Slovakiyanın paytaxtı Bratislavada 20 yaşadək güləşçilər arasında dünya çempionatı davam edir. Dördüncü yarış günündə yunan-Roma güləşi üzrə 60 kq və 82 kq, o cümlədən qadın güləşi üzrə 50 kq, 53 kq və 72 kq çəki dərəcələrində qaliblər müəyyənləşib. Ayxan Cavadov (60 kq) finalda Özbəkistan güləşçisi Dostonbek Oripovla üz-üzə gəlib.
Həmyerlimizin birinci hissədə yerinə yetirdiyi dörd xallıq gediş görüşün nəticəsini həll edib. Rəqibini 4:1 hesabı ilə məğlub edən Cavadov titulunu uğurla qoruyub və ardıcıl ikinci dəfə U20 dünya çempionu olub. Elmin Əliyev (82 kq) bürünc medal uğrunda görüşdə türkiyəli güləşçi İsmayıl Bereklə üz-üzə gəlib.
Əvvəldən təşəbbüsü ələ keçirən güləşçimiz sona qədər üstünlüyünü qoruyub və 7:1 hesablı qələbə qazanaraq dünya çempionatının bürünc medalını qazanıb. Zəhra Kərimzadə (72 kq) bürünc medal uğrunda görüşdə Rusiya güləşçisi Liliana Kazminaya uduzaraq dünya çempionatını beşinci yerdə başa vurub. Bununla da Azərbaycanın dünya çempionatında qazandığı medalların sayı 5-ə çatıb.
Əvvəlki günlərdə Cavidan Nəhmətov (77 kq) gümüş, Emin Cavadlı (55 kq) və Tural Əhmədov (63 kq) bürünc medal qazanıb. Mənbə: https://www.trend.az/azerbaijan/4216389.html © 2026 Trend İnformasiya Agentliyi.
Xülasə — davamını mənbədə oxuyun.
