Bu ilin 7 ayında Azərbaycan və Çin arasında ticarət dövriyyəsinin həcmi 2 milyard 610 milyon dollar təşkil edib. Trend-in Dövlət Gömrük Komitəsinin məlumatına əsasən hesablamalarına görə, bu, 2025-ci ilin analoji dövrü ilə müqayisədə 107,3 milyon dollar və ya 4,3% çoxdur. Hesabat dövründə Azərbaycanın ümumi ticarət həcminin 8,93 faizini Çinlə ticarət təşkil edib.
Beləliklə, Çin Azərbaycanın ən çox ticarət apardığı ölkələr arasında dördüncü yerdə qərarlaşıb. Bu ilin 7 ayında Azərbaycan Çinə 68,4 milyon dollarlıq məhsul ixrac edib. Bu, ötən ilin eyni dövrü ilə müqayisədə 15,1 milyon dollar və ya təxminən 28,3% çoxdur.
Hesabat dövründə Azərbaycan Çindən 2 milyard 542 milyon dollar dəyərində mal idxal edib ki, bu da 2025-ci ilin müvafiq dövrü ilə müqayisədə 122,3 milyon dollar və ya 3,8% çoxdur. Beləliklə, Çin Azərbaycanın ən çox mal idxal etdiyi ölkələr siyahısında birinci yerdədir. Bütövlükdə Azərbaycan ilə Çin arasında iqtisadi-ticarət əlaqələri sürətlə inkişaf edir.
İkitərəfli əməkdaşlıq təkcə ticarətlə məhdudlaşmır. Son zamanlar maliyyə sektoru, kapital bazarları, ödəniş sistemləri, enerji, geoloji kəşfiyyat, kənd təsərrüfatı sahələrində də əlaqələr genişlənir. Bu kontekstdə Azərbaycan Mərkəzi Bankı ilə Çinin Sənaye və Kommersiya Bankı (ICBC) arasında əməkdaşlığın perspektivləri müzakirə edilib, SOCAR və Çinin BGP Inc şirkəti birgə layihələrin həyata keçirilməsi və tərəfdaşlıq əlaqələrinin genişləndirilməsi istiqamətində səylərini davam etdirib.
Bundan əlavə, Azərbaycan fındıq və badam məhsullarının Çin bazarına çıxışının verilməsi ilə bağlı əldə olunmuş razılaşmalar iki ölkə arasında qeyri-resurs ixracının artırılması üçün böyük əhəmiyyət kəsb edir. Azərbaycan və Çin arasında əməkdaşlığın əsas istiqamətlərindən biri Orta Dəhlizinin inkişafıdır. Azərbaycanın strateji coğrafi mövqeyi, nəqliyyat və logistika imkanları Çini Avropa bazarları ilə birləşdirən bu marşrutun əhəmiyyətini artırır.
Son illər Bakı-Tbilisi-Qars dəmir yolu, Bakı Beynəlxalq Dəniz Ticarət Limanı və digər nəqliyyat infrastrukturu layihələri çərçivəsində genişlənən əməkdaşlıq Orta Dəhliz üzrə yükdaşımaların həcminin artmasına və regionun tranzit potensialının güclənməsinə öz töhfəsini verib. Bu baxımdan, nəqliyyat və logistika əlaqələri Azərbaycan və Çin arasında əməkdaşlığın əsas istiqamətlərindən birinə çevrilir. Azərbaycan “Bir kəmər və yol” təşəbbüsü çərçivəsində tranzit ölkə kimi əsas rol oynayır və Orta Dəhliz (Trans-Xəzər Beynəlxalq Nəqliyyat Marşrutu) Çin və Avropa arasında yük daşımaları üçün alternativ və təhlükəsiz marşrut təklif edir.
Xülasə — davamını mənbədə oxuyun.
