və məzmunu qeyd edildikdən, zəruri sənədlər PDF formatında əlavə olunduqdan və əlaqə məlumatları daxil edildikdən sonra müraciət elektron imza ilə göndərilə bilər.
Extract — continue reading at the source.
