Ukrayna Müdafiə Qüvvələrinin bölmələri Rusiya ərazisində bir sıra mühüm hədəfləri vurub. "Report" xəbər verir ki, bu barədə Ukrayna Silahlı Qüvvələri Baş Qərargahının "Telegram" kanalındakı bəyanatında deyilir. Qeyd olunub ki, avqustun 16-na keçən gecə Rusiyanın Rostov vilayətinin Kamensk-Şaxtinski şəhərində yerləşən Rusiya müdafiə sənayesi kompleksinin müəssisəsinə zərbə endirilib.
Obyektin ərazisində yanğın qeydə alınıb. Elə həmin gün müvəqqəti işğal olunmuş Krım ərazisində Rusiya Silahlı Qüvvələrinin raket bölməsinin cəmləşdiyi əraziyə zərbə endirilib. Məlumatda qeyd olunub ki, Ukraynanın işğal olunmuş Zaporojye vilayətinin Svetlodolinskoye yaxınlığında Rusiya qoşunlarının hərbi logistikanın təmin edilməsi və şəxsi heyətin yerdəyişməsi üçün istifadə etdiyi dəmir yolu körpüsü vurulub.
Həmçinin Ukraynanın Donetsk vilayətinin Karlovka ərazisində Rusiya ordusunun maddi-texniki vasitələr və döyüş sursatı anbarları vurulub. Baş Qərargahın məlumatına görə, həftə ərzində Rusiyanın Tümen vilayətinin Tobolsk şəhərində yerləşən və fəaliyyətini dayandıran "Zapsibneftexim" MMC müəssisəsi, eləcə də Rusiya Federasiyasının Orenburq vilayətinin Orsk şəhərindəki "Orsknefteorqsintez" neft emalı zavodu, neft emalı qurğuları vurulub.
Extract — continue reading at the source.
