17 avqust 2026-cı il, Bakı — AZCON Holdinqin tərkibinə daxil olan Azərbaycan Hava Yolları Qazaxıstanın Atırau şəhərinə ilk uçuşunu uğurla həyata keçirib. Yeni marşrut Azərbaycan və Qazaxıstan arasında hava əlaqəsinin daha da genişləndirilməsi, işgüzar və istirahət səfərlərinin asanlaşdırılması, iki ölkə arasında iqtisadi və humanitar əməkdaşlığın gücləndirilməsi istiqamətində daha bir mühüm addımdır. Bakı-Atırau-Bakı marşrutu üzrə uçuşlar həftədə dörd dəfə, bazar ertəsi, çərşənbə axşamı, cümə və bazar günləri yerinə yetiriləcək.
Yeni xidmət sərnişinlərə Qərbi Qazaxıstanın əsas iqtisadi mərkəzlərindən biri olan Atırauya rahat və birbaşa səyahət imkanı təqdim edəcək. Qazaxıstan Azərbaycan Hava Yollarının beynəlxalq marşrutlar şəbəkəsində prioritet bazarlardan biridir. İki ölkə arasında artan mobilliyi və artan bazar tələbini nəzərə alaraq, aviaşirkət Qazaxıstan ərazisində uçuş şəbəkəsini genişləndirməyə davam edir.
Milli aviadaşıyıcı Azərbaycan və Mərkəzi Asiya arasında hava əlaqəsinin daha da inkişafına töhfə verməklə sərnişinlərə daha geniş seçim və daha rahat səyahət variantları təklif edir. Atırauya biletləri rəsmi www.azal.az saytında, AZAL mobil tətbiqi, aviaşirkətin kassaları və akkreditə olunmuş turizm agentlikləri vasitəsilə əldə etmək olar. Mənbə: https://www.trend.az/business/4215690.html © 2026 Trend İnformasiya Agentliyi.
Xülasə — davamını mənbədə oxuyun.
