Azərbaycan Respublikasının xarici işlər naziri Ceyhun Bayramov Avstriyanın Azərbaycan Respublikasına yeni təyin olunmuş fövqəladə və səlahiyyətli səfiri Etyen Berxtoldu qəbul edib. Bu barədə Xarici İşlər Nazirliyinin (XİN) mətbuat xidmətindən məlumat verilib. Bu arada bildirilir ki, səfir Etyen Berchtold etimadnaməsinin surətini nazir Ceyhun Bayramova təqdim edib.
Nazir səfiri yeni təyinatı münasibətilə təbrik edib, ona Azərbaycandakı diplomatik fəaliyyətində uğurlar arzulayıb. Görüşdə Azərbaycan ilə Avstriya arasında siyasi, iqtisadi, enerji, nəqliyyat, turizm, humanitar və digər sahələrdə əməkdaşlığın inkişaf etdirilməsi perspektivləri müzakirə olunub. Azərbaycan ilə Avstriya arasında siyasi dialoqun əhəmiyyəti vurğulanıb.
Həmçinin qeyd olunub ki, ikitərəfli münasibətlərin inkişafında qarşılıqlı səfərlər və təmaslar, siyasi məsləhətləşmələr mexanizmi, parlamentlərarası əlaqələr mühüm rol oynayır. Tərəflər, həmçinin Azərbaycan və Avstriya arasında çoxtərəfli çərçivələrdə, xüsusilə Birləşmiş Millətlər Təşkilatı, ATƏT və Avropa İttifaqı çərçivəsində əməkdaşlıq məsələlərini müzakirə ediblər. Onlar bu təşkilatlar çərçivəsində əməkdaşlığın və əlaqələndirmənin daha da inkişaf etdirilməsinin vacibliyini qeyd ediblər.
Nazir Ceyhun Bayramov Avstriyanın 2027–2028-ci illər üçün BMT Təhlükəsizlik Şurasının qeyri-daimi üzvü seçilməsi münasibətilə bir daha təbrik edib və əməkdaşlığa ümidvar olduğunu bildirib. Daha sonra tərəflər iqtisadiyyat, energetika, nəqliyyat sahələrində əməkdaşlığın hazırkı vəziyyəti və perspektivləri, o cümlədən Azərbaycanın təşəbbüsü və iştirakı ilə həyata keçirilən strateji enerji və nəqliyyat layihələri ətrafında fikir mübadiləsi aparıblar. Görüşdə Azərbaycanın Avropanın enerji təhlükəsizliyinin təmin edilməsində mühüm rol oynadığı vurğulanıb və bu ilin yanvar ayından Azərbaycan təbii qazının Avstriyaya tədarükünə başlanması məmnunluqla qeyd olunub.
Görüşdə, həmçinin münaqişədən sonrakı dövrdə regionda mövcud vəziyyət, Azərbaycan və Ermənistan arasında münasibətlərin normallaşdırılması prosesi, regionda davamlı sülh və sabitliyin təmin edilməsi istiqamətində Azərbaycanın atdığı addımlar, qarşıya çıxan problemlər barədə brifinq keçirilib. Bundan əlavə, işğaldan azad edilmiş ərazilərdə aparılan genişmiqyaslı yenidənqurma və abadlıq işlərinə diqqət yetirilib. Səfir Etienne Berchtold Avstriyanın Azərbaycanı mühüm və etibarlı tərəfdaş hesab etdiyini bildirərək, fəaliyyəti dövründə Azərbaycan ilə Avstriya arasında bütün sahələrdə ikitərəfli əməkdaşlığın daha da inkişaf etdirilməsi üçün səylərini əsirgəməyəcəyini qeyd edib.
Görüşdə, həmçinin qarşılıqlı maraq doğuran digər regional və beynəlxalq məsələlər ətrafında fikir mübadiləsi aparılıb. Mənbə: https://www.trend.az/azerbaijan/politics/4218338.html © 2026 Trend İnformasiya Agentliyi.
Xülasə — davamını mənbədə oxuyun.
