DAŞKENT - Avqustun 23-də Azərbaycan Respublikasının Prezidenti İlham Əliyev və Özbəkistan Respublikasının Prezidenti Şavkat Mirziyoyev Daşkənddə Nizami Gəncəvi adına Milli Pedaqoji Universitetinin açılış mərasimində iştirak ediblər. Dövlət başçıları əvvəlcə ali təhsil ocağının rəmzi açılışını bildirən lenti kəsiblər. Prezident İlham Əliyev və Prezident Şavkat Mirziyoyev universitetin həyətində ağac əkiblər.
Azərbaycan və Özbəkistanın dövlət başçılarına Nizami Gəncəvi adına Milli Pedaqoji Universitetinin tarixi və burada mövcud olan imkanlar barədə məlumat verilib. 1935-ci ildə Orta Asiya Dövlət Universitetinin pedaqoji fakültəsinin bazasında Daşkənd Pedaqoji İnstitutu yaradılmışdır. 1947-ci ildə müəssisənin adı dəyişdirilərək Nizami adına Daşkənd Dövlət Pedaqoji İnstitutu, 1998-ci ildən isə Nizami adına Daşkənd Dövlət Pedaqoji Universiteti kimi fəaliyyət göstərir.
Universitetin məzunları arasında Özbəkistan ədəbiyyatının, mədəniyyətinin, elminin və ictimai həyatının inkişafına mühüm töhfələr vermiş çoxsaylı görkəmli xadimlər var. Universitet altı ali pedaqoji məktəbdən, həmçinin Birgə Təhsil Ali Məktəbindən və magistratura şöbəsindən ibarətdir. Ümumilikdə 33 şöbə var.
Universitet 38 bakalavr proqramı və 31 magistr proqramı təklif edir. 730 müəllim və elmi-pedaqoji işçisi olan universitetdə 17 mindən çox tələbə, o cümlədən altı Azərbaycan vətəndaşı bakalavriat və magistratura pillələrində və müstəqil tədqiqatçı kimi təhsil alır. Eyni zamanda, universitetdə 13 ölkədən 250 tələbə təhsilini davam etdirir.
Universitetdə beynəlxalq təhsil proqramlarının həyata keçirilməsinə də xüsusi diqqət yetirilir. Təhsil müəssisəsi 15 beynəlxalq təhsil təşkilatı və 20 ölkənin 127 universiteti, həmçinin UNESCO və UNICEF ilə sıx əməkdaşlıq əlaqələri qurub. Universitetdə 12 birgə təhsil proqramı həyata keçirilir.
Bundan əlavə, universitetdə dörd beynəlxalq təhsil və mədəniyyət mərkəzi - Azərbaycan, Qazaxıstan, Cənubi Koreya və Çin mərkəzləri fəaliyyət göstərir. Nizami Gəncəvi adına Milli Pedaqoji Universiteti Azərbaycan Dövlət Pedaqoji Universiteti, Bakı Slavyan Universiteti, Bakı Dövlət Universiteti, Azərbaycan Dillər Universiteti, Mingəçevir Dövlət Universiteti, Azərbaycan Dövlət Neft və Sənaye Universiteti, Azərbaycan Memarlıq və İnşaat Universiteti ilə anlaşma memorandumları imzalayıb. Bu əməkdaşlıq çərçivəsində birgə elmi tədqiqatlar və beynəlxalq konfranslar, akademik və elmi mübadilələr, habelə mədəni-maarif əlaqələri inkişaf etdirilir.
Xülasə — davamını mənbədə oxuyun.
