reyn


93   0   0   0
4.nəsil yazar
entry: 93
reytinq: 2,995
karma: 2,016 karma
izləyən: 68
oxunma: 31,697
sifariş sayı: 3




mən xoşbəxt bir məstanam, yaşasam da, ölsəm də

(youtube: )




ikinci qarabağ müharibəsi

Bu gün başlamasından bir il ötən, keçən ilin bu günündən müharibə bitincəyə kimi 7-dən 70-ə, proqressivindən patriotuna xalqın gözünü cəbhəyə dikən, 44 günü 44 il kimi gələn, üç min insana yaxın şəhid verdiyimiz, sözün əsl mənasında, ürək dağlayan, sağalmayan yaralar açan, dəhşətlərlə dolu müharibədir.
Keçən ilin bu günü səhər 8 idi, elə təzəcə yuxudan ayılmışdım, qardaşım gəlib dedi ki, müharibə başlayıb, ay reyn, interneti də vurublar, əməlli-başlı döyüş gedir. inanmadım birinci, nətər yəni müharibə başlayıb? "Əşi e, azərbaycan müharibə edəndir? Aprel döyüşləri kimi olar, uzaqbaşı putin oyanıncaya qədərdir" dedim ilk öncə, amma içimə də qurd düşmüşdü axı, tv-ni açıb, həyəcandan yerdə oturub, cəbhədən gələn bir sorağa həsrət, bir yandan qorxu ilə izləməyə başlayırdım xəbərləri ki, birdən ciddiləşər vəziyyət. Həmin vaxt elə yerdə idik ki, cəbhəyə gedənləri yola çıxanda rahatCa görə bilirdik, yanımızdan keçib gedəcəkdilər bir azdan. günorta olmamış qonşular hay saldı ki, tanklar, hərbi maşınlar gedir, içində də əsgərlər. hamı küçəyə axışırdı, birlik var idi o gün, indi internetdə dolaşan videoların bəziləri o gün çəkilmişdi elə, kimin əlindən nə gəlirdi kömək etməyə çalışırdı, bəziləri maşını itələyir, balaca uşaqlar aldıqları suyu, vaflini, şokoladı verməyə çalışırdı, böyüklər kaset-kaset su yükləməyə cəhd eləyirdi, analar ağlayırdı, insan bilmirdi ki, heç vaxt bu ölkədə görmədiyi birliyə duyğulansın o an, yoxsa ölümə gülümsəyərək, coşğu ilə gedən əsgərlərə.
Sonra Evə gəldik, televizorda "murovdağ silsiləsindəki yüksəkliklər azad olunub" xəbərləri yayıldı. Axşam çıxdı məlum şəxs tv-yə, qismən səfərbərlik elan elədi, onda qardaşım dedi ki, məni uzaqbaşı sabaha çağıracaqlar, özünüzü tox tutun, qorxmayın. Dediyi kimi də oldu elə, 2 gün sonra qardaşımı yola saldıq cəbhəyə. O qədər qəribə situasiya idi ki, insan heç dərk etmirdi o an ən əzizinin hansı od-alovun içinə getdiyini. Donuq qalmışdım, müharibəyə aid hər şey donuqlaşdırmışdı məni, ümumiyyətlə, azad olunan heç bir yerə sevinə bilmirdim can getdiyi üçün, evdəkilərdən keçib, yanlarında ağlaya da bilmirdim ağlamaq üçün bir himə bənd idilər deyə. Çox dramatik idi. getsin, qayıtmasın o günlər.
indi o günləri xatırlayanda necə dözmüşəm deyirəm. Həqiqi ha. necə ürəyim partlamayıb o nigaranlığın, o bilinməzliyin, o kədərin qarşılığında. Hər telefonla danışanda "Özünü qoru" deməklə əlindəymiş kimi özünü silahdan, çətinlikdən qoruyacağına, ona heç bir şey olmayacağına inanırdım, gün ərzində ondan bircə dəfə 10-15 saniyə "yaxşıyam" sözünü eşidəndə elə bilirdim, getdi daha təhlükə, yaxşıdır hər şey. Həyat üzümüzə gülmüşdü amma, sağ qaldı.

Müharibə Cəbhəsi, bərdəsi, gəncəsi ilə, hamısında yarım qalmış həyatlar, hamısında deyilməmiş son sözlər buraxdı, sağ qalanların hamısında bir travma yarandı. O günlər hiss etdiklərimi heç vaxt unutmayım, müharibə dəhşətini yadırğamayım deyə şəhid şahin allahyarovun videosunu yükləmişdim telefona keçən noyabrda, mütəmadi olaraq xatırlayıram onu, daha doğrusu, müharibə deyən kimi ilk onu xatırlayıram "bu videoya baxıb heç vaxt ağlamayın" dediyi yerdə, yəqin ki, minlərlə insanı ağladıb, yüzlərlə şəhidin ailəsinə deyə bilmədiyi son sözləri deyib.

(youtube: )

Bu arada, Qonşumuzla qohumdurlar, bir dəfə görmək fürsətim də olub oğlunu, çox göyçək oğlu böyüyür indi. vəsiyyət etdiyi kimi: öz adıyla.

Bu gün ilk anım günüdür.
Gecədən yata bilməmişəm, içim çölümə sığmır, mən beləyəmsə, bu günlərdə oğlunu itirən ananı, qardaşını itirən bacını, atasını itirən uşağı təsəvvür edə bilmirəm. Yazmışdım o vaxt sözlüyə, Binamıza bir şəhid gəlmişdi, son dəfə sentyabrın 26-sı axşam evdən çıxıb, oktyabrın sonunda şəhid olub, bir qardaşı var 10 yaşında. Saat 12-də "Beşikdə insan doğular* məzarda yatmaq üçün, qəhrəmanlar can verər yurdu yaşatmaq üçün" deyə qışqırırdı həyətdə, onsuz bu cümlə həmişə ürəyimi qısır, balaca uşaqdan eşitmək əməllicə qan dondururdu, özümü zorla saxladım düşüb onla ağlamamaq üçün.
müharibə ilə bağlı həmişə olduğu kimi yenə əlimdən gələn tək şey ümid etməkdir. Bir daha heç vaxt şəhid verməyəcəyimizə, insan canının getməyəcəyinə dair ümid etmək. Nur içində, rahat yatsın hamısı.
Unutmamışıq, unutmamalıyıq.

35 əjdaha! reyn

27.09.2021 - 06:39 #337316 mesaj facebook twitter

gaslighting

Psixoloji manipulyasiya, şiddət. toksik münasibətin olmazsa olmazı.
Etimologiyası patrick hamilton-un 1938 istehsalı "gas light" adlı səhnə oyunu ilə əlaqəlidir. Oyun bella və jack adlı evli cütlüyün həyatından bəhs edir, burada jack hər ötən gün bellanı qaz lampası sayəsində asta-asta manipulyasiya edir. O Belladan xəbərsiz hər gecə qaz lampalarının işığını qısır, bella tədricən işığın daha da azaldığını deyəndə isə, onu getdikcə ağlını itirməklə, dəli olmaqla günahlandırır. Bənzər ssenaridə 1940 və 1944-cü illərdə Çəkilmiş "gaslight" filmi də Var, xüsusilə 1944 istehsalı olan izlənəsi filmdir.

