Avtomobillərə tətbiq olunan tariflər Kanada və ABŞ arasında ticarət danışıqlarında əsas fikir ayrılıqlarından birinə çevrilib. "Report"un "Bloomberg"ə istinadən verdiyi məlumata görə, Kanada hökuməti ABŞ-a ixrac olunan avtomobillərə tətbiq edilən rüsumların 10 faizə endirilməsində, yaxud Amerika istehsalı komponentlərdən istifadə olunan avtomobillər üçün mövcud güzəştlərin uzadılmasında israr edir. ABŞ Prezidenti Donald Trampın administrasiyası isə tariflərin minimum 15 faiz səviyyəsində saxlanılmasını istəyir.
Kanadalı danışıqlar qrupu həftəsonu Vaşinqtonda məsləhətləşmələr apararaq artıq bu həftə qüvvəyə minə biləcək rüsum artımının qarşısını almağa çalışıb. ABŞ tərəfdən görüşlərdə, xüsusilə, ABŞ-ın ticarət danışıqları üzrə nümayəndəsi Ceymison Qrir və ticarət naziri Hovard Latnik iştirak ediblər. İyulun 21-də Tramp Ottavanın Amerika mallarına tətbiq etdiyi tədbirlərə cavab olaraq Kanada məhsullarına əlavə 50 faizlik rüsum tətbiq edib.
Yeni tariflər enerji resurslarına, kaliuma, dəniz məhsullarına və kritik əhəmiyyətli minerallara şamil edilməyəcək. Məhdudiyyətlərin avqustun 19-da qüvvəyə minəcəyi gözlənilir. Kanadanın Baş naziri Mark Karni ölkəsinin ABŞ-ın yeni rüsumlarına cavab verməyə hazır olduğunu bildirib.
Bununla belə, Karni tariflər qüvvəyə minənədək hər hansı addım atmayacaqlarını qeyd edib.
Extract — continue reading at the source.
