İran XİN başçısı Abbas Əraqçi İran və Azərbaycan prezidentləri arasındakı əlaqələri yüksək qiymətləndirib. APA-nın Tehran bürosunun məlumatına görə, Abbas Əraqçi prezident Məsud Pezeşkianın qonşu ölkələrin mövqeyinə yanaşmasından danışıb. O bildirib ki, İranın xarici siyasəti davamlı xarakter daşıyır və müxtəlif hökumətlər dövründə müəyyən təşəbbüslər və fərqli dialoq üsulları ilə həyata keçirilə bilər, lakin əsas prinsiplər dəyişməz olaraq qalır.
Əraqçi qeyd edib ki, Pezeşkian hökuməti dövründə qonşu ölkələrə daha çox prioritet verilib. Əraqçi Pezeşkianın müsəlman ölkələri arasındakı birliyə şəxsi inamına da toxunub. O bildirib ki, Pezeşkianın müsəlman olan qonşu ölkələrin liderləri ilə çoxsaylı görüşlərində İslam ümməti arasında birliyin vacibliyi xüsusi vurğulanıb.
XİN başçısı İran və Azərbaycan prezidentləri arasındakı ünsiyyəti yüksək qiymətləndirərək qeyd edib ki, Pezeşkian dialoqa, birbaşa ünsiyyətə və danışmağa böyük əhəmiyyət verir. Əraqçi daha sonra sözlərinə belə davam edib: “Məhz son müharibə zamanı bir gün Azərbaycan Respublikası ilə əlaqələrimizdə münasibətləri müəyyən qədər gərginləşdirən problem yarandı. Prezident Pezeşkianın Azərbaycan Prezidenti ilə telefon danışığı, Azərbaycan dilində səmimi salamlaşması və bir neçə Azərbaycan atalar sözündən istifadə etməsi vəziyyəti tamamilə dəyişdi.” İranın xarici işlər naziri onu da əlavə edib ki, İranın Mərkəzi Asiya, Qafqaz, ölkənin şərqində Əfqanıstan və Pakistan, qərbində isə Türkiyə və İraq da daxil olmaqla digər qonşu ölkələrlə münasibətləri hələ də yaxşıdır.
Extract — continue reading at the source.