Gaslighting Hər cür münasibətdə: iş həyatında, özəl həyatda, ailə daxilində özünü göstərə bilir. "Bəs nədir bu gaslighting?" desəniz, Qarşı tərəfi Manipulyasiya etmək, özündən şübhə etməyinə səbəb olmaq, olmayan şeyin varlığına inandırmaq, bariz, açıq-aydın olan bir şeyin də olmadığı yalanının diqtə edilməsidir.

Gaslightingə məruz qalan insan tərəfindən içində olduğu vəziyyəti anlamaq kompleks hala gəlir, Çünki Adətən Sevib, dəyər verdiyiniz insanlar tərəfindən buna məruz qalırsınız, qarşı tərəfə verdiyiniz dəyər, onu itirmə qorxusu ucbatından bu tənələri, manipulyasiyanı gözardı etməyinizə, boyun əyməyinizə, travmaya səbəbiyyət verir. "Şişirdirsən", "böyüdürsən", "yorursan", "səhv başa düşürsən" tipli cümlələrlə başlayıb, "mən, əslində, sənin yaxşılığını istəyirəm, amma.." tipli cümlələrlə davam edərək ömrünüzü-gününüzü qara eləyir. Həmişə tənqid olunan* sizsiniz, hər hərəkətiniz qarşı tərəfdən histerik, neqativ, yorucu olaraq qiymətləndirilir. gaslightingə məruz qaldığınızı anlamaq vaxt alır, məşəqqətli yol qət etməli olursunuz buna görə də. Uzun müddətdən sonra, O insanın sizə vurduğu ziyanı dərk edirsiniz, fəqət nə formada ziyan vurduğunu, aranızdakı problemi başa sala, qarnınızın azarını hər hansısa bir dostunuza, yaxınınıza izah edə bilmirsinizsə, 90% gaslightingə məruz qalmısınız deməkdir. Mən bu vəsilə ilə anlamışdım ən azından.
Xəfifə alınacaq cinsdən bir zəhrimar deyil, Toksik münasibətiniz nəticəsində, həqiqətən, Neqativləşirsiniz. Birbaşa Özünüzə olan inancınızı zədələyir, insanı paranoyak, şübhəçi, bambaşqa birinə çevirir. Mən təxminən 2 il girinc olub, histerik, zəhlə tökəcək dərəcədə həssas olduğuma inandırılmışdım məsələn. Çətinliklə Münasibəti bitirdikdən sonra belə xəsarətlərini görmək mümkün, təsirindən çıxmaq çətindir, xatırlayanda üzümü buruşduracaq qədər aciz vəziyyətLərə düşdüyümü görürəm indi. Mərsiyə demək istəmirəm haha, bu qədərini belə Yazınca yoruldum, yaşaması sizdən iraq. Düşünürəm ki, hər insanın, xüsusilə də yeniyetmələrin bilgiləndirilməli olduğu məsələlərdən biridir.

daha ətraflı link
əlaqəli yt videosu link

13 əjdaha! reyn

24.09.2021 - 00:04 #337075 mesaj facebook twitter

böyük qardaş

Gördüyüm qədəri ilə, Azərbaycanda xüsusilə, qadınların * ya ən böyük sınağı, ya da dayağı.

Bu gün universitet vaxtı yaxın olduğumuz, sonra anidən dərslərə gəlməməyə başlayan, hər vəchlə çalışıb, xəbər-ətər ala bilmədiyim bir qızın xalasıqızı ilə qarşılaşdıq 28-də, qızı xəbər alanda birdən elə qeyb olmasının səbəbinin böyük qardaşının qızın sevgilisi olduğunu öyrənməsi olduğunu dedi, telefonu əlindən alıb, whatsappı silib, dərsə də gəlməyə icazə verməyib, danışmağa cəhd edən insanları da söyüb, "əxlaqsızlıq elə, namus belə, bizdə belədir" deyə çərənləyib, uzaqlaşdırıb qızdan, nəticədə qız hələ də məzun ola bilməyib, indi rayondadır. Çox kədərli deyil?

Rəhmətlik nənəm hər dəfə ağrıyanda "canın candan xəbəri olmur" deyirdi, bu da bənzər bir şeydir, zənnimcə, hansı perspektivdən baxırsansa bax, yaşamayan bilmir ağırlığını, təsirlərini. Hazırlıq vaxtı Ən yaxın dostumun başına gələndə "nə qədər ciddi ola bilər ki?" Deyə düşünüb, "dik dur sən, icazə vermə sənə müdaxilə etsin, atan və ananla danış, bir əlac tapacaqlar, tapmasalar biz danışarıq" kimi məsləhətlər verirdim qanmaz və uşaq ağlımla, qız bu sözlərin a-sını deyə bilmədən əlinə qaynar qaşıq basıb, "o oğraş əlini tutsa, əlini də kəsərəm" deyib elə göndəmişdi hazırlığa qardaşı. Biz Həll etməyə çalışdıqca, qızı daha da incitmişdi. Digər bir bənzəri, 11-ci sinifdə bir dostumun sevgilisi olduğu üçün qardaşı 2 il danışmamışdı onunla. Bəli, danışmamışdı. Bir evin içində. Altını xətləmək istəyirəm ki, bütün bunlar bakıda yaşanıb, hər hansısa bir rayonda deyil, vəziyyət bu qədər gərgindir hələ də.
Pathetic olsa da, reallıq budur, hamıya aşinadır bizim oğlanların "namus" və "qeyrət" gözətçiliyi, ailələrin, yəni ana və atanın buna göz yumması.
il olub 2021 bunu hələ də yaşayan minlərlə qadın var. başa düşürəm hər kəs öz bacısını bu murdar cəmiyyətdən qorumaq istəyir, fəqət unudur ki, o qız "filankəsin bacısı" deyil, o qız da ayrıca bir fərddir, Çıxış yolu qızın həyatını məhdudlaşdırmaq, qızı sevdiyi üçün günah, yanlış bir şey edirmiş kimi bu formada "cəzalandırmaq" deyil. Utanılacaq bir qardaş olmayın, həyat məhv etməyin, lütfən.

