sözlük yazarlarının qorxuları

təbiətüstü qüvvələrə inanmamağıma rəğmən, inanclı olduğum vaxtlarda beynim gic-gic şeylərlə dolduğu üçün ruhları (cinləri, şeytanı) görməkdən qorxuram. var olmadıqlarını düşünsəm də, neqativ ateist (aqnostik) olduğum üçün onların varlığına bir qədər skeptik yanaşıram. bu yaxınlarda bir dostumgildəydim. ikimiz idik evdə. gecə vaxtı insidious 3-ə baxırdıq. nəysə film bitdi. getdik yatmağa. yatmağa hazırlaşanda bu evdəki bütün işıqları söndürdü. qaranlıqdan öz əlimi belə görmürdüm. dedim ki, "heç olmasa koridorda yandır da işığı, belə yatmaq olmur". bu da dedi ki, "azca işıq olanda da yata bilmirəm, alınmır heç cür". məcburi olaraq vəziyyətlə barışdım. nə isə, bu birdən məni qorxutmaq üçün başladı danışmağa ki, "indi bu dəqiqə otaqdakı ruhlar hamısı sənə baxırlar. lap yorğanın altına da girsən onlar səni görürlər" filan. bunun belə danışmağına görə gün çıxana kimi yata bilmədim.

26 noyabr 2015 nardaran hadisələri

bir ateist olaraq nardaran camaatını haqqlı gördüyüm hadisədir.

ikiüzlü olmayın. ordakı insanların yerində nidaçılar, respublikaçı alternativçilər, cəbhəçilər, müsavatçılar olsaydı, taleh bağırzadənin yerində ilqar məmmədov olsaydı bu dəqiqə facebookda hakimiyyətin var-yoxunu söyürdünüz. amma iş dindarlara gələndə o dəqiqə hakimiyyətə haqq qazandırırsınız.

nardaranda yaşayan insanlar terrorist deyillər. onlar, bildiyimiz, normal şiədirlər. onlar, "allahu əkbər" deyərək baş kəsən terroristlərə lənət oxuyurlar. onlar, heç kəsi dini səbəblərə görə öldürmürlər. heç kəsi daşqalaq etmirlər. onların şəhərin mərkəzindəki müsəlmanlardan fərqi, dinə daha çox bağlı olmaları, aşuraya daha çox önəm vermələridir.

mənim atam şiədir. 20 ilə yaxındır ki, namaz qılır. kərbəlayidir. imam hüseyn aşiqidir. hər aşura günü məscidə gedir, sinə vurur. bununla bərabər o mənim üçün dünyanın ən yaxşı, ən təmiz qəlbli, ən əliaçıq, ən gülməli insanıdır. yəni, sözüm ondadır ki, nardarandakı insanların da dinə olan münasibəti mənim atamdakı kimidir. onlar da normal, sənin kimi, mənim kimi insandırlar. bilirəm, sizi qorxudan şey ordakı qadınların qara hicabda olması, yollarda ərəbcə sözlərin yazılması kimi şeylərdir. amma başa düşün ki, bu onların inancıdır. və bununla heç kəsə zərər yetirmirlər.

deyə bilərsiniz ki, bəs onlar normal insandırlarsa, əllərində silah nə gəzir? belə deyim, əgər orda hansısa gijdıllağ polisə atəş açıbsa, bu bütün nardaran camaatının yox, onun mallığının isbatıdır. əgər 1.000 nəfər azərbaycanlı suriyada terrorla məşğuldursa, bu bütün azərbaycanlıların yox, həmin o 1.000 nəfərin günahıdır.

uzun sözün qısası. mən nardaran camaatıyla fəxr edirəm. ona görə fəxr edirəm ki, onlar hakimiyyətdən qorxmurlar. öz sözlərini deməkdən çəkinmirlər. onlar ideologiyaları uğrunda deyil, sevdikləri insanın azadlığı uğrunda qalxıblar ayağa. əgər azərbaycan xalqının heç olmasa 50 faizi onlar kimi olsaydı, bəlkə də bu dəqiqə ölkə başçısı ilham əliyev yox, ilqar məmmədov olacaqdı.

24 noyabr 2015 türkiyənin rusiya təyyarəsini vurması

baş verən hadisə ilə bağlı sadə insanların çıxardığı nəticələrin heç birini düzgün saymıram. çünki, orda baş verən hadisələri, yalnız, mediada oxuduğu xəbərlərin köməkliyi ilə təhlil edir hamı. heç kəs, siyasi liderlərin, bu hadisələrdə əli olan insanların beynindəkiləri oxuya bilmirsə onların məqsədlərinin nə olduğunu tam olaraq bilə bilməz. yəni, "erdoğan işidlə əlbirdi deyə rusiya təyyarəsini vurdu", "türkiyə natonun tırkasına gedərək rusiya təyyarəsini vurdu" kimi böyük cümlələrlə məsələyə aydınlıq gətirə bilməzsiniz. bu dedikləriniz, sadəcə olaraq sizin təxminlərinizdir.

