Azərbaycan və Ermənistan arasında dövlət rəsmiləri səviyyəsində aparılan danışıqlar, siyasi partiyalar və qeyri-hökumət təşkilatları arasında gündəlik mövzuları sırasındadır. İndiyədək iki ölkə liderləri, xarici işlər nazirləri və digər rəsmi şəxslər arasında müxtəlif formatlarda görüşlər keçirilsə də, siyasi təşkilatlar səviyyəsində dialoq baş tutmayıb. Belə görüşlər sülh prosesinə hansı töhfələr verə bilər?
Milli Məclisin deputatı, Milli Cəbhə Partiyasının sədri Razi Nurullayev Modern.az-a deyib ki, Azərbaycan və Ermənistan arasında sülh prosesinin əsas gündəliyində dövlət rəhbərliyi müəyyən edir və danışıqlar məhz onların rəhbərliyi ilə aparılır. "Bu baxımdan, siyasi partiyalar arasında mümkün dialoq məsələsinə də ilk növbədə dövlət rəhbərliyinin mövqeyi və qərarı əsasında yenidən baxılmalıdır. Çünki sülh yalnız dövlətlər arasında imzalanan sənədlərdən ibarət deyil. Bu prosesin davam etdirilməsi üçün cəmiyyətlərin, siyasi qüvvələrinin və müxtəlif ictimai institutların bu prosesin müsbət yanaşması vacibdir. Amma siyasi partiyaların bu prosesdə hansı formada və hansı çərçivədə iştirak edəcəyi müəyyən etmək bizim deyil, ilk növbədə sülh gündəlikləri formalaşdıran dövlət rəhbərliyinin səlahiyyətindədir. Bizim mövqeyimiz aydındır: əgər dövlət rəhbərliyi siyasi partiyaların da sülhün möhkəmləndirilməsinə töhfə verməsini məsləhət və məqsədləuyğun hesab edərsə, Azərbaycan siyasi partiyaları olaraq üzərimizə düşən məsuliyyəti yerinə yetirməyə və bu prosesə konstruktiv töhfə verməyi nəzərdən keçirə bilərik".
Milli Məclisin deputatı, Böyük Quruluş Partiyasının sədri Fazil Mustafa gələcəkdə qeyri-dövlət qurumlarının bu prosesin cəlb olunmasının vacib olduğunu söyləyib:
"Təbii ki, dövlətlərarası münasibətlərin digər mühüm komponentlərindən biri də cəmiyyətlərarası münasibətlərdir. Ayrı-ayrı vətəndaş cəmiyyətləri qurumları, qeyri-hökumət təşkilatları və siyasi partiyalar bu prosesdə gələcək mühüm rol oynaya bilərlər. Bu məsələ ilə bağlı hər hansı konkret təşəbbüs yoxdur. Ona görə ki, bu barədə dəqiq fikir söyləmək çətindir. Amma bütövlükdə bu istiqamətdə müəyyən addımların atılması nəzərdə tutulmuşdur. Çünki gələcək münasibətlər və cəmiyyətlər arasında dialoqun inkişafı baxımından qeyri-dövlət qurumlarının və bu prosesin cəlb edilməsi vacibdir".
REAL Partiyasının sədri Natiq Cəfərli Ermənistan parlamentində təmsil olunan üç partiyadan yalnız birinin sülh quruculuğundan danışdığını bildirib:
"Biz parlamentdə təmsil olunan partiyayaıq. Mən öz partiyamız haqqında danışa bilərəm. Əgər parlament belə bir qərarı olarsa, parlamentlərarası və partiyalar arasında dialoq, görüşlərin təşkili ilə bağlı qərar qəbul edilərsə, biz normal yanaşarıq və Azərbaycan parlamentinin qərarı çərçivəsində belə görüşlərdə iştirak edə bilərik. Amma hələ belə bir görüş nəzərdə tutulması ilə bağlı heç bir məlumatımız yoxdur. Bizim parlament rəhbəri ilə Ermənistan parlamentinin rəhbəri arasında beynəlxalq platformalarda görüşlər keçirilir. Bu da sülhün, xüsusilə dayanıqlı sülhün möhkəmlənməsi baxımından vacib addımlardan biridir. Belə görüşlərin keçirilməsi, əlbəttə ki, müsbət haldır. Əgər parlamentlərarası görüşlər, siyasi partiyalar arasında təmasların keçirilməsi ilə bağlı dövlət səviyyəsində qərar olarsa, təbii ki, bu da sülh quruculuğu istiqamətində müəyyən addımların atılmasına kömək edəcək. Problem yalnız ondan ibarətdir ki, Azərbaycan parlamentində bütün partiyaların təmsilçisi həm də iqtidar partiyası, həm də digər siyasi partiyaların - sülh tərəfdarı və sülh quruculuğu istiqamətində dövlətin dəstəklədiyi addımları dəstəkləyirlər. Ermənistan parlamentinə baxdıqda vəziyyət fərqlidir. Orada təmsil olunan üç partiyadan yalnız biri Paşinyanın rəhbərlik etdiyi partiya - sülh quruculuğundan danışır. Digər tərəfdənsə, əksinə, sülhə qarşıdır. Bu baxımdan, onların hansı formatda belə bir görüşdə iştirak edə biləcəkləri açığı, o qədər təsəvvür edə bilmirəm. Amma Paşinyanın partiyası ilə Azərbaycanın fəaliyyət göstərən və parlamentdə təmsil olunan siyasi partiyalar arasında hər hansı görüşlərin keçirilməsi sülh quruculuğunda müəyyən addımların atılmasına, daha da irəli mərhələyə keçilməsinə, şübhəsiz ki, yardımçı ola bilər".
Xülasə — davamını mənbədə oxuyun.
