Kənd Təsərrüfatı Nazirliyinin Aqrar İnnovasiya Mərkəzi və Qusar Rayon İcra Hakimiyyətinin birgə təşkilatçılığı ilə Qusar rayonunda "Aqrar Biznes Festivalı" və "I İntensiv Meyvə Bağları Festivalı" keçirilib. "Report"un Şimal bürosunun məlumatına görə, festivalın əsas məqsədi meyvəçilik sahəsində müasir texnologiyaların və innovativ yanaşmaların tətbiqinin təşviqi, intensiv bağçılığın inkişaf perspektivlərinin nümayiş etdirilməsi, fermer və sahibkarların dövlət dəstəyi mexanizmləri barədə məlumatlandırılması, qabaqcıl təcrübələrin bölüşdürülməsi və aqrar sahədə fəaliyyət göstərən subyektlər arasında əməkdaşlığın genişləndirilməsidir. Qusarın Mərkəzi meydanında keçirilən tədbirdə intensiv meyvə bağlarının salınması və becərilməsi ilə məşğul olan təsərrüfat subyektləri, meyvəçilik təsərrüfatları, aqrar sahədə fəaliyyət göstərən şirkətlər, fermerlər və sahibkarlar iştirak ediblər.
Festivalın rəsmi açılış mərasimində Qusar Rayon İcra Hakimiyyətinin başçısı Sahir Məmmədxanov, kənd təsərrüfatı nazirinin müavini Seymur Səfərli və Aqrar İnnovasiya Mərkəzinin direktoru Anar Cəfərov çıxış ediblər. S.Məmmədxanov rayonun aqrar potensialı, xüsusilə meyvəçilik sahəsində mövcud imkanlar barədə məlumat verib. Qeyd olunub ki, Qusar rayonu əlverişli təbii-iqlim şəraiti, torpaq ehtiyatları və formalaşmış kənd təsərrüfatı ənənələri ilə meyvəçiliyin, o cümlədən intensiv bağçılığın inkişafı üçün geniş imkanlara malikdir.
Kənd təsərrüfatı nazirinin müavini Seymur Səfərli ölkədə kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramının əsas hədəflərinə toxunub. Meyvəçilik sahəsinin aqrar sektorun mühüm istiqamətlərindən biri olduğunu qeyd edərək, bu sahədə intensiv istehsalın genişləndirilməsinin, müasir suvarma sistemlərinin və innovativ texnologiyaların tətbiqinin əhəmiyyətini vurğulayıb. Qeyd edilib ki, Dövlət Proqramında meyvəçilik təsərrüfatlarının inkişaf etdirilməsi, istehsalın səmərəliliyinin və məhsuldarlığın artırılması, müasir texnologiyaların tətbiqinin genişləndirilməsi və sahənin rəqabətqabiliyyətliliyinin yüksəldilməsi istiqamətində mühüm hədəflər müəyyənləşdirilib.
Aqrar İnnovasiya Mərkəzinin direktoru Anar Cəfərov festivalın aqrar sahədə bilik və təcrübə mübadiləsi, müasir texnologiyaların və innovativ yanaşmaların nümayişi baxımından əhəmiyyətini qeyd edib. Bildirilib ki, belə tədbirlər fermerlər, sahibkarlar və aqrar sahədə fəaliyyət göstərən şirkətlər arasında əməkdaşlığın genişləndirilməsinə və yeni biznes əlaqələrinin qurulmasına imkan yaradır. Festival çərçivəsində ölkənin müxtəlif bölgələrindən 70-dən artıq meyvəçilik təsərrüfatı subyekti, fermer və sahibkar iştirak edib.
Təmsil olunan təsərrüfatların meyvə bağlarının ümumi sahəsi 10 min hektara yaxın olub. Tədbirdə ölkə üzrə meyvəçilik təsərrüfatlarının ümumi sahəsinin 50 min hektar təşkil etdiyi diqqətə çatdırılıb. Ölkədə kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramına əsasən, bu göstəricinin 2030-cu ilədək 70 min hektara çatdırılması hədəflənir.
Tədbir çərçivəsində Dövlət Proqramının əsas hədəf və istiqamətlərini əks etdirən məlumatlandırıcı posterlər də nümayiş etdirilib. Poster və məlumat lövhələrində aqrar sahədə məhsuldarlığın və rəqabətqabiliyyətliliyin artırılması, innovativ texnologiyaların tətbiqinin genişləndirilməsi, müasir suvarma sistemlərindən istifadənin təşviqi, meyvəçilik və digər prioritet istiqamətlər üzrə nəzərdə tutulan tədbirlər barədə məlumatlar təqdim olunub. Festival çərçivəsində "Aqrar sahədə dövlətin dəstək mexanizmləri" mövzusunda panel müzakirəsi də keçirilib.
Extract — continue reading at the source.
