Radikal Fələstin hərəkatı HƏMAS-ın tərksilah edilməsi prosesi artıq 30 gün ərzində başlaya bilər, tunellərin bir hissəsinin ləğvi ilə bağlı işlərə isə yaxın 60–90 gün ərzində başlanması mümkündür. "Report" xəbər verir ki, bu barədə ABŞ Prezidenti Donald Trampın kürəkəni Cared Kuşner Fox News telekanalına müsahibəsində deyib. "Biz həmçinin hər hansı birbaşa təhdid yaranacağı təqdirdə İsrailin özünümüdafiə hüququnu məhdudlaşdırmaq niyyətində deyilik.
Bunun konkret olaraq nə demək olduğunu dəqiqləşdirməli olduq", - deyə Kuşner bildirib. Onun sözlərinə görə, irəliləyiş "artıq 30 gün ərzində" başlaya bilər və bu prosesə silahların bir hissəsinin müsadirə edilməsi də daxil ola bilər: "Ümid edirəm ki, növbəti 60–90 gün ərzində tunellərin bir hissəsinin də ləğvinə başlanacaq. Buna görə də irəliləyiş kifayət qədər tez əldə oluna bilər".
Kuşner vurğulayıb ki, bunun həyata keçirilməsi üçün hər iki tərəfin əməkdaşlığı tələb olunacaq. Hazırkı danışıqlarda isə tərəflər arasında fikir ayrılıqları qalmaqdadır: ABŞ-ın təklif etdiyi plan HƏMAS-ın mərhələli şəkildə tərksilah edilməsini nəzərdə tutur, İsrail isə tam tərksilahı Qəzzadan geri çəkilmə və yenidənqurma ilə bağlı əsas şərt kimi irəli sürür. Kuşner ABŞ və İran arasında razılaşmanın şərtlərini də açıqlayıb: "Əgər İran bizimlə müzakirə etdiyi razılaşmanı başa çatdırmağa və nüvə silahı yaratmaq imkanından imtina etməyə hazırdırsa, o zaman, əlbəttə ki, o (Tramp - Qeyd) razılaşma əldə etməyə hazırdır.
Lakin hazırda onlar bizim üçün məntiqli və məqbul olacaq hər hansı bir addım atmağa heç bir maraq göstərmirlər".
Extract — continue reading at the source.
