Azərbaycan idmançıları Çimərlik Güləşi Dünya Seriyasının dördüncü mərhələsində yeddi medal qazanıblar. “Sea Breeze” istirahət kompleksində keçirilən yarışda Vüsal Əliyev (80 kq), Əşrəf Aşirov (90 kq), Camal Feyziyev (+90 kq) qızıl medal qazanıblar. Sahib Dadaşov (80 kq) və Nərgiz Səmədova (60 kq) gümüş medala sahib olublar.
Cavid Niftalızadə (80 kq) və Ramiz Həsənov (90 kq) turniri bürünc medalla başa vurublar. Kişilərdən ibarət Azərbaycan millisi 84 xalla komanda hesabında başçılıq edir. Gürcüstan 62 xalla ikinci, Ukrayna isə 45 xalla üçüncü yeri tutub.
Qadınların komanda hesabında Azərbaycan 40 xalla ikinci yeri tutub. Ukrayna 100 xalla birinci, İspaniya isə 24 xalla üçüncü olub. Qeyd edək ki, Azərbaycanda ilk dəfə keçirilən yarışda 14 ölkədən 55 güləşçi iştirak edib.
Dünya Seriyasının final mərhələsi 26-27 sentyabr tarixlərində Yunanıstanın Katerini şəhərində keçiriləcək. Dünya çempionları final yarışından sonra bütün mərhələlər üzrə toplanan xallara əsasən müəyyən ediləcək. Mənbə: https://www.trend.az/azerbaijan/society/4218880.html © 2026 Trend İnformasiya Agentliyi.
Xülasə — davamını mənbədə oxuyun.
