Mərkəzi Kəşfiyyat İdarəsinin (MKİ) direktoru Con Retkliff bu həftənin əvvəlində Moskvaya gizli səfəri zamanı Rusiya-Ukrayna müharibəsinə son qoymaq məqsədilə ABŞ Prezidenti Donald Tramp, Rusiya Prezidenti Vladimir Putin və Ukrayna Prezidenti Volodimir Zelenskinin iştirakı ilə üçtərəfli görüş keçirilməsini təklif edib. Bu barədə “Axios” iki mənbəyə istinadən məlumat yayıb. Bu, Con Retkliffin Rusiya ilə Ukrayna arasında diplomatik səylər çərçivəsində irəliləyiş əldə edilməsinə vasitəçilik etmək təşəbbüsünə şəxsən cəlb olunduğu ilk hal olub.
Mənbə bildirib ki, Con Retkliffin səfərinin məqsədlərindən biri Rusiyanın kəşfiyyat xidmətlərinin rəhbərlərinin Putini ABŞ-ın vasitəçiliyi ilə Ukrayna ilə danışıqların bərpasına doğru addım atmağa inandıra bilib-bilməyəcəyini müəyyənləşdirmək olub. Cümə günü ABŞ rəsmiləri Volodimir Zelenskiyə Con Retkliffin Moskvada apardığı danışıqlar və üçtərəfli sammit təklifi barədə məlumat veriblər. Tramp administrasiyası daha əvvəl də bu ideyanı gündəmə gətirib.
Zelenski bu təklifə razılığını bildirib, lakin Putin onu rədd edib. Xatırladaq ki, Con Retkliffin Moskvaya səfəri zamanı Rusiya Xarici Kəşfiyyat Xidmətinin direktoru Sergey Narışkin və Federal Təhlükəsizlik Xidmətinindirektoru Aleksandr Bortnikovla görüşüb. Donald Tramp “Axios”-a bildirib ki, Retkliffin səfəri “standart iş” xarakteri daşıyıb və Rusiyanı NATO ərazisinə hücum etməməsi barədə xəbərdar etmək məqsədi daşımayıb.
MKİ məsələ ilə bağlı şərh verməkdən imtina edib.
Extract — continue reading at the source.
