Rusiyada efirə çıxmaqla məsuliyyət daşıyan siyasətçilər, ekspertlər və jurnalistlər dedikləri sözlərin məsuliyyətini dərk etməlidirlər Bu fikirləri "Report"a açıqlamasında Milli Məclisin deputatı Hikmət Babaoğlu deyib. O qeyd edib ki, onlar siyasəti ciddi bir anlayış kimi qəbul etməyi bacarmalıdırlar. "Bir neçə xəyalpərəst mövcud olmayan dövlətin "qanunları" ilə kimisə mühakimə etməyə cəhd göstərir.
Bu, əslində, siyasi terror hesab olunmalıdır və belə hadisələrə hüquqi qiymət verilməlidir. Bir neçə xəyalpərəstin səsləndirdiyi iddialar, Rusiyadan fərqli olaraq, Azərbaycan tərəfindən hüquqi müstəvidə məsuliyyət yaradır". Deputat hesab edir ki, yaranmış vəziyyətlə bağlı Rusiya hüquq sistemi və müvafiq qurumları Azərbaycan prokurorluğunun başlatdığı prosesə dəstək göstərməlidirlər: "Rusiya ilə Azərbaycan arasında hüquqi yardım sahəsində əməkdaşlıq mövcuddur və bunun dərin təcrübəsi var.
Baş vermiş hadisə 22 fevral 2022-ci ildə imzalanmış Rusiya ilə Azərbaycan arasında Strateji Tərəfdaşlıq Haqqında Bəyannaməyə də uyğun olaraq siyasi baxımdan qiymətləndirilməlidir. Qeyd edək ki, Azərbaycan Baş prokurorluğu avqustun 17-də Rusiya vətəndaşları - "Moskva 24" telekanalının aparıcısı, jurnalist İvan Knyazev, özünü Rusiya Federasiyasında siyasi məsləhətçi və media eksperti kimi təqdim edən Semyon Uralov, eyni zamanda televiziya müxbiri kimi fəaliyyət göstərən, Rusiya Federasiyası nəqliyyat nazirinin müşaviri Aleksey Çadayev barəsində İnterpol kanalları vasitəsilə beynəlxalq axtarışın təşkili istiqamətində zəruri tədbirlərin görüldüyü barədə məlumat yayıb. Adıçəkilən şəxslər Azərbaycan Respublikasının konstitusiya quruluşunun zorla dəyişdirilməsinə, ərazi bütövlüyünün parçalanmasına, milli nifrət və düşmənçiliyin salınmasına, habelə terrorçuluğa açıq çağırışlarda ittiham edilirlər.
Həmin şəxslər barəsində cinayət işi başlansa da, ölkəmizin hüdudlarından kənarda olduqları nəzərə alınaraq, onlar barəsində axtarış elan olunaraq məhkəmənin müvafiq qərarları ilə barələrində həbs qətimkan tədbiri seçilib. Adıçəkilən şəxslər 2026-cı il iyulun 14-də və avqustun 13-də "YouTube" platformasında "Семён Уралов" adlı kanalda yayımlanan "Чистота понимания" verilişində Azərbaycana qarşı zorakı üsulların tətbiq edilməsi, o cümlədən ayrı-ayrı şəxslərin birbaşa fiziki məhvetmə təhlükəsi altında saxlanılması və ünvanlı şəkildə sıradan çıxarılması barədə fikirlər səsləndirərək terrorçuluğa açıq çağırışlar ediblər.
Extract — continue reading at the source.
