Kanadanın Britaniya Kolumbiyası əyalətində xəritələrdə olmayan, ağaclarla örtülü nəhəng üzən ada aşkarlanıb. Modern.az xarici KİV-ə istinadən xəbər verir ki, sirli obyekt Uilliston su anbarında, Makkenzi şəhəri yaxınlığında yerli sakin tərəfindən görüntülənib. Yerli sakin Roki Eyverinin paylaşdığı videoda ağaclarla örtülü torpaq parçasının suyun üzərində üzdüyü görünür.
Məlumata görə, ada aşkarlanarkən onun altında suyun dərinliyi təxminən 60 metr olub. Əvvəlcə hadisəni görənlər görüntülərin süni intellektlə hazırlandığını düşünsələr də, iyulun 21-də çəkilmiş peyk görüntüsü adanın həqiqətən mövcud olduğunu təsdiqləyib. Avqustun 5-də isə obyekt peyk görüntülərindən yoxa çıxıb.
Mütəxəssislərin hesablamalarına görə, adanın uzunluğu təxminən 140, eni isə 70 metr olub. Onun necə əmələ gəldiyi hələ dəqiq məlum deyil. Ehtimallardan birinə görə, sahil ərazisində uzun müddət toplanan ağac qalıqları arasında bitkilər və ağaclar kök salıb.
Bu yay su anbarında suyun səviyyəsinin son 14 ilin ən yüksək həddinə çatması nəticəsində həmin hissə sahildən qoparaq suya düşə bilər. Lakin Kanada Geoloji Xidmətinin əməkdaşı Con Klak bu versiyaya şübhə ilə yanaşıb və belə miqyasda hadisə ilə daha əvvəl qarşılaşmadığını bildirib. Avqustun 31-də sirli ada yenidən aşkarlanıb.
Bu dəfə o, Ospika çayının su anbarına töküldüyü ərazidə, ilk görüldüyü yerdən təxminən 30 kilometr uzaqda qeydə alınıb. BC Hydro şirkətinin nümayəndəsi Bob Qammer adaya yaxınlaşmamağı tövsiyə edib. Onun sözlərinə görə, üzən obyekt qeyri-sabitdir və istənilən vaxt parçalana bilər.
Extract — continue reading at the source.
