Azərbaycanın dövlət neft şirkəti SOCAR və Çinin İxrac-İdxal Bankı enerji sahəsində əməkdaşlığın genişləndirilməsi imkanlarını müzakirə ediblər. SOCAR-ın prezidenti Rövşən Nəcəf Çinin İxrac-İdxal Bankının vitse-prezidenti Vanq Kanqın rəhbərlik etdiyi nümayəndə heyəti ilə görüşüb. Görüşdə SOCAR, Çin şirkətləri və maliyyə institutları arasında əməkdaşlığın uğurla inkişaf etdiyi, müxtəlif sahələrdə əlaqələrin genişləndirilməsinə yönəlmiş bir sıra layihələrin həyata keçirildiyi vurğulanıb.
Tərəflər SOCAR-ın Azərbaycanda və xaricdə həyata keçirdiyi layihələri, şirkətin perspektiv təşəbbüslərini müzakirə ediblər. Çin hökumətinin maliyyə qurumu olan Çin bankının nümayəndələri xarici investisiyaları dəstəkləyən layihələr və beynəlxalq iqtisadi əməkdaşlığa dair məlumat veriblər. Tərəflər, həmçinin enerji sektorunun müxtəlif sahələri, o cümlədən emal sənayesi üzrə əməkdaşlığın genişləndirilməsi imkanlarını araşdırıb, qarşılıqlı maraq doğuran məsələlər ətrafında fikir mübadiləsi aparıblar.
Çin İxrac-İdxal Bankı müstəqil hüquqi statusu olan dövlətə məxsus və dövlət tərəfindən maliyyələşdirilən siyasət bankıdır. O, birbaşa Çin Dövlət Şurasına hesabat verir və Çinin xarici ticarət, investisiya və beynəlxalq iqtisadi əməkdaşlığı dəstəkləmək üzrə ixtisaslaşmışdır. Mənbə: https://www.trend.az/business/energy/4218422.html © 2026 Trend İnformasiya Agentliyi.
Xülasə — davamını mənbədə oxuyun.