Beynimin içindəki fikirlər qaralama dəftəri kimi olanda, boğulanda həmişə düşünürəm ki, deyəsən, həyatdakı ən böyük şansım belə bir qardaşa və anaya sahib olmağım olub. Qardaşım məndən 4 yaş böyükdür və hələ də "Hara getdin?", "niyə getdin?", "o nə geyim idi elə?", "o kim idi?", "kiminlə danışırsan?" kimi suallar ünvanlamayıb, məhdudiyyətlər qoymayıb qarşıma, "Qorumaq" adı ilə həyatıma müdaxilə etməyib. Sağlam münasibətimiz olub, uşaqlıqda mən yersiz ləktə, o sakit olduğumuzdan da həmişə yola verib məni, evdə futbol oynayanda sındırdığım şüşənin günahın öz boynuna götürüb-* yeniyetməlikdə yanlış yoldan irəlilədiyimi görəndə "güvənimi sarsma, xahiş edirəm" deməsi sayəsində özümdə səhvlər görməyimə və bunları düzəltməyimə səbəb olub, nə bağırtı, nə qışqırtı, nə də məhdudiyyətlə həll etmişik problemimizi.
hər şeydən əlavə, indi formalaşan mənə, zövqümə çox böyük təsiri olub, fantastika ilə, oyunlarla, pink floydla, anime ilə, və ən əsası məni sözlüklə o tanış edib-*
6 il əvvəl bakı dövlət universiteti haqqında entry oxuyub güləndə "bizim də ekşi tərzində sözlüyümüz var, yazıram orda, gəl bir göz ataq da", deməsi ilə 6 il əvvəl sözlükdə soyuq sentyabr gecələrinin sonlarındadffd bu hesabla qeydiyyatdan keçmişəm. O gündən onun nickini tapa bilməmişəm, yığıb-yığışa da bilməmişəm sözlükdən *
Arada görürəm ki, Yaşımız artdıqca məsuliyyətimiz çoxalır, bəzən yollarımız ayrılır. içimdən ancaq illərin bu səmimiyyəti köhnəltməməsini, daim onunla vaxt keçirməkdən bu dərəcə zövq almağı diləyirəm.-*
Həmişə yaxınlarıma, xüsusilə yeni tanış olduğum birinə ilk dəfə qardaşım barədə danışanda çox böyük fəxrlə, həvəslə danışdığımı deyirlər. Elə heyranlıq duyuram, deyəsən, qardaşıma. Bəlkə də, ironikdir, normal qardaşın olması gərəkdiyi kimi bir qardaşa sahib olduğum üçün duyduğum heyranlıq.

36 əjdaha! reyn

21.09.2021 - 22:54 #336958 mesaj facebook twitter

insan nə ilə yaşayır

Lev tolstoyun kiçikhəcmli, axıcı əsəri. Əsərdə günah işlədən Bir mələyin Yenidən səmaya qayıtmaq üçün yerə enərək "insan nə ilə yaşayır?" Sualına cavab axtarmalı, həyatın mənasını dərk etməli olduğundan danışılır.
Tolstoyun dinə sığındığı zaman qələmə aldığı kitablarından biri olduğu üçün kitabda incildən izlər tapmaq mümkündür.

spoiler
Əsərin əsas personajları çəkməçi olan semyon, onun həyat yoldaşı və səmadan qovulmuş mələkdir. Çətinliklə dolanan çəkməçi gördüyü işə görə əməyinin qarşılığını almağa gedəndə kilsənin yanında ağartı görür, yaxınlaşdıqca bu ağartının çılpaq, insanabənzər bir varlıq olduğunu anlayır, Yanından ötüb keçir, yolun ortasında geriyə baxanda tərəddüd içində qalır, ölməkdə olan birinə yardım etmədiyi üçün vicdanı sızıldayır, geriyə dönüb həmin şəxsə yaxınlaşır, burada nə etdiyini soraq etdikdən sonra mərhəmət göstərib onu evinə dəvət edir və daha sonra ona iş verir. Kitabın əsas qayəsini çatdırmaqda bu hadisənin böyük önəmi var. Tolstoy kitabda yazır:
"indi insanlar özlərini düşündükləri üçün yaşadıqlarını fikirləşsələr də, əslində ancaq sevgi ilə yaşadıqlarını başa düşürəm. Kimdə sevgi varsa, O tanrının yanındadır, tanrı da onunladır, çünki tanrı özü elə sevgidir."
Onun bu fəlsəfəsi bir növ Hüseyn cavidin "mənim tanrım gözəllikdir, sevgidir" fəlsəfəsi ilə səsləşir.
Sevgi, sevginin sağlam olan hər formasının insanı gözəlləşdirdiyini, neçə yaşında olursa olsun, dəyişdiyini müdafiə etmişəm həmişə, fəqət "yaşamaq üçün sevgi yetirmi?" Deyə sorğuladığım günlərdəyəm. Qəliz, nisbi və müzakirəyə açıq sualdır.
spoiler

Bu aralar instagramda, metroda tez-tez qabağıma çıxırdı bu kitab, oxusanız, vaxt itkisi olmaz, çox qısa, axıcı əsərdir, göz qırpımında bitər, hətta azyaşlı uşaqların da göz atmalı olduğu kitablardan biridir deyə düşünürəm, həm kiçik, həm insanın içini isidən, həm də düşünməyə sövq edən.

7 əjdaha! reyn

20.09.2021 - 00:03 #336821 mesaj facebook twitter

fernando pessoa

"istəmədən varam, istəmədən də öləcəyəm, olduğum şeylə, olmaq istədiyim şey arasında, xəyal etdiyim şeylə, həyatın məni etdiyi şey arasındakı boşluğam" sözlərinin sahibi yazar.
(bax: the book of disquiet )

14 əjdaha! reyn

19.09.2021 - 00:50 #336752 mesaj facebook twitter

kaiho

Fin dilində "Əskikliyi hiss edilən, ölüm ya ayrılıq səbəbindən artıq əlaqə qura bilməyəcəyimiz birinə qarşı hiss etdiyimiz həsrət hissi" mənasına gəlir. Nostalgiya və ümidsizliklə bərabər gəlir gələndə bu hiss.
hər cür həsrət ruhu gəmirir onsuz.

