Mərkəzi Asiyanın enerji sistemində tərəfindən elektrik enerjisi axınının kəskin dəyişməsi əks-qəza avtomatikasının işə düşməsinə və Qazaxıstanın bəzi regionlarında istehlakçıların enerji təchizatından ayrılmasına səbəb olub. "Report" xəbər verir ki, bu barədə Qazaxıstanın Energetika Nazirliyi məlumat yayıb. "Avqustun 14-də Mərkəzi Asiyanın enerji sistemində elektrik enerjisi axınının kəskin dəyişməsi nəticəsində enerji sistemində güc artımı baş verib.
Nəticədə əks-qəza avtomatikası işə düşüb ki, bu da bəzi regionlarda istehlakçıların ayrılmasına gətirib çıxarıb", - deyə məlumatda bildirilir. Qeyd olunub ki, hazırda "KEGOC" SC sistem operatoru lazımi bərpa işlərini aparır. Bir sıra regionlarda elektrik enerjisi təchizatı artıq bərpa olunub.
Eyni zamanda, Qazaxıstan mediası xəbər verir ki, Almatıda işıqların kəsilməsi səbəbindən yollarda tıxaclar yaranıb, işıqforlar işləmir. Mərkəzi Asiya ölkələrindən birinin enerji sistemindəki qəza bütün regionun enerji sisteminə təsir edib. "Report" xəbər verir ki, bu barədə Özbəkistanın Energetika Nazirliyi məlumat yayıb.
Qəza nəticəsində Özbəkistanın Surxandərya vilayətində və bəzi digər regionlarında elektrik enerjisinin verilişi dayandırılıb. "Hazırda enerji sistemi işçiləri tərəfindən enerji təchizatı tədricən bərpa olunur. Əlavə məlumat daha sonra veriləcək", - qurumun məlumatında bildirilir.
Eyni zamanda, avqustun 14-də Qırğızıstan, Qazaxıstan və Tacikistanda da elektrik enerjisi təchizatında fasilələr qeydə alınır. Bişkekdə bir sıra rayonların sakinləri yerli vaxtla saat 15:00-dan etibarən kəsintilərin olması barədə məlumat veriblər. Almatı şəhəri və Almatı vilayətində də enerji kəsintiləri baş verib.
Bundan başqa, Düşənbədən və Tacikistanın bir sıra regionlarından da elektrik enerjisi təchizatında yaranan fasilələr barədə məlumatlar daxil olub.
Extract — continue reading at the source.
