ABŞ-nin rəhbərlik etdiyi Sülh Şurası HƏMAS-ın silahsızlaşdırılmağa başlayacağı təqdirdə İsraili Qəzza zolağından qoşunlarını müvafiq olaraq geri çəkməyə və anklava humanitar yardımın çatdırılmasını sürətləndirməyə çağırıb. "Report"un "Axios"a istinadən məlumatına görə, Sülh Şurası HƏMAS-dan silahları təhvil verməsini, hərbi infrastrukturu sökməsini, beynəlxalq qüvvələrin yerləşdirilməsinə razılıq verməsini və Qəzza zolağının yenidən qurulmasına yardım göstərməsini tələb edir. Qeyd edək ki, bu gün ABŞ Prezidenti Donald Trampın elçisi, kürəkəni Cared Kuşner Misirdə ölkə rəhbərliyi və HƏMAS nümayəndələri ilə görüşüb.
Tərəflər hərəkatın silahsızlaşdırılması, anklavda hakimiyyətin texnokratik hökumətə ötürülməsi və HƏMAS-ın Qəzzanın gələcək idarəçiliyindən kənarlaşdırılması məsələlərini müzakirə ediblər. Avqustun 17-də C.Kuşnerin İsrailə səfəri və növbəti addımları müzakirə etmək üçün Baş nazir Binyamin Netanyahu ilə görüşü planlaşdırılır. Xatırladaq ki, 2025-ci ilin oktyabrında İsrail və HƏMAS Misir, Qətər, ABŞ və Türkiyənin vasitəçiliyi ilə atəşkəs razılaşmasına nail olublar.
Lakin tərəflər hələ də münaqişəyə birdəfəlik son qoyulmasını və Qəzza zolağının yenidən qurulmasını nəzərdə tutan ikinci mərhələyə keçə bilməyiblər.
Extract — continue reading at the source.
