Azərbaycan Mətbuat Şurası Rusiya informasiya məkanında ölkəyə qarşı təhdid xarakterli fikirləri pisləyib. Bu barədə şuranın açıqlamasında bildirilir. “Bəzi Rusiya KİV-ləri Azərbaycan dövlətinə, xalqına, ölkə rəhbərliyinə, görkəmli şəxsiyyətlərimizə qarşı nalayiq, hədələyici, təhqiredici materiallar və fikirlər paylaşırlar.
Hesab edirik ki, bu, vətəndaş jurnalistikasının prinsiplərinə, etik normalara, insani dəyərlərə tamamilə ziddir. Təəssüf ki, Rusiya informasiya məkanında belə hallar ardıcıl olaraq müşahidə olunur”, - deyə məlumatda vurğulanıb. Bəyanatda deyilir ki, Mətbuat Şurası belə halları Azərbaycan və Rusiya arasında ikitərəfli münasibətlərin, eləcə də media münasibətlərinin ruhuna tamamilə zidd hesab edir.
"Azərbaycan mediası qonşu dövlətlərlə, o cümlədən Rusiya ilə bağlı məsələləri işıqlandırmaqda həmişə seçici olub, peşəkar prinsiplərdən kənar fikir və iddialara yer verməyib. Ona görə də Rusiyanın informasiya sferasında belə xoşagəlməz halların baş verməsi Azərbaycan ictimaiyyətində dərin təəssüf və əsaslı narazılıq yaradır", - bəyanatda qeyd olunub. Azərbaycan Mətbuat Şurası baş verənləri kəskin şəkildə pisləyib.
Eyni zamanda, şura Rusiya media ictimaiyyətinə və bütövlükdə cəmiyyətə müraciət edərək, Azərbaycan-Rusiya mediası əlaqələrini və ümumən xalqlar arasında dostluq münasibətlərini pozmağa yönəlmiş hallarla bağlı ciddi tədbirlər görülməsinə çağırıb. Mətbuat Şurası bir daha bəyan etdi ki, Azərbaycan dövlətinə, xalqına, onun görkəmli nümayəndələrinə qarşı təhqiramiz fikirlər, hədələyici iddialar yolverilməzdir. “Rusiya informasiya məkanının ciddi qanunvericiliklə tənzimlənməsi şəraitində belə materialların sistemli şəkildə ortaya çıxması onların Rusiyanın dövlət siyasəti səviyyəsində təsdiqlənməsinə bərabərdir.
Mətbuat Şurası bir daha xatırladır ki, bu cür açıqlamalar verənlərə hüquqi məsuliyyət daşıyırlar”, - deyə məlumatda əlavə olunub. Mənbə: https://www.trend.az/azerbaijan/politics/4215922.html © 2026 Trend İnformasiya Agentliyi.
Xülasə — davamını mənbədə oxuyun.
