Azərbaycan və Özbəkistan birgə "Daşkəndə səyahət" adlı film çəkir. "Report"un Daşkəndə ezam olunmuş müxbirinin verdiyi məlumata görə, bu barədə jurnalistlərə Özbəkistan Prezident Administrasiyası yanında KİV üçün Məzmun Hazırlama Mərkəzinin direktor müavini Cahangir Abdurahmanov bildirib. Onun sözlərinə görə, filmdəki səhnələrin bir hissəsi Azərbaycanda çəkiləcək.
"Bizim azərbaycanlı həmkarlarımızla çoxlu birgə layihələrimiz var. Bu, həm televiziya, həm də telekanalların və kinofilmlərin birgə çəkilişi xətti ilə həyata keçirilir. "Daşkəndə səyahət" adlı birgə film çəkilir.
Bəzi səhnələr Azərbaycanda da çəkiləcək", - o bildirib. Abdurahmanov qeyd edib ki, iki ölkə həmçinin media sahəsində də sıx əməkdaşlıq edir və təcrübə mübadiləsi aparır. Xüsusilə Azərbaycan Respublikasının Medianın İnkişafı Agentliyi ilə əməkdaşlığa dair razılaşmalar əldə olunub.
Onun sözlərinə görə, azərbaycanlı jurnalistlərin Özbəkistana indiki medituru da iki ölkə arasında əməkdaşlığın nümunəsidir. "Biz Azərbaycan cəmiyyətinə Özbəkistanın son on ildə nələrə nail olduğunu göstərmək istəyirik", - Mərkəzin direktor müavini vurğulayıb. Abdurahmanov qeyd edib ki, Azərbaycan və Özbəkistan rəhbərlərinin müntəzəm qarşılıqlı səfərləri iki ölkə arasında sıx münasibətlərin daha da inkişafına töhfə verir.
"Biz həmişə istəmişik ki, azərbaycanlı həmkarlarımız Özbəkistana təkcə siyasi tədbirlər çərçivəsində səfər etməsinlər, həm də ölkədə baş vermiş dəyişikliklər, onun planları, yeni obyektlər, sahələr və məkanlarla məqsədyönlü şəkildə tanış olsunlar", - o əlavə edib. Abdurahmanov ümidvar olduğunu bildirib ki, mediatur sayəsində azərbaycanlı jurnalistlər öz auditoriyalarına müasir Özbəkistan və son onillikdə ölkədə baş vermiş dəyişikliklərdən bəhs edə biləcəklər.
Extract — continue reading at the source.
