Azərbaycanda kənd təsərrüfatına dövlət dəstəyinin səmərəliliyini artırmaq üçün subsidiya mexanizmlərinin yenidən nəzərdən keçirilməsi və nəticəəsaslı subsidiyalaşdırma modelinə mərhələli keçid imkanlarının araşdırılması təklif olunur. "Report" bu barədə Maliyyə Nazirliyinə istinadən xəbər verir. Məlumata görə, bu sahədə həyata keçirilməsi nəzərdə tutulan əsas istiqamətlər aşağıdakılardır: Kənd təsərrüfatına dövlət siyasətinin səmərəliliyinin qiymətləndirilməsi məqsədilə beynəlxalq bençmarkinq və qiymətləndirmə alətlərinin effektiv tətbiqi üçün lazımi məlumat bazası formalaşdırılmalı və ya təkmilləşdirilməli, subsidiya siyasəti beynəlxalq təcrübə əsasında mütəmadi olaraq qiymətləndirilməlidir.
Hədəf və nəticə indikatorlarının təkmilləşdirilməsi məqsədilə beynəlxalq səviyyədə qəbul edilmiş göstəricilər (məsələn, OECD, FAO və SDG indikatorları) öyrənilməli, milli xüsusiyyətlər nəzərə alınmaqla uyğun göstəricilərin tətbiqi və onların strateji hədəf göstəriciləri kimi müəyyən edilməsi məsələsinə baxılmalıdır. Subsidiya mexanizmlərinin strateji məhsullar üzrə nəticəyönümlülüyü artırılmalı və dövlət dəstəyinin məhsuldarlıq, istehsal həcmi və özünütəminetmə göstəriciləri ilə əlaqələndirilməsi təmin edilməlidir. Subsidiyaların tətbiqinin nəticələrinin daha obyektiv qiymətləndirilməsi məqsədilə monitorinq və qiymətləndirmə mexanizmləri təkmilləşdirilməli, ayrılmış dövlət dəstəyinin kənd təsərrüfatı sektorunun inkişafına, istehsal göstəricilərinə və strateji hədəflərə təsiri mütəmadi olaraq təhlil edilməli, əldə olunan nəticələr əsasında subsidiya siyasətinin təkmilləşdirilməsi istiqamətində müvafiq tədbirlər görülməlidir.
Subsidiya proqramları üzrə ayrılmış vəsaitlərlə yanaşı əldə olunmuş istehsal, məhsuldarlıq və iqtisadi nəticələr barədə məlumatların müntəzəm açıqlanması təmin edilməli, ictimaiyyət üçün əlçatan məlumat bazaları formalaşdırılmalıdır. Subsidiyaların həcmi ilə əldə olunan nəticələr arasında əlaqənin gücləndirilməsi məqsədilə subsidiya əmsalları və dəstək mexanizmləri yenidən nəzərdən keçirilməli, dövlət dəstəyinin məhsuldarlığa, istehsal artımına və digər nəticə göstəricilərinə təsiri qiymətləndirilməli, mərhələli şəkildə nəticəəsaslı subsidiyalaşdırma modelinin tətbiqi imkanları araşdırılmalıdır.
Extract — continue reading at the source.