4 əjdaha! reyn

19.09.2021 - 00:41 #336750 mesaj facebook twitter

aşiq olduğunu anladığın an

Üzdə təbəssüm yaradan başlıq-*
xüsusilə ilk vaxtlar, Qarşına çıxan, ünsiyyətdə olduğun hər kəsə ağız dolusu ondan danışmağa başladığın, ondan danışmaq istədiyin andır. Mədəndə kəpənəklərin uçuşmasından daha çox fil təpişməsini hiss edirsən, bir də görürsən adicə qab yuyanda, iş görəndə, avtobusda onu düşünüb, gülümsəməyə, ağaca, divara baxıb qımışmağa başlamısan, uşaqlaşırsan, şənləşirsən, gözəlləşirsən, daha yaxşı insan olmağa çalışırsan özündən asılı olmadan. Çox yaşamağa dəyər hissdir, çox.-*
Hər şey düz getməyəndə də sevginin altında əzilirsən, nə qədər əziləcəyin ona nə qədər "tutulduğundan" asılı olur.
Bir də bu mahnını dinləyib, onu düşünürsənsə, təbriklər -*

(youtube: )

21 əjdaha! reyn

05.09.2021 - 21:46 #335607 mesaj facebook twitter

ai-art.tokyo

Süni intellekt sayəsində istədiyiniz şəkli renessans rəsminə çevirən sayt. Səhifə açılan kimi "try it now" düyməsinə klikləyib, şəkli yükləyə bilərsiniz. Ən çox gözümü oxşayan mənzərə rəsmləri oldu.-*


Bu isə, əslində, pişik idi...olsun.. pişiyimə dədələrinin renessans portretlərini tapmışam deyə sırıyacam *

18 əjdaha! reyn

27.08.2021 - 12:48 #334943 mesaj facebook twitter

9 əjdaha! reyn

27.08.2021 - 12:04 #334938 mesaj facebook twitter

sarabande

Barokko dövrünün görkəmli alman bəstəkarı george frideric handelin Ən dəyərli klassik musiqilərindən biridir.

(youtube: )

Düşünürəm ki, hüznü, Çöküşü, ən çox da xəyal qırıqlığını daha gözəl musiqi sədası ilə ifadə etmək mümkün olmazdı, tamamilə məyusluğun, xəyal qırıqlığının musiqi ilə ifadəsidir, mütləq ki, hər hansı dramatik filmdən, serialdan, ölüm səhnələrindən qulağımıza aşinadır.
Boğucu və mistik aurasından qaynaqlanan Ölüm öncəsi qorxu və ölüm sonrası kədərini xatırlatdığı üçün çoxları tərəfindən dəfnlərində çalınmasını istəyəcək qədər xüsusi musiqilərdən biridir.

Termin olaraq açıqlasam, ərəblərin təsiri ilə ispaniyada rəqs növü olaraq yaranmışdır ilk dəfə, olduqca yavaş, ləng hərəkətlərlə oynanılıb, barokko dövründə isə bu musiqi yaranaraq, şedevrə çevrilib.

haşiyəyə çıxıb, sarabandenin anidən niyə yadıma düşdüyünü də deyim-* axşam evə gələndə girdim marketə yumurta almağa, nikolaydan yumurta daşıya bilməmişəm onsuz, bu səfər də ayağım üstündə durmurdu yorğunluqdan, marketdən çıxanda pişik də gördüm lap ağzımı ayırıb pişiklə oynamağa başladığım moment aldığım 20 yumurta məni tərk eləyib, çırpıldı yerə, birdən qırıq-qırıq oldu, yığım-yığışdırım deyərkən, əynim-başım yumurta sarısı oldu, utandım bir də marketə girib təzədən yumurta almağa, kor-peşman yolun ortasında aralarından ayırdığım 3 yumurta ilə getdim evə, gedə-gedə ilk ağlıma gələn bu musiqi oldu, bilmədim güləm ya əsəbdən ağlayam*, musiqisin mızıldana-mızıldana girdim evə.
sözümün canı, Adətən bütün əttökən, üzqızardan xatirələrimi gözəlləşdirir eyni zamanda ağlımda çalması ilə-*

7 əjdaha! reyn

25.08.2021 - 00:13 #334756 mesaj facebook twitter

emil cioran

"Bədbəxtliyi sevdirən filosof" olaraq tanınan ruminiyalı filosof. Mövcudluq ağrısını hər sətri ilə dilə gətirən, nihilistliyini olduğu kimi kitablarına yansıdan, pessimist fikirləriylə insanı həm düşündürən, həm narahat edən şəxsiyyətdir.
Adətən insanı içdən-içə gəmirən fikirləri olduğu kimi yazdığı üçün Kitablarını təhlil etmək, üzərinə düşünmək, həzm etmək yorsa da, kitabındakı fikirləri altını xətləyə-xətləyə, notlara qeyd edə-edə oxunası biridir. Olsun ki, mənim həyata qarşı olan optimist mövqeyimə bu qədər tərs düşdüyü üçün ovsunlayıb məni, bilmirəm.-*

Filosof a short story of decay, All Gall Is Divided, history and utopia, The Fall into Time, The New Gods kimi kitabların müəllifidir.
"Fikirlərin bir-birinin yerinə keçə bildiyini qəbul etməməkdə israr edildiyi zaman qan axar" Deyə bir aforizm görmüşdüm şəxsi tərəfindən səsləndirilmiş, ondan sonra kitablarını oxuma qərarına gəlmişdim. Normal insanın heçlikdən başqa bir şeyə tutunmamalı olduğunu söylədiyi Çürümənin kitabını 1949-cu ildə yazıb, kitabda fanatizm, peyğəmbər, tanrı içində yox olmaq, qayğı, ölüm mövzularına toxunur. Aforizm məharətini ən aydın formada göstərdiyi kitabdır deyə düşünürəm.
*

Haqqında Paylaşmaq istədiyim iki video var:
Birincisi, A century of writers sənədli Serialının emil cioran haqqında olan bölümü. fransızcadan türk dilinə ümid gurbanov tərcümə edib.

(youtube: )

Burada bioqrafiyası: Doğumu, uşaqlığı, təhsili yetkinliyi, görüşləri öz əksini tapıb.

ikincisi isə, 1973-cü ildəki nihilizm, dostlar, intihar,
fyodor mixayloviç dostoyevski, johann sebastian bach sevgisi haqqında danışdığı müsahibəsi.
(youtube: )

Xaraktercə qəliz biri olubmuş kimi gəldi mənə izləyəndə, bundan əlavə, özünə heç bir qəlibi, sifəti yaraşdırmır, məsələn, nə nihilist, nə inanclı, nə inancsız, nə üsyankar olaraq görür özünü. intihar barədə belə bir mühakimə yürüdüb müsahibədə: "yaşamağa davam etməyimə səbəb olan şey hər zaman intihar kimi bir Seçimimin olduğunu bilməyim olub, həyatımdakı bütün çətin anların belə bir seçimimin olduğunu nəzərə alaraq öhdəsindən gəlmişəm, intihar fikrinə sığınmaq şərti ilə hər şeyə Qarşı qoya biləcəyimizə inanıram".

Cioran antinatalist olub, ömrü boyunca da evlənməmişdir: "Dünyaya gətirmək istəmədiyim uşaqlar kaş mənə nə qədər borclu olduqlarını bilsəydilər".

Ən maraqlısı isə, bu qədər pessimistliyinə, yaşamağa olan nifrətinə baxmayaraq, intiharı bəzən lazımsız, bəzən cibdə görməsi sayəsində alzheimer olub, 84 yaşında ölməsidir. intihar edən insanlar barədə all gall is divided kitabında həmişə düşünüb də, sətirlərə tökə bilmədiyim bir cümləsi var idi:
"Only optimists commit suicide, optimists who no longer succeed at being optimists. The others, having no reason to live, why would they have any to die?"

