Trend-in xüsusi müxbiri xəbər verir ki, Qazaxıstanın siyasi və iqtisadi islahatları gələcəkdə də inkişaf etdiriləcək, bu barədə prezident Kasım-Jomart Tokayev bildirib. Tokayev bu sözləri Bişkekdə keçirilən ŞƏT-in Plyus sammitində çıxışı zamanı deyib. “Dünyada baş verən sürətli dəyişikliklər dövlətlərdən nəinki vaxtında uyğunlaşmağı, həm də təşəbbüskar fəaliyyət göstərmək qabiliyyətinə və bacarığına malik olmağı tələb edir.
Ölkəmizin müasir çağırışlara cavabı kifayət qədər genişmiqyaslı siyasi və iqtisadi islahatlar olub və şübhəsiz ki, gələcəkdə də inkişaf edəcək”, - Tokayev bildirib. Prezident qeyd edib ki, iyulun 1-dən qüvvəyə minən Yeni Konstitusiya ölkənin davamlı sosial-iqtisadi inkişafı üçün möhkəm zəmin yaradıb. “Konstitusiyanın müddəaları dövlət hakimiyyətinin keyfiyyətcə yeni sistemini formalaşdırıb.
Bu transformasiyalar sosial-iqtisadi sabitliyin möhkəmləndirilməsinə, ədalətli və mütərəqqi Qazaxıstanın qurulmasına yönəlib. Yeni qanunverici orqan - birpalatalı parlament fəaliyyətə başlayıb. Bu, dövlətimizin tarixində ilk nümunədir.
Belə bir parlament əvvəllər yox idi”, - deyə prezident bildirib. Tokayev həmçinin Qazaxıstanın balanslaşdırılmış, konstruktiv və sülhsevər xarici siyasət kursunu təsdiqləyib. Qazaxıstanda yeni Konstitusiyanın qəbulu ilə bağlı ümumxalq səsverməsi 2026-cı il martın 15-də keçirilib.
Yeni Konstitusiya 2026-cı il iyulun 1-də rəsmi olaraq qüvvəyə minib. Yeni konstitusiya modelinə əsasən, vitse-prezident vəzifəsi tətbiq edilib, Qazaxıstan xalqının maraqlarını təmsil edən ali konstitusiya məsləhətçi orqanı kimi Qazaxıstan Xalq Şurası (Qazaqstan Khalqy Kenesi) yaradılıb. Milli Məclis və Senatdan ibarət ikipalatalı parlament birpalatalı Qurultaya çevrildi.
Mənbə: https://www.trend.az/casia/kazakhstan/4219586.html © 2026 Trend İnformasiya Agentliyi.
Xülasə — davamını mənbədə oxuyun.