qismət məmmədzadə

Azərbaycanın gözəl səsə malik müğənnilərindən biri. Bir az əvvəl öz şəxsi facebook profilində belə bir status yazıb:
"ƏZiZ DOSTLARIM LÜTFƏN OXUYUN.
Artıq neçə aydır ki mənə efirlərdə niyə görünmədiyim barədə suallar yazılır. Hər kəsə tək-tək cavab vermək imkanım olmadığı üçün ümumi olaraq bu statusla cavab yazıram.
Bu ilin aprel ayından etibarən facebook səhifəmdəki müxalif yönlü paylaşımlarıma görə (sonradan bir güvənli mənbədən öyrəndim ki, ən çox da M. Ə. Rəsulzadə ilə bağlı paylaşımlarıma görə) (!) Azərbaycan telekanallarına mənimlə bağlı qadağa qoyulub.
Belə ki aprel ayında ATV kanalının bir prodüseri zəng vuraraq öncədən dəvət etdikləri bir verilişə gəlməyimin daha lazım olmadığını bildirdi. Sonra ictimai TV-dən kliplərim yığışdırıldı. Daha sonra isə Lider TV-yə öncədən dəvət olunduğum bir çəkiliş üçün getdiyim zaman efir rejissoru mənə "yuxarıdan" göstəriş olduğunu və kanalın binasını təcili tərk etməli olduğumu bildirdi. Və sairə və ilaxır....
Yalnız ANS istisna oldu və məni bu kanalda iyun ayına qədər iki verilişə dəvət etdilər. Bu da çox hörmətli Kamran Həsənlinin təşəbbüsü nəticəsində baş verdi.
Qısacası o vaxtdan indiyə qədər bu qadağa hələ də davam edir.
Bu barədə deyəcək sözüm çoxdu amma uzatmadan sonda bir şey də deyim.
Bu hadisəyə görə əsla üzülmürəm. Çünki qadağanı qoyan məmur hər kimdisə bu qərarı ilə özü də bilmədən mənə böyük bir yaxşılıq etdi və Azərbaycan TV-lərində baş verən və hər gün bir az daha artan məddahlıqdan, yaltaqlıqdan və səviyyəsizlikdən məni kənarlaşdırdı.
Sayqılarla, QiSMƏT MƏMMƏDZADƏ."

13 noyabr 2015 parisdə partlayış

"niyə ərəb ölkələrində olan insan ölümlərinə bu qədər reaksiya verilmir?" sualına üzeyir hacıbəyov illər öncə, öz yazdığı məqaləsində cavab verib.:

"biz ilə yevropalıların fərqi".
yevropalılar ağappaq və tərtəmiz bir libas kimidirlər. biz də kirdən rəngi məlum olmayan mündəris bir paltar kimiyik. odur ki, haman ağ və tərtəmiz paltarın üstə bir balaca ləkə düşəndə, o saat məlum eləyir, amma kirli paltarın üstünə min o qədər ləkə düşsün, məlum eləməz. o səbəbdəndir ki, məsələn, firəngistanda birisi ildə, ayda bazarda bir güllə atanda qəzetlər bir həftə o barədə danışırlar, camaat böyük həyəcana düşür... halbuki bizim yerdə gündə beş-altı adam öldürürlər, heç kəsin qulağına girmir...
ağappaq qar kimi təmiz bir pencəyin üstünə bir damcı mürəkkəb düşərsə, yarım verstən məlum eləyər, amma bizim bədənimizdəki çirkin paltarın üstünə bir girvənkə mazur tök, bir addımdan məlum eləməz.

13 noyabr 2015 parisdə partlayış

bu gün bakı vaxtı ilə saat 02:00 radələrindən başlayaraq 7 müxtəlif yerdə terror aktı törədilib. ən az 129 nəfərin öldürüldüyü, 352 nəfər yaralıdan 99-unun vəziyyətinin ağır olduğu bildirilir.

ən son yenilənmə: 15.11.2015, 16:26

• "le bataclan" adlı konsert zalında insanlar girov götürülüb və 89 nəfər öldürülüb. polislərin əməliyyatı başa çatıb. 4 nəfər terrorist öldürülüb. qurtulan girovlar terroristlərin təkbir gətirdiklərini və polisə qumbara atdıqlarını dedi. zaldan sağ çıxmış bir girov, terroristlərin "fransa suriyaya müdaxilə etməməliydi" dediyini ifadə etdi.

• digər 3 yerdə isə 39 nəfər öldürülüb.

• paris polisi, ümumilikdə 8 terroristin zərərsizləşdirdiyini açıqlayıb.

• 1955-ci ildən bu yana, ilk dəfə ölkədə fövqəladə vəziyyət elan edilib. bütün sərhədlər bağlanılıb. prezident tərəfindən 3 günlük yas elan olunub.

• işid bütün hadisələri öz üzərinə götürüb.