Oxumağa dəyər biridir rəhmətlik.
əlaqəli video 1 link
əlaqəli video 2 link

12 əjdaha! reyn

21.08.2021 - 12:31 #334546 mesaj facebook twitter

israrla səhv yazılan sözlər

Part 1 üçün: #286203
*
Başlıqda çox yazılsa da, xatırlatma məqsədilə qeyd edim ki, tövsiyə, məşhur, səbirli, heyif sözlərinin düzgün yazılışı bu formadadır. Başladıq:

Bu günki, bugünki deyil, bugünkü.
Hərgünkü, hərgecəki də eyni şəkildə, sifət əmələ gətirən "ki" şəkilçisi sözlərə bitişik yazılır.

Qarmaqarışıq yox, qarma-qarışıq.
Dediqodu yox, dedi-qodu.
ikisi də qoşa sözdür, bəzən ayrılıqda mənaları olur, bəzən isə olmur, iki halda da defislə yazılmalıdır.

Çatışmamazlıq deyil, çatışmazlıq. Azərbaycan ədəbi dilinin normalarına əsasən iki inkar şəkilçisi bir sözdə istifadə oluna bilməz.

Narahatçılıq deyil, narahatlıq
Narahatçılıq, nigarançılıq tipli sözlərdəki çı⁴ şəkilçisi artıqdır, çünki "lıq" şəkilçisi isimdən isim düzəldən şəkilçidir, bu şəkilçini sözdən çıxardıqda söz "narahatçı" formasında qalır və dilimizdə belə bir söz, onun mənası, əsası olmadığı üçün Sözün düzgün yazılış forması, narahatlıqdır, eləcə də nigaranlıq, sakitlik və bu tipli sözlər də bura daxildir.
Bekarçılıq, bekarlıq deyil, bikarlıq *

Orginal, original, orjinal deyil, orijinal
Biruzə deyil, büruzə
Aidiyyat deyil, aiddiyyət

Nəqarət deyil, nəqərat. Nə qədər yazması ələ yatmasa da-*

Ötgün deyil, ötkün.
Tutğun deyil, tutqun.
Meyl etmək deyil, meyil etmək.
illuziya deyil, illüziya.
Hallusinasiya deyil, hallüsinasiya. *

Feyziab, feyziyyab deyil, feyzyab. Sözün kökü "feyz" ərəbcə "Fayda" deməkdir, "yab" isə "Yaftən" sözünün qrammatik əsası olub, "almaq" deməkdir. Etimologiyasın öyrənəndən sonra sözün yazılışını Unutmaq mümkün deyil, demək olar.

Ət tökən deyil, elə əttökən
Bilgi kirliliyi çoxdur bu söz barədə.
Eləcə də vaxt aşırı deyil, vaxtaşırı.
Öz fəaliyyət deyil, özfəaliyyət.
il dönümü deyil, ildönümü
Geniş miqyaslı deyil, genişmiqyaslı.
(Genişürəkli, genişÖlçülü və s. Tipli sözlər də eyni formada.)
iki müstəqil sözün birləşməsindən əmələ gəldiyi üçün birləşik* yazılır bu tipli sözlər.

*

24 əjdaha! reyn

19.08.2021 - 12:26 #334449 mesaj facebook twitter

nessi gomes

Dərviş təsiri bağışlayan, səsinə quzu kəsiləsi, can-ciyər portuqal musiqiçisi.
All related kimi gülməşəkərimə çevrilmiş parçası ilə ikinci dəfə dünyadan sesler kanalında tanış olandan bezmədən-usanmadan dinləyirəm hər mahnısını. Yaradır da.
səsi və kliplərinin vəhdəti insanı olduğu məkandan uzaqlaşdırıb, ucsuz-bucaqsız bir gözəlliyə itələyir. Bir az da romantikləşsəm, yuxusuz gecələrimə rəng qatırsddg. Xüsusilə, bağda, meşədə, təbiətlə iç-içə olanda dinlənəsi sənətçilərdəndir.
mahnılarının sözləri dünyəvi sevgi, hikmət üzərinə olur deyə tumarlanır dinləyici.
Novo amanhecer kimi hüzur, sakitlik abidəsi sayılan, underrated parçası ikinci favorimdir:

(youtube: )


As you will kimi də narahatlığımı ovudan bir parçasını da paylaşım, gedirəm-*
(youtube: )

*

4 əjdaha! reyn

14.08.2021 - 15:02 #334180 mesaj facebook twitter

mariko aoki fenomeni

Kitabxanalarda, kitab evlərində, bukinistlərdə tez-tez defekasiya ehtiyacımızın yarandığını iddia edən fenomen. *
Fenomen mariko aoki adlı yapon bir qadının adı ilə bağlıdır. Mariko 1980-ci illərdə oxucusu olduğu bir jurnala nə vaxt kitabxanalara getsə, bağırsaqlarının sürətlə çalışdığını və Defekasiya Ehtiyacının yarandığını deyir. Marikonun məqaləsi yayımlandıqdan sonra bir çox oxucu da marikonun dediklərinə qatılmaqla, eynisini yaşadıqlarını iddia edirlər və beləcə fenomen ortalığa çıxır
Hələ də tibbi olaraq sübut olunmasa da, fenomen haqqında bir çox hipotezlər mövcuddur. araşdırmalardan biri də texas tech university-də professorluq edən Sameer islamın adıyla əlaqəlidir. O qeyd edir ki, yalnızca kitabxanalarda deyil, eyni zamanda muzey kimi sakit-səssiz məkanda da bağırsaqlarımız sürətlə işləməyə başlayır, Kitabxanalarda isə bu aktın yaranmasına səbəbiyyət verən şeylərdən biri də bizə təqdim olunan kitablar və içindəki sonsuz bilgidir, Hətta bəzi nəzəriyyələr Köhnə kağız, mürəkkəb qoxusunun da bunu tətiklədiyini deyir.
Keçən həftəsonu eynisi bukinistləri gəzdirdiyim türk dostumun başına gəlmişdi, elə internetdə dolana-dolana tapdım bunu da-*
Mənbə olaraq buyurunuz efenim link

7 əjdaha! reyn

11.08.2021 - 12:03 #333838 mesaj facebook twitter

ən nifrət edilən insan tipi

"nifrət" bir az ağır səslənir, "sevilməyən" deyək biz ona-*

Məsləhət vermək xatirinə məsləhət verən tiplər.*
Hara baxıram, ətraf "anı yaşa", "işəməyin gələndə tualetə get < 3", "həyat gözəldir < 3" deyə məsləhət vermək adıyla gəzən dəxilsiz insanlarla doludur. O qədər asandır ki onlar üçün dəxilli-dəxilsiz birinin həyatına qarışmaq, izinsiz müdaxilə etmək, alçaltmaq.
Xüsusilə, bu ay iş yerində qarnına yeməyi güclə alan birinə "Mütləq nyabrana gedib dincyalmalisan" tipli məsləhətlər verənlər görürəm. Əlim ağzımda, gözüm bərələ qalıram.

