12-14 avqust 2026-cı il tarixlərində İsveçrənin Cenevrə şəhərində keçirilən və müxtəlif ölkələrdən gənclərin nümayəndələrini, o cümlədən Azərbaycan diaspor gənclərini bir araya gətirən 31-ci AFS (Amerika Sahə Xidməti) Gənclər Assambleyası uğurla başa çatıb. Bu barədə Diasporla İş üzrə Dövlət Komitəsinin hesabatında deyilir. Məlumata görə, assambleyada Diasporla İş üzrə Dövlət Komitəsinin dəstəyi ilə ADG (Azərbaycan Diaspor Gəncləri) şəbəkəsinin Macarıstan, Estoniya, Kanada, Finlandiya və Litvadan olan 5 üzvü iştirak edib.
Tədbir çərçivəsində gənclər davamlı inkişaf, qlobal vətəndaşlıq, liderlik, qərarların qəbulu proseslərində gənclərin rolu, beynəlxalq əməkdaşlıq, multikultural dəyərlər mövzularında panel müzakirələri, təlim sessiyaları və interaktiv proqramlarda fəal iştirak ediblər. ADG nümayəndələri müxtəlif ölkələrdən olan iştirakçılarla səmərəli görüşlər keçirib, yeni əməkdaşlıq imkanlarını müzakirə edib, Azərbaycan diaspor gənclərinin fəaliyyəti, ölkənin multikultural dəyərləri və dövlət gənclər siyasəti haqqında fikirlərini bölüşüblər. Tədbirin sonuncu günü - avqustun 14-də keçirilən Mədəniyyət Günü proqramı iştirakçı ölkələrin mədəni irsinin təqdim olunduğu ən yaddaqalan tədbirlərdən biri olub.
ADG nümayəndələri Azərbaycanın zəngin tarixini, milli-mədəni dəyərlərini, adət-ənənələrini beynəlxalq auditoriyaya yüksək səviyyədə təqdim ediblər. Azərbaycan guşəsi iştirakçılar tərəfindən böyük maraqla qarşılanmış, Azərbaycanın milli atributları, mədəni irsi haqqında geniş məlumat verilmişdir. AFS-nin 31-ci Gənclər Assambleyasında iştirak Azərbaycan diaspor gənclərinin beynəlxalq əməkdaşlıq imkanlarının genişləndirilməsi, yeni tərəfdaşlıq əlaqələrinin qurulması, Azərbaycanın beynəlxalq gənclər platformalarında tanıdılması baxımından mühüm nəticələrlə yadda qalıb.
Tədbir çərçivəsində əldə olunan təcrübə və qurulan əlaqələrdən gələcək layihələrdə və beynəlxalq təşəbbüslərdə səmərəli istifadə edilməsi planlaşdırılır. Diasporla İş üzrə Dövlət Komitəsinin dəstəyi ilə baş tutan bu iştirak diaspor gənclərinin beynəlxalq fəallığının artırılmasına, liderlik bacarıqlarının inkişafına və Azərbaycanın dünya miqyasında layiqincə təmsil olunmasına verilən töhfənin daha bir uğurlu nümunəsidir. Mənbə: https://www.trend.az/azerbaijan/society/4215904.html © 2026 Trend İnformasiya Agentliyi.
Xülasə — davamını mənbədə oxuyun.
