Çin Azərbaycanla birgə sivilizasiyalararası dialoqu inkişaf etdirməyə və humanitar mübadilələri gücləndirməyə hazırdır. "Report" xəbər verir ki, bu barədə Çinin ölkəmizdəki səfiri Lu Mey Bakıda Azərbaycan dilinə dublyaj olunmuş "İrsin keşikçisi" sənədli filminin təqdimat mərasimində bildirib. Diplomat qeyd edib ki, iki ölkə arasında mədəniyyət, təhsil, kütləvi informasiya vasitələri, turizm, elm və texnologiya, həmçinin gənclər mübadiləsi sahələrində humanitar əməkdaşlıq daim dərinləşir.
"Çin tərəfi Azərbaycanla birgə sivilizasiyalararası dialoqu inkişaf etdirməyə və humanitar mübadilələri möhkəmləndirməyə hazırdır", - Lu Mey vurğulayıb. Çin-Azərbaycan münasibətlərindən danışan səfir, onların Çin sədri Si Cinpin və Azərbaycan Prezidenti İlham Əliyevin strateji rəhbərliyi altında dinamik inkişaf etdiyini qeyd edib. "Son illərdə Çin-Azərbaycan münasibətləri hərtərəfli inkişaf edir, yeni mərhələyə qədəm qoyub və strateji tərəfdaşlıq səviyyəsinə yüksəlib", - o bildirib.
Diplomatın sözlərinə görə, ölkələr arasında yüksək səviyyəli qarşılıqlı səfərlərin sayı artır, əlaqələr genişlənir və siyasi etimad möhkəmlənir. "Bir kəmər, bir yol" təşəbbüsünün birgə həyata keçirilməsi çərçivəsində mühüm nəticələr əldə olunub və ikitərəfli ticarətin həcmi dəfələrlə rekord göstəriciləri yeniləyib. Lu Mey, həmçinin Çin Media Korporasiyası (China Media Group) tərəfindən hazırlanmış "İrsin keşikçisi" filminin əhəmiyyətini vurğulayıb.
Onun sözlərinə görə, filmin Azərbaycan dilinə dublyaj edilməsi iki ölkənin mediaları arasında əməkdaşlığın yeni mərhələyə qədəm qoymasından xəbər verir və Azərbaycan tamaşaçılarına Çinin zəngin mədəni irsi ilə daha yaxından tanış olmağa imkan verəcək.
Extract — continue reading at the source.