Şəxsiyyəti olmayan, götəgirən tiplər. Məktəbdə, universitetdə, iş yerində, hər yerdədirlər, hər yerdə.
Müdirin arxasınca danışıb, müdir şit zarafat edəndə sırf gözə batmasınlar deyə "əhəhəhə" deyə Gülən tiplərlə çevrələnmişəm, Biri dayanıb düz qabağımda, entryni yaza-yaza çönüb sifətinə baxdım, Tıncıxıram, ay dədə.
Bir üst modelləri də insanlardan maddi və mənəvi istifadə etməyə çalışan "istifadəçi" insanlardır.

Heç nədən məmnun olmayan, daim Şikayət edən, hər şeyə neqativ yanaşan "ağzıəyri" insanlar. On barmağını bala yaxıb versən də, poxdur onlar üçün. Bəzən sadəcə problemsizliyi problem etdiklərini də düşünürəm. Bəxtiyar Vahabzadə bir şeirində
"Əgər olmasaydı dəryaca dərdim
Dərdin yoxluğunu mən dərd edərdim"

Deyə təsvir edir həmin tipləri. Çox sevərək istifadə eləyirəm mən də özlərinə qarşı. -*

Bir də ki, egosu sevgisindən böyük olan qalınqabıq, mərhəmətsiz insanlara da ürəyim yanır, elə yaşamaq Çətindir. Sad story bro-*

19 əjdaha! reyn

11.08.2021 - 11:55 #333837 mesaj facebook twitter

türkiyə

Hakimiyyəti "yuuuh" dedirtən ölkədir. Nətər işdirsə, hər dəfə pis mənada daha da təəccübləndirməyi bacarırlar məni.
28 iyul 2021 türkiyədə meşə yanğınlarının başlamasından sonra səriştəsizliklərindən ölkənin dörd bir yanını alıb yanğın, marmarisi söndürmək mümkün deyil, hazırda zeytun ağacları yanır, camaat qayıqla zorla təxliyyə olunur, iqtidar ortalıqda yoxdur, tək düşündüklərinin də meşə yox, xalq yox, turizm olduğunu təzə qəbul olunmuş qərarlarla görürük. media məhdudlaşdırılıb, Xalq içində çarəsizlik pik həddədir.

Digər yandan, Erdoğan yenə öz kefindədir, gah çay paylayır, hansı ki, çayı dilənən birinə belə o formada tullanmaz, tullanmamalıdır çay, gah yanğının səhərisi iban hesabı verəcəklərini deyib "halkımız cömerttir" deyə xalqdan yardım dilənən yan-yörəsi sonra çıxıb, " başqa ölkələrdən "kömək istəməyin, türkiyə güclüdür, heç kimə ehtiyacımız yoxdur" deyir, hansı ki, yanğında dindirilən ilk insan "nə olar, kömək edin, evimiz yanır, hər şeyimiz yanır" deyə yalvarır, qışqırır, yardım istəyir. Daha demirlər ki, yardım istəmək acizlik deyil axı, yanğını söndürə bilməməkdir acizlik.
gah da "elə evlər tikəcəyik ki, evləri yanmayanlar kaş bizim də evimiz yanaydı", "orman yangınlarını önleme hususunda afrikaya, balkanlara, orta asyaya hizmet verecek durumdayız" tərzində vicdansız açıqlamalar verir.

həyatı məhv olan da olanadır elə, 25 yaşındakı şahin akdemir özünü qurban verdi 5 gün əvvəl, hazırda həyat, ev və iş qavramları yoxdur yanğından əziyyət çəkənlərin, kimisi müalicə almaq üçün illərdir yığdığı pulu itirib yanğında, kimisi sadəcə yatmağa yarayan balaca daxmasını itirib, kimisi oğlunu, kimisi heyvanını, kimisi də hər şeyini, videoların hamısı qan dondurur.

heyvanların vəziyyətindən danışmaq mümkün deyil, itlərə baxırsan sağ qalanın gözü yaş, bədəni yaralarla dolu, quşlar öz yumurtalarını buraxmayıb yanğının ortasındaca məhv olurlar, ah-nalə səsi ilə doldudur meşə. onsuz müharibədən sonra gözüsulu olmuşuq, bu videolara da baxdıqca da içi dağlanır insanın. Əsl Vəhşətdir.


Bir də ortalıqda hələ də akp deyə çərənləyən, yağış duası oxuyan tiplər var, nə deyəsən, zarafat eləməyə belə dilim gəlmir, pişiyimin canı üçü. Heç cür gülə bilmirəm o cındırlara. demet evgarın çox qəşəng tviti var ümumi vəziyyət barədə:

23 əjdaha! reyn

04.08.2021 - 10:35 #333468 mesaj facebook twitter

xərçəng xəstəliyi

istər mənəvi, istər maddi, istər mental cəhətdən insanın ömrünü-gününü qara eləyən, el arasındakı "zəhrimar" sözünün haqqını verən xəstəlik, illət, zibil.
Sadə dillə, Bədəndəki ölmüş və zədələnmiş hüceyrələrin toplaşıb, anormal hüceyrələrə çevrilib, şişlər əmələ gətirməsidir xərçəng. Əksər xəstələrdə ilk görünən simptomlar halsızlıq, bədənin müxtəlif nahiyələrində bitməyən ağrılar, iştahsızlıqdan əmələ gələn hədsiz kilo itkisi və sifətin sanki 1 aya qocalması, qapqara, bəzən yaşılımsı rəng almasıdır.

Mən də xərçənglə xoş olmayan təcrübəmi paylaşım istəyirəm ucundan-qulağından.
Onsuz martda yazmışdım sözlüyə, Anam da serviks xərçəngi ilə mübarizə aparıb. serviks, digər adıyla uşaqlıq boynu xərçəngi qadınlarda döş xərçəngindən sonra ən çox rastlanan xərçəng növüdür. inanırsınız, Əvvəllər bu "xərçənglə mübarizə aparmaq" birləşməsi olduqca dramatik səsləndiyindən səmimi gəlməzdi mənə. işin içində olub, prosesi bütün çılpaqlığı ilə izləyəndə gördüm ki, həqiqətən, mübarizə imiş o zəhrimar ağrılara, cərrahiyyəyə, o qədər deşilməyə və dərmana dözmək. Elə ən böyük mübarizə bu imiş, xərçənglə başa çıxmağa mübarizə deyilməli imiş. Meh, necə dramatik cümlə oldu-*

