Qazaxıstan və Səudiyyə Ərəbistanı iki ölkə arasında müntəzəm uçuşların həyata keçirilməsi imkanlarını əhəmiyyətli dərəcədə genişləndirib. Bu barədə Qazaxıstan Nəqliyyat Nazirliyinin mətbuat xidməti məlumat yayıb. Nazirlikdən verilən məlumata görə, 26 avqust 2026-cı il tarixində Ər-Riyadda Qazaxıstan və Səudiyyə Ərəbistanı hökumətləri arasında Hava əlaqəsi haqqında Saziş imzalanıb.
“Sənədin imzalanması mülki aviasiya sahəsində mövcud normativ-hüquqi bazanı gücləndirib və iki ölkə arasında müntəzəm hava əlaqəsinin inkişafı üçün əlavə imkanlar yaradıb”, - deyə nazirlikdən bildirilib. Yeni tənzimləmələrə əsasən, Qazaxıstan və Səudiyyə Ərəbistanı arasında icazə verilən müntəzəm uçuşların sayı həftədə 28-dən 70-ə qaldırılıb. Sazişin ticarət-iqtisadi və biznes əlaqələrinin daha da inkişafına, investisiyaların cəlb edilməsinə, turizm və mədəniyyət sahəsində əməkdaşlığın gücləndirilməsinə töhfə verəcəyi gözlənilir.
Əldə olunan razılaşmalara əsasən, aviaşirkətlər Astana və Ər-Riyad arasında birbaşa müntəzəm reyslər açmağı və Qazaxıstanı Səudiyyə Ərəbistanının digər şəhərləri ilə birləşdirən marşrutların sayını artırmağı planlaşdırır. Bu arada, 2026-cı il avqustun 14-də Qazaxıstan da Türkiyə ilə iki ölkə arasında əməkdaşlığın daha da gücləndirilməsi və hava əlaqəsinin genişləndirilməsi məqsədi ilə mülki aviasiya üzrə Anlaşma Memorandumu imzalayıb. Əldə edilən razılaşmalara əsasən, hər iki tərəfin aviaşirkətləri üçün əsas marşrutlar üzrə həftəlik icazə verilən uçuşların sayı 76-dan 138-ə çatdırılıb.
Bunlara İstanbuldan Astana, Almatı və Çimkənd, həmçinin Ankaradan Astana və Almatıya uçuşlar daxildir. Mənbə: https://www.trend.az/casia/kazakhstan/4218257.html © 2026 Trend İnformasiya Agentliyi.
Xülasə — davamını mənbədə oxuyun.
