Avqustun 18-də Azərbaycan KİV nümayəndələrinin Özbəkistana press-turu çərçivəsində Özbəkistan Prezidentinin Administrasiyasında Kütləvi İnformasiya Vasitələri üçün Məzmun Hazırlığı Mərkəzinə baş çəkib. Press-turda Azərbaycanın aparıcı KİV-lərinin 20 nümayəndəsi iştirak edir. İştirakçılar arasında Trend İnformasiya Agentliyinin baş redaktoru Emin Əliyev də var.
Səfər zamanı azərbaycanlı jurnalistlər KİV, sosial şəbəkələr və rəqəmsal platformalar üçün məzmun hazırlayan mərkəzin fəaliyyəti, medianın inkişafı sahəsində həyata keçirilən dövlət layihələri, KİV nümayəndələrinin peşəkarlıq səviyyəsinin yüksəldilməsi, Özbəkistanın beynəlxalq imicinin təbliği ilə tanış olublar. Press-tur iştirakçılarına mərkəzin həyata keçirdiyi layihələr və təşəbbüslər haqqında məlumat təqdim olunub. Xüsusilə, “Media Start”, “Debüt”, “Fiklab” layihələrinin, Aura.uz platformasının, eləcə də mobil jurnalistika, SMM, müasir rəqəmsal kommunikasiyalar üzrə maarifləndirici proqramların təqdimatı olub.
Mərkəzin aparıcı xarici tərəfdaşlarla birgə həyata keçirdiyi beynəlxalq layihələrə xüsusi diqqət yetirilib. Səfər çərçivəsində Azərbaycan KİV-lərinin nümayəndələri ilə Özbəkistanın aparıcı kütləvi informasiya vasitələrinin rəhbərləri arasında da görüş olub. Kütləvi İnformasiya Vasitələri üçün Məzmun Hazırlanması Mərkəzinin direktor müavini Dünyagir Abdurəhmonov mərkəzin yaradılması və fəaliyyəti barədə məlumat verərək qeyd edib ki, bu dövlət qurumu 2025-ci ilin iyul ayında Prezident Administrasiyasının mətbuat xidmətinin Media mərkəzinin bazasında yaradılıb.
Təşkilat kütləvi informasiya vasitələri ilə iş üçün media materiallarının hazırlanması və əlaqələndirilməsi ilə məşğul olur. Abdurahmonov bildirib ki, 4-5 fevral 2027-ci il tarixlərində “Uzexpocenter” Milli Sərgi Şirkətində 50-dən çox ölkədən kino, televiziya, animasiya və rəqəmsal media nümayəndələrini birləşdirən ilk böyük beynəlxalq məzmun bazarı olan “Tashkent Content Market 2027” keçiriləcək. Görüşdə iki ölkənin kütləvi informasiya vasitələri arasında əməkdaşlığın genişləndirilməsi perspektivləri, birgə media layihələrinin həyata keçirilməsi, peşəkar təcrübə mübadiləsi, o cümlədən birgə informasiya məzmununun hazırlanması məsələləri müzakirə edilib.
Abdurahmonov Azərbaycan nümayəndələrini “Tashkent Content Market 2027” sərgisini ziyarət etməyə dəvət edib. Azərbaycan KİV nümayəndələrinin Özbəkistanda press-turu davam edir. Səfər çərçivəsində jurnalistlər ölkənin sosial, iqtisadi və mədəni inkişafının müxtəlif istiqamətləri ilə tanış olacaqlar.
Mənbə: https://www.trend.az/azerbaijan/society/4215956.html © 2026 Trend İnformasiya Agentliyi.
Xülasə — davamını mənbədə oxuyun.