Serviks xərçənginin Yaranması, əsasən, genetik faktorlarla və hpv ilə bağlıdır, erkən Diaqnoz qoyulduğu müddətcə müalicəsi və sağalma ehtimalı böyük olan xərçəng növüdür, əslində. Bir problem var ki, Serviksin Ən Əsas Simptomları ayaqlarda ağrı, vaginal axıntı və qanaxmadır, lakin qanaxma birinci mərhələdə özünü göstərmədiyi üçün axıntı və ağrılar gözardı edilir, həkimə getmək prosesi yubanır, bununla da diaqnoz qoyulub, müalicəyə başlanması da bir xeyli gecikir, bu da xərçəngin genişlənməsinə fürsət yaradır.
Serviks xərçəngin müəyyən etmək üçün pap(smear) testindən, biopsiyadan, mrt-dən və s. istifadə olunur. ilk öncə smear analizi verilir, Testin pozitiv çıxması Vaginada anormal Özəlliklərə sahib hüceyrələrin aşkarlanmasını bildirir və biopsiya prosesinə başlanır.
Bir kiçicik haşiyəyə çıxım ki, yaşı 21-dən yuxarı, cinsi əlaqədə olmuş hər bir qadının işini sağlama alması üçün 3 ildən bir etməsi gərəkən testlərdən biridir smear testi, çünki xərçəng öncəsi xərçəngəbənzər hüceyrələrin qarşısını almağa və müalicə etməyə yardım edir.
Azərbaycanda həm dövlət, həm özəl xəstəxanalarda mövcuddur pap testi, analizin qiyməti də 40-80 azn aralığında dəyişir, biz nərimanovdakı referans klinikada etdirmişdik həkim məsləhəti ilə, nəticələr türkiyəyə göndərilib, analizin cavabı elə açıqlanmışdı.
Yəni, əgər 2-3 ildən bir daimi və sistemli formada smear testindən keçilsə, serviks yayılmadan xəbərdar olmaq və erkən diaqnozla asanlıqla müalicə etmək mümkündür.
Eyni zamanda, vaxtında hpv peyvəndi vurdurmaq da zəruridir.

Smear testindən sonra Servikal biopsiya prosesi həyata keçirilir və anormal hüceyrələrin strukturu, xərçəngin hansı mərhələdə olduğu, nə qədər yayıldığı müəyyənləşir.
Ümumilikdə, dörd mərhələdən ibarətdir serviks xərçəngi, Birinci mərhələ ən təhlükəsizi, şişin sadəcə serviksdə məhdud qaldığı mərhələdir, ikinci mərhələdə şiş Vagina ətrafına, üçüncü mərhələdə isə çanaqlara yayılır, Dördüncü mərhələ xərçəngin metastaz verdiyi, digər orqanlara, ağciyərə sıçradığı mərhələdir ki, tam müalicəsi demək olar ki, mümkün deyil. Daha pollyannavari desəm, Mümkün olanı möcüzədir. Əksərən, xərçəng metastaz verdikdən sonra verilən mübarizə xəstəni sadəcə bir neçə il daha yaşada bilir, çox, çox təəssüf ki.

Müalicəsi əməliyyat, kimyaterapiya, radioterapiya ilə olur. Əgər şiş 5 sm-i keçməyibsə, əməliyyat mümkündür, ki mamam da iki dəfə əməliyyat olunub, birinci mərhələdəki xərçəng əməliyyatı olduqca sadə prosesdir. Yox əgər xərçəng birinci mərhələdən irəliləyibsə, "radikal histerektomiya" adlanan əməliyyat həyata keçilirilir, uşaqlıq boynu, buruqları, yumurtalıq çıxarılır, digər əməliyyata nəzərən olduqca ağır və çətindir. Həm fiziki, həm emosional cəhətdən.

Adətən Şiş 5 sm-i keçəndə isə kimyaterapiya ilə müalicə mümkündür.
Ümidvaram heç kimə lazım olmayacaq bir məsləhət də verim ki, həkim seçərkən Çox, çox, çox diqqətli olmaq zəruridir, biz mərkəzi klinikada üstündən atıb, başqa və başı Çıxmayan Həkimə yönləndirənlə də, ondan əlavə, başqa xəstəxanada zorla rüşvət almağa çalışanla da, gərəksiz qəbul yazıb, pul qoparmağa çalışanla da rastlaşdıq. Bizdə xərçəng irsi olduğundan bir az təcrübəli idik bu barədə, Xərçəng olan qohum və tanışlarım irana gedirdi müalicə üçün, anamı isə əslən türkiyədən olan həkim müalicə etdi. Bəlkə də, bizim rastımıza çıxmadı doğru azərbaycanlı həkim, bilmirəm, səhv yönləndirmək də istəmərəm, yenə də işi sağlama alıb, çox soraq etməkdə, həkimin sağaltdığı insanlarla əlaqəyə keçməkdə fayda var.


Diaqnoz və müalicəsin kənara qoysaq, mental cəhətdən insana verdiyi ziyanı tərif etmək mümkün deyil desəm, yalan olmaz, çünki xərçəng anxiety, depressiya, hətta major depressiya ilə gəlir. Ağrılara, hədsiz kilo itirməyə, saçının ifrat dərəcədə tökülməsinə bu il keçən ilkindən daha pis reaksiyalar verirdi mamam, hər dəfə xərçəngin verdiyi ağrıların digər heç bir ağrı ilə müqayisə olunmayacaq qədər şiddətli olduğunu deyib, daha da inamsızlaşırdı ki, onsuz da bunun da bir faydası olmayacaq, başına döyməyə, gördüyü hər şeyi sındırmağa qədər irəliləmişdi bir ara aqressiyası və ağrıları. Deyəsən, yuxarıda yazmışdım, Bəlkə də, yazmamışam, hələ də Tam düzəlməyib mental sağlığı, aqressivdir və kövrəkdir, içinə soxulası xərçəng buna görə hərtərəfli məhv edir insanı. Yazdıqca mental cəhətdən nə qədər yorucu, tükədici şeylər yaşadığımız gəldi gözümün qabağına, ürəyim üzüldü, yaxşısı, sonra editləyərəm bu qismin.

