Ümumdünya Badminton Federasiyasının (BWF) nəzdində Azərbaycanda ilk dəfə Junior International Series tədbiri kimi keçirilən Azerbaijan Junior Open 2026 başa çatıb. Bu barədə Azərbaycan Badminton Federasiyasının məlumatında deyilir. Turnirdə Azərbaycan, Türkiyə, Hindistan, ABŞ, Birləşmiş Ərəb Əmirlikləri, İran, Özbəkistan, Gürcüstan və Tacikistanı təmsil edən ümumilikdə 64 yeniyetmə və gənc idmançı mübarizə aparıb və beş kateqoriya üzrə qaliblər müəyyənləşib.
Tədbirdə Azərbaycan badmintonçuları güclü çıxış ediblər. Kişilərin qoşa yarışında Azərbaycanlı Ülvi Hüseynov və Əmirxan İmanov dueti finalda amerikalı rəqiblərini 2:0 (21-16, 23-21) hesabı ilə məğlub edərək turnirin qızıl medalına sahib çıxıb. Qadınların cütlük yarışında Leyla Camalzadə və Yağmur Quliyeva, kişilərin yarışında isə Ülvi Hüseynov yarışı ikinci pillədə başa vuraraq gümüş medala sahib olublar.
Qarışıq cütlüklərdə Əmirxan İmanov və Yağmur Quliyeva bürünc medalı təmin ediblər. Turnirin ümumi mükafat fondu 5000 ABŞ dolları (8500 manat) təşkil edib. Rəsmi BWF təqviminə daxil olan “Azerbaijan Junior Open 2026”nın əsas məqsədi Azərbaycanın gənc badmintonçularını daha böyük beynəlxalq yarış təcrübəsi ilə təmin etmək, onların peşəkar inkişafına dəstək vermək və milli komanda daxilində rəqabət mühitini daha da gücləndirməkdir.
Mənbə: https://www.trend.az/azerbaijan/society/4215495.html © 2026 Trend İnformasiya Agentliyi.
Xülasə — davamını mənbədə oxuyun.
