Azərbaycan Respublikasının Prezidenti İlham Əliyev Qırğız Respublikasının Prezidenti Sadır Japarova təbrik məktubu ünvanlayıb. Məktubun mətni Azərbaycan Prezidentinin rəsmi saytında dərc olunub. Müstəqilliyinin 35-ci ildönümü münasibətilə Sizə və Sizin vasitənizlə bütün qardaş Qırğızıstan xalqına şəxsən öz adımdan və Azərbaycan xalqı adından ən səmimi təbriklərimi və xoş arzularımı yetirirəm.
Bu gün Sizin rəhbərliyinizlə Qırğızıstan öz dövlətçiliyinin möhkəmləndirilməsi, sosial-iqtisadi inkişafının yüksəldilməsi, irimiqyaslı quruculuq layihələrinin həyata keçirilməsində mühüm nailiyyətlər əldə edərək beynəlxalq aləmdə böyük nüfuz qazanıb. Biz qardaş ölkə olaraq Qırğızıstanın uğurlarına öz uğurlarımız kimi sevinirik. Sevindirici haldır ki, Azərbaycan ilə Qırğızıstan arasında ənənəvi dostluq və qardaşlıq tellərinə söykənən əlaqələr ildən-ilə inkişaf edərək müttəfiqlik səviyyəsinə yüksəlir, yeni mahiyyət kəsb edir.
Qonaqpərvər ölkənizə bu yaxınlarda etdiyim dövlət səfərim xalqlarımızın sıx tərəfdaşlıq və geniş əməkdaşlıq gündəliyini davam etdirmək əzmini nümayiş etdirdi, Azərbaycan-Qırğızıstan münasibətlərinin tarixində yeni səhifənin əsasını qoydu. Əminəm ki, Azərbaycan-Qırğızıstan əlaqələri və ölkələrimiz arasındakı müttəfiqlik birgə səylərimizlə və xalqlarımızın mənafelərinə uyğun olaraq bundan sonra da yüksələn xətlə inkişaf edəcək və möhkəmlənəcəkdir. Bu bayram günündə Sizə möhkəm cansağlığı, xoşbəxtlik, ali dövləti fəaliyyətinizdə uğurlar, qardaş Qırğız Respublikasına davamlı sülh və firavanlıq arzulayıram”, - məktubda deyilir.
Mənbə: https://www.trend.az/azerbaijan/politics/4219067.html © 2026 Trend İnformasiya Agentliyi.
Xülasə — davamını mənbədə oxuyun.
