Lin O'Qreydi: "EBRD Aİ ilə birlikdə Qarabağda layihələrin həyata keçirilməsi imkanlarını öyrənir" - MÜSAHİBƏ Maliyyə 22 may, 2026 17:26 Son otuz il ərzində Azərbaycan əsas nəqliyyat infrastrukturunun bərpasından genişmiqyaslı rəqəmsal və ekoloji transformasiyaya qədər böyük bir modernləşmə yolu keçib. Şəhərlərin qlobal iqlim gündəliyinin əsas iştirakçılarına çevrildiyi bir dövrdə respublika dayanıqlı şəhər inkişafı və intellektual texnologiyalar prinsiplərinə diqqət yetirib. Bu proses çərçivəsində Avropa Yenidənqurma və İnkişaf Bankı (EBRD) strateji tərəfdaş rolu oynayaraq Azərbaycan şəhərlərinin layihələndirmə mərhələsindən ekoloji yönümlü infrastruktura praktiki sərmayə qoyuluşuna keçidinə kömək edir.EBRD-nin "Yaşıl şəhərlər" proqramının rəhbəri Lin O'Qreydi Ümumdünya Şəhərsalma Forumunun 13-cü sessiyası (WUF13) çərçivəsində "Report"a müsahibəsində Bakının uzunmüddətli transformasiyası, Gəncənin "Yaşıl şəhərlər" proqramının flaqman şəhəri kimi əldə etdiyi nailiyyətlər, paytaxtın sənaye ərazilərinin bərpası perspektivləri və elektrik nəqliyyatına hərtərəfli keçid barədə danışıb.Həmin müsahibəni oxuculara təqdim edirik:- Məndə olan məlumata görə, siz 1990-cı illərdə Azərbaycanda işləmisiniz.
Son 30 ildə ölkənin necə dəyişdiyi barədə təəssüratlarınızı bölüşə bilərsinizmi?- Mən ilk dəfə Azərbaycana 30 il əvvəl gəlmişəm. O vaxtlar mən EBRD-nin Qafqaz regionuna nəzarət edən nəqliyyat komandasının tərkibində idim. Biz yerli dəmir yolu və avtomobil yolu strukturları ilə sıx əməkdaşlıq edirdik.
Xüsusilə, EBRD "Azərbaycan Dəmir Yolları" QSC ilə birlikdə "Şərq-Qərb" dəmir yolu xəttinin modernləşdirilməsini maliyyələşdirmişdi.Bundan başqa, Bank Qara dəniz limanlarına aparan "Şərq-Qərb" avtomobil magistralının, eləcə də Bakı-Astara yolunun tikintisini dəstəkləyib. Belə uzun fasilədən sonra görürəm ki, ölkə irimiqyaslı transformasiyadan keçib. Bakı həqiqətən də müasir bir şəhərə çevrilib.
İnsanda elə bir hiss yaranır ki, sanki tamamilə başqa bir yerə gəlmisən, bununla belə, Azərbaycan öz zəngin tarixi və mədəni irsini qoruyub saxlamağa müvəffəq olub.- BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) EBRD-nin Azərbaycan şəhərləri ilə əməkdaşlıq dinamikasını necə dəyişib?- COP29 şəhər inkişafı üçün mühüm mərhələ oldu, çünki bu gün məhz şəhərlər iqlim gündəliyinin əsas elementlərindən birinə çevrilir. Bu dəyişiklik xüsusilə burada, Bakıda nəzərə çarpır.Daha geniş kontekstdə qeyd edim ki, biz Azərbaycan şəhərlərinin inkişafını dəstəkləmək məqsədilə COP29 çərçivəsində Azərbaycan hökuməti ilə Anlaşma Memorandumu imzaladıq. O vaxtdan bəri bu təşəbbüs həqiqətən də fəal şəkildə inkişaf edib. - COP29 zamanı Şəhər iqlim fəaliyyəti üzrə Bakı Davamlılıq Koalisiyası işə salınıb.
EBRD-nin "Yaşıl şəhərlər" proqramı Bakıda və ölkənin digər şəhərlərində bu öhdəliklərin dəstəklənməsində hansı rolu oynayır?- Bakı Koalisiyasının əsas mövzularından biri mərkəzi hökumət və bələdiyyə orqanlarının qarşılıqlı fəaliyyətinə əsaslanan çoxsəviyyəli idarəetmənin vacibliyi ilə bağlı olub. Bu, Bankın strategiyasına tam uyğundur.Biz mərkəzi hökumətlərlə, o cümlədən Azərbaycan hökuməti ilə sıx əməkdaşlıq edir, eyni zamanda, yerli səviyyədə şəhərlərin birbaşa kreditləşdirilməsini fəal şəkildə dəstəkləyirik. Beləliklə, çoxsəviyyəli idarəetmə prinsipi bizim şəhər maliyyələşdirməsi modelimizə üzvi şəkildə inteqrasiya olunub.- Gəncə artıq planlaşdırma mərhələsindən konkret layihələrin həyata keçirilməsinə keçib.
Əldə olunmuş tərəqqini necə qiymətləndirirsiniz və Gəncə Qafqazın digər şəhərləri üçün nə dərəcədə nümunə ola bilər?- Miqyası anlamaq üçün qeyd edim ki, EBRD-nin "Yaşıl şəhərlər" proqramı fəaliyyət göstərdiyimiz bütün ölkələri əhatə edir. Bu günə qədər proqrama 60 şəhər daxildir və 100-dən çox layihə çərçivəsində investisiyaların ümumi məbləği 3,5 milyard avronu ötüb. Biz Gəncənin bu təşəbbüsə qoşulmasına şad olduq.
Extract — continue reading at the source.
