Azərbaycan-Gürcüstan sərhədində, “Qırmızı Körpü” gömrük-keçid məntəqəsində son günlər yük avtomobillərinin hərəkətində ciddi sıxlıq müşahidə olunur. APA-nın yerli bürosunun məlumatına görə, Gürcüstan tərəfdə, Marneuli istiqamətində yüzlərlə TIR-ın növbə gözlədiyi bildirilir. Məlumata görə, yük maşınlarından ibarət növbə bir neçə kilometrə qədər uzanır.
Azərbaycanın Gürcüstanla sərhədində yerləşən “Qırmızı Körpü” gömrük-keçid məntəqəsi regionun əsas yük marşrutlarından biridir. Buradan hər gün yüzlərlə yük avtomobili keçir. Son günlər isə məntəqənin Gürcüstan tərəfində TIR-ların sıxlığı müşahidə olunur.
Sərhəddəki vəziyyət xüsusilə beynəlxalq yükdaşıma ilə məşğul olan sürücülərin işinə təsir edir. Onların fikrincə, sərhəddə gözləmək daşınan mallara görə əlavə risk və özləri üçün əlavə xərcə səbəb olur. Gürcüstan ərazisində yaranan növbə sərhədin Azərbaycan tərəfində də yük avtomobillərinin hərəkətinə təsirsiz ötüşmür.
Nəticədə sürücülər sərhədi keçmək üçün uzun müddət gözləməli olurlar. Məsələ təkcə vaxt itkisi ilə məhdudlaşmır. Yük avtomobillərinin uzun müddət yolda qalması yanacaq sərfiyyatını artırır, sürücülərin istirahət imkanlarını məhdudlaşdırır və daşınan məhsulların təyinat yerinə çatdırılma müddətini uzadır.
Sürücü Hasan Sarısoy bildirir ki, Gürcüstan ərazisində parka daxil olmaq üçün üç gün gözləyiblər. Daha sonra isə parkda daha dörd gün növbə gözləməli olublar. Onun sözlərinə görə, sürücülər yollarda ağır vəziyyətlə üzləşirlər: “Azərbaycana girişdə çox problem var.
Səbəbini soruşanda deyirlər ki, Gürcüstan tərəfi işləmir”. Digər sürücü Əli Əyrica isə uzun növbələr səbəbindən günlərinin böyük hissəsini yollarda keçirdiyini deyir. Sürücülərin bir qismi yaranmış sıxlığın səbəblərindən biri kimi Rusiya-Ukrayna müharibəsi fonunda təhlükəsizlik tədbirlərinin artmasını və nəqliyyat axınının Gürcüstan marşrutuna yönəlməsini göstərir. 35 ildir Azərbaycana gəlib-getdiyini deyən sürücü Hüseyn Yanık isə bu müddət ərzində belə çətinliklə qarşılaşmadığını bildirir: “35 ildir ki, Azərbaycana gəlib-gedirəm.
Extract — continue reading at the source.