Yaman uzun danışdım, əslinə qalsa, entryni yazmağıma səbəb də Bu yaxınlarda qapı qonşumuzun xərçəngdən ölməsiydi. anamla eyni vaxtda, keçən ilin iyul ayında diaqnoz qoyulmuşdu ona da. Öldüyü günün səhəri o həyat yoldaşı ilə kimyaterapiyaya gedəndə mən marketə çörək almağa gedirdim, salamlaşanda hədsiz tükənmiş görünürdü, danışmağa da heyi yox idi sanki. günorta vaxtı binada hay-küy qopdu, bir də baxdıq ki, oğlu için-için ağlayır küçənin ortasında. O qədər ürəkburxan görüntü idi ki. təmasa bağlı deyiləm, çox sevdiyim insanları da nadirən içimdən qucaqlamaq və qucaqlanmaq gələndə qucaqlayıram, o gün istidə bütün gün mamamı öpüb qucaqlamışam dolu-dolu gözlərlə ki, nə yaxşı yanımdasan, ay maaa-*
Həmişə hər şeyə hazırlıqlı olmalı olduğumuzu deyən həkim, yəqin ki, o görüntüləri çox görüb deyə bu qədər rasional formada onu deyə bilirmiş, halbuki heç kim öz anasının, atasının, sevdiyi birinin xərçəngdən ölmə ehtimalını ağlına da gətirmək istəmir, sevdiyi birinə o ağrılı ölümü yaraşdırmır, istər birinci, istər yüzüncü mərhələdə olsun xərçəng.
Sözümün canı, düşmənim olsaydı, düşmənimə belə arzulamayacağım qədər ağrılı prosesdir özü, müalicəsi, ailənə, sevdiklərinə və səni, həqiqətən, sevənlərə təsiri. hər növünə, hər formasına, ağına ayrı, qarasına ayrı lənət.
"Niyə?" Deyə Sorğulamaqdansa proses boyunca Güclü, enerjili olmaq lazımdır deyə düşünürəm müşkül məsələ olsa da, mən var gücümlə yanında olmağa çalışırdım, hətta bir ara özümü o qədər unutmuşdum ki, hamıya yetib, özümə çatmadığımı, nə hiss etdiyimi yadırğadığımı bu ay boşluqda olanda gördüm.
indi hər şey axarındadır, sabah başımıza nə gələr bilmirəm. Amma Hazırda Simurq quşu romantikasına enmişəm yenə, "simurq quşu romantikasına enmək üçün də bir himə bəndsən ha" deməyin, damaşnikləyərəm-* içim məstansı duyğularla və "nə yaxşı"larla doludur. arada o qaranlıq tunellərin ucunda da işıq görünürmüş.
Tək təmənnam bir daha təkrarlanmaması, Hamımızdan, bütün sevdiklərimizdən iraq olmasıdır-*

31 əjdaha! reyn

28.07.2021 - 00:12 #333051 mesaj facebook twitter

gelsin hayat bildiği gibi

əfsanəvi türk repləri deyəndə ilk ağlıma gələn replərdən biri, hətta birincisidir. Hamının özündən bircə sətir belə olsa, tapacağı cinsdən şedevrdir:
Ve geçmişeydi saygım, gelecekti kaygım, kelebekti kalbim
Akar giderdim, olsa bile bir derdim hep gülerdim
Ve ağladığımı görebilen bir annem, bir de ben
inceden bir perde vardı gözlerimde
Göz görür fakat dilim susardı
Ayaklarım, elim, kolum da bağlı
Hayat bu dile kolay velakin her bir yerine ağrı.



Olduqca keyfiyyətli sözlərə sahibdir, cezanın 2006-cı ildə çıxan 3-cü albomu olan yerli plakadandır, şəksiz, sezen aksu da bambaşqa hüzn qatıb repə. Uşaq vaxtından aşinaydım onsuz nəqəratinə, amma heç vaxt cezanın oxuduğu yeri diqqətlə dinləməzdim, ümumiyyətlə, o vaxt repdən bir cümlənin belə əsl mahiyyətin başa düşmürdüm. Məsələn:
"Şimdi boşuna bakma saate zaman geç oldu, dün annem elimi tutarken bugün 29 da doldu."
Repi ilk dəfə dinləyən biri üçün bu söz nə ifadə edə bilərmiş, görəsən?
Mən Düşünürdüm ki, anası əlin tutub deyə anidən 29 yaşı olub cezanın. tarkanın adını "tarakan"a oxşadıb, hamının içində adını unudanda ona "qaracücə" deməyim kimi fiasko olmasa da, nisbətən bəzi şeyləri qavrayacaq yaşda olub, o sözləri heç anlamamağıma güləsim gəldi anlıq, hətta yazanda Lap xəcalət də çəkdim, nə beyinsiz uşaq imişəm, özümü də biabır elədim. *
Ancaq indi başa düşürəm ki, Demək, yaşdan asılı imiş sözlərin mahiyyətin dərk etmək, sevdiyin insanları itirmək, səbrin, intiqamın nə olduğunu qavramaq, düşünmək, və düşünmək. Çox belə dramatik.

Yekun olaraq, "gelsin hayat bildiği gibi gelsin, işimiz bu yaşamak" deyərək işimizi xatırladan repdir. Bəli, fəlsəfəm bura qədər. Sitatın sonu. Tfq ans-*-*

5 əjdaha! reyn

24.07.2021 - 02:03 #332715 mesaj facebook twitter

unudulmaz kitab cümlələri

Elə bayaq qriqori Petrovun ağ zanbaqlar ölkəsi kitabında dəfələrlə başına dönüləsi, ölkə cəhalətinin, cəmiyyətin insan taleyində nə qədər önəm daşıdığını göz önünə sərən sətirlə göz-gözə gəldim:
idarəçilər istər yaxşı, istər pis olsunlar, istər qəhrəman, istər qəddar olsunlar, onlar öz ölkələrinin yansımasıdırlar, milli ruhun bir kopyası olub, Xalq kütləsinin içindəN doğulublar. Bir millət necədirsə, dövlət adamları da onun kimidir. Buna görə də qədim zamanlardan: "hər millət layiq olduğu idarəçilik sisteminə və dövlət adamına sahibdir" Deyilir.

5 əjdaha! reyn

24.07.2021 - 01:40 #332714 mesaj facebook twitter

azərbaycan

23 iyul 2021 kəlbəcərin atəşə tutulmasından sonra "millət adrenalin istəyir, pualar qalxsın, döyüşlər olsun" tipli commentlər yazan neandertallara sahib ölkə. Elə bil, səngərdəki can deyil, bunlara adrenalin aşılayan oyuncaqdır. Biri düzgün bir şey yazırsa, beşi yarı cahil, dezinformativ, təpəsinə xizək geydiriləsi şeylər yazır.
Ayrıca, ikinci qarabağ müharibəsindən sonra ən böyük sevincim qardaşımın sağ qayıtması və bir daha şəhid verməyəcəyimizə inanmağım olmuşdu, sonra yenə şəhid verməyə davam elədik, yenə düşündüm ki, bəlkə, zaman keçər, səngiyər atışmalar, bəlkə, rahat xidmət etmək olar sərhəddə, bir ümid düzələr vəziyyət, neh, bu gün şəhid olan yaqubov fərmandan sonra o inancımın sona qalmış parçaları da öldü. Rahat yatsın, nə deyim.

15 əjdaha! reyn

24.07.2021 - 01:32 #332713 mesaj facebook twitter

/ 20 »

blok -   başlıqlarını gizlət

Son bəyənilənlər