Rusiya rəsmilərinin Azərbaycana qarşı səsləndirdiyi fikirlər, davranışlar, bəyanatlar qarşıdurma yaradır və hüquqi məsuliyyət doğurur. Bunu "Report"a açıqlamasında deputat Ceyhun Məmmədov deyib. Onun sözlərinə görə, Azərbaycanın dəfələrlə etdiyi xəbərdarlıqlara baxmayaraq, Rusiya tərəfi iki ölkə arasındakı münasibətlərə xələl gətirə biləcək addımlar atmaqda davam edir.
Deputat bildirib ki, bu cür açıqlamalar nə beynəlxalq hüquqa, nə də qarşılıqlı münasibətlərə uyğundur. "‘Moskva 24" telekanalında Rusiya rəsmiləri və müxbir tərəfindən səsləndirilən fikirlər bunun növbəti bariz nümunəsidir. Ümumiyyətlə, başqa bir dövlətin daxili işlərinə müdaxilə etmək, Konstitusiyaya dəyişikliklərlə bağlı çağırışlar səsləndirmək ciddi hüquq pozuntusudur və hüquqi məsuliyyət yaradır", - deyə C.Məmmədov vurğulayıb.
O qeyd edib ki, Azərbaycan dəfələrlə Rusiya tərəfinin diqqətinə çatdırıb ki, bu ölkənin rəsmiləri və televiziya kanalları açıqlamalarında və səsləndirdikləri fikirlərdə diqqətli olmalıdırlar. "Bu cür davranışlar, fikirlər və bəyanatlar qarşıdurma yaradır və hüquqi məsuliyyət doğurur. Azərbaycan da beynəlxalq hüququn tələblərinə uyğun olaraq, bu şəxslərin məsuliyyətə cəlb olunması istiqamətində addımlar atır", - deputat əlavə edib.
C.Məmmədov hesab edir ki, Rusiya tərəfi bu cür açıqlamaların qarşısını almalı və belə bəyanatlar səsləndirən şəxslərə qarşı ciddi tədbirlər görməlidir. "Rusiya bir tərəfdən Azərbaycanla münasibətlərinin yaxşı olduğunu bildirir, digər tərəfdən isə ölkəmizə qarşı müxtəlif ittihamlar irəli sürür. Bu cür addımlara son qoyulmalı, ikitərəfli münasibətlərin inkişafı istiqamətində işlər görülməlidir", - deyə deputat bildirib.
Extract — continue reading at the source.
