ABŞ Konqresinin Senatında Demokratlar Pentaqon rəhbəri Pit Hegsetdən "USS Abraham Lincoln" aviadaşıyıcısında hərbi qulluqçuların xidmət şəraiti barədə hesabat tələb ediblər. "Report"un məlumatına görə, bu barədə senatorlar qrupunun Pit Hegsetə ünvanladığı məktubda bildirilib. Qanunvericilər aviadaşıyıcıda şəraitin ekipajın sağlamlığı və təhlükəsizliyi üçün təhdid yaradacaq səviyyədə pisləşə biləcəyi ilə bağlı məlumatlardan narahat olduqlarını bildiriblər.
Onların sözlərinə görə, "USS Abraham Lincoln"un missiyası 250 gündən çoxdur davam edir, bunun 200-dən çox günü aviadaşıyıcı limana daxil olmadan dənizdə keçirib. Senatorlar hərbi qulluqçuların ərzaq və su çatışmazlığı, eləcə də psixi sağlamlıq problemləri ilə üzləşdiyini bildiriblər. Onlar bəzi hərbçilərin özlərini gəmidən atmağa cəhd göstərməsi barədə mediada yayılan məlumatlara da istinad ediblər.
Məktub müəllifləri yaranmış vəziyyəti Hegset və ABŞ Prezidenti Donald Tramp tərəfindən yol verilmiş "pis planlaşdırmanın" göstəricisi adlandırıblar. Onların fikrincə, bu vəziyyət İranla müharibəyə başlamaq qərarı ilə daha da ağırlaşıb. Senatorlar aviadaşıyıcının Kaliforniyadakı bazaya dəqiq nə vaxt qayıdacağı barədə məlumat, həmçinin hərbi qulluqçulara göstərilən yardım, gəmidə mümkün intihar cəhdləri, sanitar qovşaqların vəziyyəti və kifayət qədər ərzağın olub-olmaması barədə məlumat tələb ediblər.
Bundan əlavə, qanunvericilər "USS Abraham Lincoln" bazaya qayıtdıqdan sonra xidmət şəraitini yoxlamaq üçün gəminin göyərtəsinə qalxmaq imkanı istəyiblər.
Extract — continue reading at the source.
