Qana Rusiya qarşısında öz vətəndaşlarının Rusiya-Ukrayna münaqişəsində iştirak etmək üçün cəlb olunmasına son qoyulması tələbini irəli sürüb. "Report"un məlumatına görə, bu barədə Qananın xarici işlər naziri Samuel Okudzeto Ablakvanın Moskvada Rusiyanın xarici işlər naziri Sergey Lavrovla keçirdiyi danışıqların nəticələrinə əsasən məlum olub. Görüşdən sonra Ablakva bildirib ki, Lavrov Qana vətəndaşlarının münaqişədə iştirak etmək üçün cəlb olunması ilə bağlı məsələnin həlli istiqamətində iş aparmağa razılaşıb.
Nazirin sözlərinə görə, Ukraynada 62 Qana vətəndaşı həlak olub, daha 15 nəfər isə itkin düşmüş hesab olunur. Lavrov təsdiqləyib ki, Qana vətəndaşları Rusiya Müdafiə Nazirliyi ilə müqavilələr imzalayıblar. Bununla belə, o bildirib ki, onlar bunu "özlərinə də irqçiliyə qarşı mübarizədə kömək etmiş ölkə ilə həmrəylik" səbəbindən, eləcə də maddi və maliyyə maraqları baxımından ediblər.
Rusiya diplomatı bildirib ki, Moskva daha əvvəl də digər dövlətlərdən oxşar müraciətlər alıb. O qeyd edib ki, Rusiyanın Müdafiə Nazirliyində bu cür müraciətlərə baxan xüsusi struktur fəaliyyət göstərir və Qana tərəfinin müraciətinə də baxılacağına əminliyini ifadə edib. Afrika ölkələri vətəndaşlarının Rusiya-Ukrayna münaqişəsində iştirak etmək üçün cəlb olunması regionda narahatlıq doğurur.
Bundan əvvəl Cənubi Afrika Respublikası və Keniya hakimiyyətləri də Moskvadan bununla bağlı tədbir görməyi tələb etmişdilər. Fevral ayında kəşfiyyat məlumatlarında Rusiyanın 1 000-dən çox Keniya vətəndaşını aldadıcı yollarla Rusiya-Ukrayna münaqişəsinə cəlb etdiyi bildirilmişdi. Kəşfiyyatın məlumatına görə, onların bir çoxuna yük maşını sürücüsü və ya mühafizəçi kimi iş vəd edilmişdi.
Extract — continue reading at the source.
